बुद्ध एयरको विवाद उत्कर्षमा, लेखा प्रमुखमाथि पनि सम्पत्ति शुद्धीकरणमा उजुरी

बुद्ध एयरको विवाद उत्कर्षमा, लेखा प्रमुखमाथि पनि सम्पत्ति शुद्धीकरणमा उजुरी

A+ A A-

बुद्ध एयरका सञ्चालक दाजुभाइको विवादले उग्र रूप लिन थालेको छ । बुद्ध एयरका सञ्चालक वीरेन्द्रबहादुर बस्नेतविरुद्ध भाइ शिवेन्द्रबहादुर बस्नेतले केही महिनादेखि प्रश्न उठाइरहेका थिए । कम्पनीको आर्थिक हिनामिनामा प्रश्न उठाएर भाइ शिवेन्द्रले दाजु वीरेन्द्रविरुद्ध पत्रकार सम्मेलन गरेर पारदर्शिताको हिसाबकिताब मात्र खोजिरहेका छैनन्, पाटन उच्च अदालतमा मुद्दासमेत दायर गरिसकेका छन् ।

शिवेन्द्रले दर्ता गरेको मुद्दामा कारण देखाऊ आदेश जारी भएको छ । शिवेन्द्रले आफूलाई ४० प्रतिशत शेयरहोल्डर बताउने गरेका छन् र केही वर्षदेखिको हिसाबकिताब नै नदेखाएको भन्दै वीरेन्द्रमाथि प्रश्न उठाएका छन् । वीरेन्द्रले कम्पनीको सम्पत्तिलाई निजी बनाउने प्रयास गरेको र कम्पनीको रकमबाट खरिद गरेको सम्पत्ति पनि आफ्नो परिवारको नाममा राख्ने गरेको शिवेन्द्रले आरोप लगाउँदै आएका छन् ।

दाजुभाइको यो विवादमा बुद्ध एयरका लेखा विभाग प्रमुख रमेशकुमार लुइँटेल पनि विवादमा तानिएका छन् । भाइ शिवेन्द्रले लुइँटेलमाथि पनि आर्थिक हिनामिनाको गम्भीर आरोप लगाएका छन् । उक्त आरोपसहित शिवेन्द्रले लुइँटेलविरुद्ध सम्पत्ति शुद्धीकरण अनुसन्धान विभागमा उजुरी दर्ता गराएका छन् ।

२४ साउन २०८० मा शिवेन्द्रले रमेश लुइँटेलको आर्थिक आम्दानीमाथि प्रश्न उठाएर उजुरी दर्ता गराएका हुन् । शिवेन्द्रले दर्ता गराएको उजुरीमा बुद्ध एयरका कर्मचारी रमेशकुमार लुइँटेलले सम्पत्ति शुद्धीकरण निवारण ऐन २०६४ को दफा ३ बमोजिमको कसुर गरी गैरकानुनी स्रोतबाट अकुत सम्पत्ति आर्जन गरेकाले ऐनको दफा १३ अनुसार उजुरी गरेको दाबी गरिएको छ ।

शिवेन्द्रले उजुरीमा लुइँटेलको पुरानो सम्पत्तिदेखि हाल काठमाडौं र मोरङमा भएको घर, अन्य जग्गा जमिन र सन्तानको उच्च शिक्षाका नाममा गरिएको लगानीमा प्रश्न उठाउँदै बुद्ध एयरको सम्पत्ति अपचलन गरेर आर्जन गरेको आरोप लगाएका छन् । बुद्ध एयरको कर छलेर, शेयरधनीको डिभिडेन्ड हिनामिना गरेर घरजग्गा, सन्तानको उच्चशिक्षामा लगानी गरेको उनको आरोप छ ।

लुइँटेलले सन् १९९७ देखि बुद्ध एयरमा जागिर सुरु गरेका थिए । विभिन्न पदमा काम गरेका लुइँटेल अहिले बुद्ध एयरको लेखा प्रमुख छन् । शिवेन्द्रले विभागमा दर्ता गराएको उजुरीअनुसार लुइँटेलको मासिक तलब डेढ लाख रुपैयाँ मात्र रहेको तर उनले अकुत सम्पति आर्जन गरेको आरोप छ ।

उजुरीमा भनिएको छ, ‘लुइँटेलले २५ चैत २०६६ मा मालपोत कार्यालय विराटनगरबाट आफ्नो भागको अंश आफ्नो अंशियारबाट बुझिसक्नुभएको छ । निजले अंश बुझ्दा निजको भागमा मोरङ झोराहाट वडा नम्बर १ को कुल जग्गा १०५५५.५ वर्गमिटर क्षेत्रफल परेको देखिन्छ । सो व्यहोरा उक्त अंशवण्डाको कागजातबाट पुष्टि हुन्छ । तर, हाल निजले श्रीमती शारदा लुइँटेललगायतको नाउँमा अकुत चल-अचल सम्पत्ति रहेको छ । ती सम्पत्ति निजहरूले कहाँ कुन स्रोतबाट आर्जन गरेको हो, सोको कुनै प्रमाण निजहरूसँग छैन ।’

उजुरीमा शिवेन्द्रले उल्लेख गरेअनुसार लुइँटेलले अवैध स्रोतबाट नेपालका विभिन्न भागमा जग्गा खरिद गरेको र त्यसको ९ थान जग्गाधनी पुर्जा उजुरीमा राखेका छन् । शिवेन्द्रले भनेका छन्, ‘लुइँटेलले सन्तानलाई भारत र थाइल्यान्डका महँगा विश्वविद्यालयमा भर्ना गरेका छन् । ती विश्वविद्यालयहरूको वार्षिक शुल्क नै २५ लाख रुपैयाँ छ । ती विश्वविद्यालयमा तिर्नुपर्ने शुल्क निज लुइँटेलले गैरकानुनी स्रोतबाट आर्जनको सम्पत्तिबाटै तिर्ने गरेका छन् ।’

उजुरीको विषयमा कुरा गर्न शिलापत्रले लुइँटेललाई सम्पर्कको प्रयास गरेको थियो । तर, लुइँटेलले आफू बैठकमा भएको र अहिले बोल्ने फुर्सद नभएको उनको सचिवालयबाट जवाफ पठाएका छन् ।

प्रकाशित मिति: बुधबार, साउन २४, २०८० १५:२२