के नेयमार बार्सिलोना फर्किँदैछन् ?

A+ A A-

सन् २०१७ मा नाउक्याम्प छोडेर पेरिस सेन्ट जर्मेन (पीएसजी) गएदेखि नै नेयमार बार्सिलोना फर्किने अड्कलबाजी थियाे । यही गर्मीमा फेरि एकपल्ट यो अड्कलले हल्लाकाे रूप लिएकाे छ ।

बार्सिलाेनाका जोन लापोर्टाका क्याम्पेन म्यानेजर लुइस क्यारास्कोले कुराकानीकाे झ्याल बन्द हुनुअघि नै ब्राजिलियन सुपरस्टार आउने कुरा गरेका छन् । ‘सबै सम्भावित समझदारीमा मलाई लाग्छ- नेयमारसँग हस्ताक्षर हुन गइरहेको छ’, लुइसको भनाइ उद्धृत गर्दै जिरार्ड रोमेरोले भने ।

जाभी हर्नान्डेजले नेयमार बार्सिलोना आउने हल्ला सत्य नभएको भन्दै गत जुनमा भनेका थिए- नेयमार फर्किने योजनामा छैनन् । क्लबले पनि उनलाई ऋणमा लिन चाहँदैन ।

तर फेरि यो हल्ला फैलाउनेहरू नेयमारका लागि बार्सिलोना उत्सुक रहेको ठान्छन् । बार्सिलोना पनि चाँडाेभन्दा चाँडाे टिम निर्माणका बारेमा निर्णय लिनुपर्ने दबाबमा पर्न सक्छ । किनभने अग्रपङ्तिबाट खेल्ने डेम्बेले ढिलोचाँडो पीएसजी जाँदैछन् । अर्कातिर अन्सु फातिको भविष्यलाई लिएर पनि अन्याेल बढिरहेको छ ।

नेयमार पीएसजी छाेड्न चाहन्छन्

यसैबीच नेयमारले पनि पेरिस सेन्ट जर्मेन (पीएसजी) क्लब छाेड्ने मनसाय व्यक्त गरेका खबर बाहिरिरहेका छन् । यसअघि लियाेनल मेस्सीले छाडेको पीएसजीबाट किलियन एम्बाम्बे बाहिरिन खाेज्दैछन् । त्यसैले पनि पीएसजीले यो वर्ष एकपछि अर्को झट्काको सामना गरिरहेको छ ।

नेयमारले आफू पुरानै क्लब बार्सिलोना फर्किन चाहेको सन्देश क्लबलाई अनाैपचारिक माध्यमबाट पठाइसकेकाे बताइन्छ ।

अहिले पीएसजीका लागि दुविधाको समय चलिरहेको छ । टिमबाट ठूला खेलाडी बाहिरिनुले टिमलाई पक्कै नाेक्सान हुन्छ । पहिले मेस्सी जानु, त्यसपछि एम्बाप्पे र अहिले नेयमारले टिम छोड्नु पीएसजीका लागि नाेक्सानी नै हाे । नेयमारले पीएसजीसँगकाे बाँकी दुई वर्षको सम्झौता समाप्त गर्न चाहेका छन् । यसपछि उनी आफ्नो पुरानो क्लब बार्सिलोनातिर पाइला सार्न चाहन्छन् ।

तर अहिले बार्सिलोना पनि आर्थिक समस्यामा रहेको बताइन्छ । यस्तोमा नेयमारको खर्च उसले कसरी उठाउँछ भन्न सकिने अवस्था छैन । जावीले भनेजस्तै ऋणमै उनलाई लैजान्छ त ? अहिलेसम्म यसबारे प्रस्ट कुरा आएकाे छैन ।

पीएसजीका नयाँ कोच लुइस एनरिकका लागि नेयमार महत्त्वपूर्ण खेलाडी नमानिन सक्छन्, किनभने लुइसले नयाँ खेलाडी समेटेर टिम बनाउने गरेका छन् । युवा खेलाडीसहितकाे टिम निर्माणमा ध्यान केन्द्रित गर्न पीएसजी पनि नेयमारलाई बेच्न तयार छ । नेयमार सन् २०२५ सम्म पीएसजीमा अनुबन्धित छन् ।

मेस्सीले यसै गर्मीकाे सुरुवातमा इन्टर मियामीबाट खेल्न पीएसजी छोडेका थिए । नेयमार र एम्बाप्पेले पनि क्लब छोडिदिए भने यो वास्तवमा याे एक युगको अन्त्यको प्रतीक हुने छ । पीएसजीले विश्व ट्रान्सफर रेकर्ड तोड्दै नेयमारलाई सन् २०१७ मा बार्सिलोनाबाट २ सय २२ मिलियन युरोमा भित्र्याएका थियाे ।

पीएसजीबाट खेल्न थालेपछि उनले ५ पल्टमा फ्रेन्च लिगको एक उपाधि जितेका छन् । तर, सन् २०१५ मा बार्सिलोनामा हुँदा जितेको एक मात्र च्याम्पियन्स लिगको उपाधि जोड्न उनी असफल रहे ।

यसैबीच एम्बाप्पेलाई पीएसजीको मुख्य प्रशिक्षण समूहबाट बाहिरै राखिएको छ । किनकि उनकाे अनुबन्धमा गतिरोध जारी छ । उनले रियल मड्रिडमा जाने तय गरिसकेका छन् ।

प्रकाशित मिति: मंगलबार, साउन २३, २०८० १४:४५