रास्वपाको प्रश्न- एमालेले प्रमुख प्रतिपक्षीको भूमिकाको गुण बोक्न सक्छ कि सक्दैन ?

रास्वपाको प्रश्न- एमालेले प्रमुख प्रतिपक्षीको भूमिकाको गुण बोक्न सक्छ कि सक्दैन ?

फाइल तस्वीर ।

A+ A A-

संसदको चौथो शक्ति राष्ट्रिय स्वतन्त्र पार्टीको भागमा संसदीय समिति परेन । सत्तारुढ दल र प्रमुख प्रतिपक्षी एमालेले मात्र समितिको नेतृत्व गर्ने सहमति गरे । ६ सिट रहेको जनमत, १० सिटको नेकपा एस र १२ सिट रहेको जसपाले समितिको नेतृत्व पाउँदा २१ सिट रहेको रास्वपाको भागमा समिति किन परेन ? भन्ने प्रश्नमा प्रमुख सचेतक सन्तोष परियार भन्छन्, ‘जनमतलाई स्वीकार नगरेको देखिन्छ । सत्ता टिकाउने खेल हो ।’

रास्वपालाई अनदेखा गरिएको निचोड उनको छ । ‘६ सिट, १० सिटले पाउने । हामीलाई अनदेखा गरियो । सबैलाई मिलाएर लानुपर्ने हो,’ उनले भने । सत्तापक्ष र प्रतिपक्षीको लेनदेन भएको निष्कर्ष रास्वपाको छ । ‘प्रमुख प्रतिपक्षी दलले लेखा समितिको नेतृत्व गर्ने हो । यहाँ लेनदेन देखियो । एमालेले प्रमुख प्रतिपक्षी भूमिकाको गुण बोक्न सक्छ कि सक्दैन ?,’ प्रमुख सचेतक परियार प्रश्न गर्छन् । रास्वपाले प्रमुख प्रतिपक्षीको भूमिकामाथि प्रश्न उठाएको छ ।

‘सिट संख्याका आधारमा एमाले प्रमुख प्रतिपक्षी हो तर संसदीय प्रणाली र चरित्रको आधारमा प्रमुख प्रतिपक्षी हामी हो,’ उनले भने । यसअघि रास्वपा एमालेको लाइनमा चलेको आरोपसमेत लाग्ने गरेको थियो । तर, संसदीय समितिमा सत्तापक्षसँग भाग खोजेर एमाले हिँडेपछि रास्वपाले एमालेको भूमिकामाथि शंका गर्न थालेको छ । यसबारे रास्वपाले आधिकारिक धारणा सार्वजनिक गर्ने तयारी गरेको छ । ‘समिति नपाए पनि हामीलाई केही फरक परेको छैन । केही निर्णय गर्छौं,’ उनले भने ।

सत्तारुढ दल कांग्रेसले अर्थ, कृषि, राज्य व्यवस्था र सुनुवाइ समितिको नेतृत्व कांग्रेसले गर्ने भएको छ । प्रमुख प्रतिपक्षी दल एमालेले तीनवटा समिति पाएको छ । उसले लेखा, महिला र राज्यका निर्देशक सिद्धान्त समितिको नेतृत्व गर्नेछ । माओवादी केन्द्रले कानुन र विकास समितिको नेतृत्व पाउने भएको छ । अन्तर्राष्ट्रिय सम्बन्ध समिति जसपाले, उद्योग समिति जनमत पार्टी र शिक्षा समितिको नेतृत्व नेकपा एसले पाउने सहमति भएको छ ।

प्रकाशित मिति: मंगलबार, साउन २३, २०८० १२:०४