फुकाफाल प्रदेश मन्त्री : मैत्रीपूर्ण फुटसलको प्रमुख अतिथि

A+ A A-

प्रदेश संरचना आर्थिक भार भएको र नेता व्यवस्थापनको थलो मात्रै बनेको जनगुनासो व्याप्त छ । आफ्नो पदीय भार बिर्सिएर प्रदेशका मन्त्री हिँड्दा प्रदेश संरचना विरोधी अभिव्यक्ति दिनेलाई झनै बल पुगेको छ । गण्डकी प्रदेशकी सामाजिक विकास तथा स्वास्थ्य मन्त्री सुशीला सिम्खडा त्यस्तै अभिव्यक्तिलाई बल पुर्‍याउने पात्र बनेकी छन् ।

प्रदेश सरकारका मन्त्री र प्रदेशसभाका सदस्य कस्ता कार्यक्रममा जान हुन्छ÷हुँदैन भन्ने त कतै लेखिएको छैन । तर, मन्त्री सिम्खडा बिहीबार पोखरामा आयोजित मैत्रीपूर्ण फुटसल प्रतियोगिताको प्रमुख अतिथि बनेर आफ्नै ओहदा घटाएकी छन् । खेलकुदको जिम्मा पनि भएकाले अन्तर प्रदेश, अन्तरदेशीय मैत्रीपूर्ण प्रतियोगिता हुन्थ्यो भने त सामान्य नै लिन मिल्थ्यो तर उनी एउटा सामान्य मैत्रीपूर्ण प्रतियोगिताको प्रमुख अतिथि थिइन् ।

नेपाल आदिवासी जनजाति पत्रकार महासंघ (फोनिज)को २४ औं स्थापना दिवसमा गण्डकी प्रदेश समितिले मैत्रीपूर्ण फुटसल प्रतियोगिता आयोजना गरेको थियो । त्यसमा पुरुषतर्फ दुई टिम थिए । महिलातर्फ त टिम नै नपुग्ने अवस्था भए पनि जेनतेन पुर्‍याएर प्रतियोगिता सकियो । यो कुनै भव्य प्रतियोगिता थिएन, तर आयोजकले सामान्य प्रतियोगिता पनि सुरु गर्न मन्त्रीलाई कुरिरहेको थाहा पाएपछि सहभागी खेलाडीहरु रुष्ट भए ।

समाचार उत्पादन, प्रसारणको दैनिकीबाट समय निकालेर मैदान उत्रिएका पत्रकारलाई उनले अन्तर्राष्ट्रिय मैदानसम्म पुग्न शुभकामना दिइन् । ‘जिल्ला, राष्ट्रिय र अन्तर्राष्ट्रिय हिसाबमा खेलकुदमा सफल हुन शुभकामना दिन चाहन्छु,’ व्यावसायिक खेलाडीलाई दिनुपर्ने शुभकामना पत्रकारमाझ राखिन् । आयोजकको आग्रह स्वीकारेर आफूले समयको सदुपयोग गरेको मन्त्री सिम्खडाले सुनाइन् । अझ उनी आयोजकले बिहान ११ बजे बोलाएकोमा सवा १२ बजेमात्र पुगेकी थिइन् । संसद जान हतारिँदै आइपुगेकी मन्त्री २० मिनेट मात्र बसिन् ।

मन्त्रीलाई पत्रकारले यति सामान्य कार्यक्रममा किन बोलाए होलान् ? प्रदेश सरकारबाट आर्थिक सहयोग जुटाउन आयोजकले मन्त्रीलाई नै प्रमुख अतिथि बनाएर डाकेको थियो । जुन कुरा मन्त्री सिम्खडाले आफ्नो सम्बोधनमै खुलाइन् । ‘कति सकिन्छ धेरै नभनौं । सके जति सहयोग गर्ने प्रतिबद्धता जाहेर गर्छु,’ उनले सुनाइन् ।

आफ्नो सम्बोधन सकेर मन्त्री सिम्खडा मैदान छिरिन् । ‘खेलाडी पत्रकार’लाई शुभकामना दिएर प्रदेशसभा बैठकमा सहभागी हुन पुगिन् । अति नै सामान्य कार्यक्रममा मन्त्री सहभागी भएको यो दृश्यले प्रदेशका मन्त्रीका प्राथमिकता कस्ता छन्, कति फुकाफाल भएर हिँडेका छन् भन्ने संकेत गर्छ ।

प्रदेश मन्त्री प्रमुख अतिथि बनेको मैत्रीपूर्ण फुटसल प्रतियोगितामा नेपाल खेलकुद पत्रकार मञ्च, गण्डकी (पुरुष टिम) र नेपाल पत्रकार महासंघ कास्की (महिला टिम)ले आयोजक फोनिजको महिला र पुरुष दुवै टिमलाई पराजित गरेको थियो ।

प्रकाशित मिति: बिहीबार, साउन २५, २०८० २१:५८