किन लाग्यो सिम्रिकमाथि प्रतिबन्ध ? प्रदीप अधिकारी र रामेश्वर थापाबीच यस्तो छ रस्साकस्सी

किन लाग्यो सिम्रिकमाथि प्रतिबन्ध ? प्रदीप अधिकारी र रामेश्वर थापाबीच यस्तो छ रस्साकस्सी

A+ A A-

आर्थिक संकटमा फसेको भन्दै निजी क्षेत्रको वायु सेवा कम्पनी सिम्रिक एयरले शुक्रबारदेखि हेलिकोप्टर उडान गर्न नपाउने गरी नागरिक उड्डयन प्राधिकरणले प्रतिबन्ध लगाएको छ । नेपाल नागरिक उड्डयन प्राधिकरणलाई तिनुपर्ने रकम नतिरेकाले प्रतिबन्ध लगाइएको प्राधिकरणका सूचना अधिकृत ज्ञानेन्द्र भुल बताए पनि यो प्रकरणमा प्राधिकरणका महानिर्देशक प्रदीप अधिकारी र सिम्रिकका मालिक रामेश्वर थापाको तिक्तापूर्ण सम्बन्धले काम गरेको देखिन्छ ।

अधिकारी र थापाबीच केही महिनादेखि दुस्मनीपूर्ण सम्बन्ध रहेकाे क्यान स्राेतकाे दाबी छ । स्राेतका अनुसार थापाले राजनीतिक पहुँचकाे आधारमा अधिकारीकाे विकल्प खाेज्न थालेपछि अधिकारी रुष्ट भएका हुन् । त्यसकाे प्रष्ट स‌ंकेत चाहिँ गत जेठमा प्रकट भएकाे थियाे ।

महानिर्देशक अधिकारीसँग थापाको कुरा नमिलेको चाहिँ हेलिपोर्टको विषयले हो । थापाले काभ्रेको इटापु डाँडामा हेलिपोर्ट बनाउन चाहेका छन् । यसमा पर्यटन मन्त्री सुदन किराँतीकाे साथ थापाले पाएका छन् । र मन्त्रालयले गत जेठमा अनुमति पनि दिइसकेका छन् । तर, क्यानका महानिर्देशक अधिकारी यसको पक्षमा छैनन् । त्यसो त निजी कम्पनीलाई हेलिपोर्ट सञ्चालन गर्न दिन नहुनेमा सेनासमेत छ । वायु सेवा क्षेत्रका खेलाडी थापाले आफूले चाहेअनुसार महानिर्देशक अधिकारीबाट सहयोग नपाएपछि उनलाई हटाउने खेलमा लागेका हुन् ।

त्यसाे त मन्त्री किराँती र क्यानका महानिर्देशक अधिकारीबीच पनि राम्रो सम्बन्ध छैन । उनले अधिकारीलाई बर्खास्त गर्ने प्रयोजनका लागि ४ असारमा स्पष्टीकरणसमेत सोधेका थिए । त्यही दिन अधिकारीले मन्त्रालयले थापालाई हेलिपाेर्ट निर्माणका लागि अनुमति दिएकाे विषयमा प्रश्न उठाएका थिए । अनि सञ्चालनका लागि अनुमति नदिने सार्वजनिक अभिव्यक्ति नै दिएका थिए । मन्त्री र थापाकाे मिलेमताेमा भएकाे निर्णय आफूले कार्यान्वयन नगर्ने अधिकारीकाे अडान थियाे ।

यद्यदप अधिकारीले मन्त्री किराँतीसँग कुरा मिलाएपछि २० असारकाे दाेस्राे स्पष्टीकरणपछि अधिकारी हटाउने प्रकरण सेलाएको छ । मन्त्री र महानिर्देशकबीच ‘सिज फायर’ भए पनि वायु सेवाका खेलाडी रामेश्वर थापा भने महानिर्देशक अधिकारीलाई जसरी पनि हटाउने खेलमा छन् ।

यसरी आफूलाई हटाउन थापा लागेपछि महानिर्देशक अधिकारीले थापाको कम्पनीलाई हेलिकोप्टर उडानमै प्रतिबन्ध लगाउने सम्मकाे रणनीतिमा ओर्लिएकाे चर्चा क्यानमा चलिरहेकाे छ ।

प्राधिकरणका सूचना अधिकारी भुलले शिलापत्रसँग भने, ‘सिम्रिक एयरको फाइनेन्सियल अडिट हेर्दा उसको आर्थिक अवस्था कमजोर देखियो । त्यसमाथि उसले प्राधिकरणलाई तिनुपर्ने रकम पनि नतिरेपछि अर्को सूचना नभएसम्मका लागि उडानमा प्रतिबन्ध लगाइएको छ ।’

आर्थिक अवस्था कमजोर बनेपछि एभिएसन सेक्टरमा अन्य समस्याहरू पनि उत्पन्न हुने गर्छन् । पाइलटहरूको तलबमा कम्प्रमाइज हुन सक्ने जोखिम सबैभन्दा धेरै हुन्छ । पाइलटले तलबमा कम्प्रमाइज गर्दा सुरक्षा जोखिम बढ्ने खतरा हुन्छ । त्यसैले पनि प्राधिकरणले सिम्रिकमाथि कडा कदम चालेको हो । सो कम्पनीले विमानस्थलमा पार्किङवापत तिनुपर्ने शुल्क ४६ लाख ४३ हजार रुपैयाँ बाँकी रहेको छ । सो रकम तिर्न प्राधिकरणले ताकेता गरे पनि सो कम्पनीले अटेर गर्दै आएको प्राधिकरणले जनाएको छ ।