बर्खास्तीको मागपछि महिला संघ अध्यक्ष भन्छिन्- म हल्लिनेवाला छैन, कहाँ गल्ति गरेँ ?

बर्खास्तीको मागपछि महिला संघ अध्यक्ष भन्छिन्- म हल्लिनेवाला छैन, कहाँ गल्ति गरेँ ?

A+ A A-

नेपाली कांग्रेसको भ्रातृ संस्था महिला संघको विवादमा असन्तुष्ट पक्षले अध्यक्ष उषा राउत मिश्रलाई बर्खास्त गर्न माग गरेकाे छ । सोमबार असन्तुष्ट समूहका २० जना केन्द्रीय सदस्यहरूले पत्रकार सम्मेलन गरेर बर्खास्तको माग गर्दा अध्यक्ष राउतले भने विधान बाहिर गएर काम नगरेको बताएकी छिन् ।

विधानविपरीत जिल्लाका निर्वाचित समिति भंग गर्ने काम बन्द गर्न पनि असन्तुष्ट समूहले अध्यक्ष राउतलाई चेतावनी दिएकाे छ । असन्तुष्ट समूहले तीन दिनभित्र विधानविपरीतका काम नसच्याए देशभर समानान्तर समिति बनाउने चेतावनी दिएको छ ।

महिला संघकी अध्यक्ष राउतलाई बर्खास्त गर्न माग, ३ दिनभित्र माग पूरा नभए समानान्तर समिति बनाउने चेतावनी

असन्तुष्ट समूहले पार्टी सभापति शेरबहादुर देउवालाई आफूहरूले ध्यानाकर्षण गराउँदा पनि माग सुनुवाई नभएको बताएको छ । अध्यक्ष राउतले एकलौटी ढंगले निर्वाचित सभापति हटाएर नयाँ अध्यक्ष ल्याउने काम गरिरहेको असन्तुष्ट समूहले आरोप लगाएको छ । आफूहरूसँग सरसल्लाह नै नगरी जिल्ला अध्यक्ष तोकेकोमा पनि असन्तुष्ट समूहको आपत्ति छ ।

‘अध्यक्षले १२ जिल्ला अध्यक्ष हटाउनुभएको छ । संघको विधानको धारा ३८ मा भएको स्पष्टीकरणको मौकासमेत नदिई निगाहका भरमा जिल्लाहरूमा नयाँ अध्यक्ष तोकिएको छ,’ असन्तुष्ट समूहको विज्ञप्तिमा भनिएको छ ।

उनीहरूले साउन १८ गते सभापति देउवालाई भेटेर संघमा विधानविपरीत काम भइरहेकोमा रोक्न ध्यानाकर्षणसमेत गराएका थिए । सभापति देउवाले बिबाद मिलाउन पहल गर्छु भन्ने जवाफ दिएका थिए । सो दिनका लागि तय भएको पत्रकार सम्मेलन समेत स्थगित भएको थियो ।

उनीहरूले संघभित्रको बिबाद मिलाउन सभापति, दुवै उपसभापति, दुवै महामन्त्री, सहमहामन्त्री महालक्ष्मी उपाध्याय डिना र केन्द्रीय कार्यालय सानेपामा पनि ध्यानाकर्षण बुझाएका छन् ।

यसबीचमा अध्यक्ष राउतले जिल्ला सभापति हटाएकी थिइन् । उनले सोलुखुम्बु अध्यक्ष छिल्हामु शेर्पा, बारा अध्यक्ष सीता मैनाली, पर्सा अध्यक्ष विद्या श्रेष्ठ, सिरहा अध्यक्ष विमला निरौला, ताप्लेजुङ अध्यक्ष मीना गुरूङ, इलाम अध्यक्ष निर्मला संजेल, महोत्तरी अध्यक्ष बिना तिवारी, रौतहट अध्यक्ष भुवनी गिरी श्रेष्ठ, कास्की अध्यक्ष कोपिला रानाभाट, झापा अध्यक्ष सुशीला ढकाल, हुम्ला अध्यक्ष विजया बुढालाई हटाएकी थिइन् ।

‘मैले के गल्ति गरेको थिएँ र मलाई जिम्मेवारीबाट हटाइयो ? सल्लाह हुनपर्छ । बिना आधार हटाउने ?,’ सोलुखुम्बु अध्यक्ष शेर्पाले भनिन् ।

बर्खास्तीको माग गर्दैमा आफू नहल्लिने अध्यक्ष राउत बताउँछिन् । ‘असोज महिनाभित्र सबै जिल्ला अधिवेशन गर्ने तयारी छ । उहाँहरू यसले डराउनुभएको हो । बार्गेनिङको लागि डर हो । बार्गेनिङका लागि डर पैदा गर्न यस्तो काम नगर्नुस् । म हल्लिनेवाला छैन,’ उनले शिलापत्रसँग भनिन्, ‘काम गर्नेछु । इगो भएर देखाइदिनका लागि प्रदेश संयोजक तोक्न लागेको होइन । हामीलाई पनि समानान्तर समितिमा बस्ने बनाइदिनुहोस् हामी पनि बस्छौं । मेरो पनि चुनौती छ । उहाँहरू नेताहरूको घरमा समस्या लिन जाओस् भन्ने चाहानुहुन्छ ।’

अहिलेको समिति तदर्थ भएको र यसको धरातल बुझ्नुपर्ने राउतले बताइन् । पार्टीभित्रको गुट महिलासंघमा अध्यक्षले चाहेर मात्र भत्काउन नसकिने उनले बताइन् ।

उनले सदस्य नभएको व्यक्तिलाई समेत तदर्थ समितिको केन्द्रीय सदस्यमा राखिएको उनले बताइन् । ‘म अहिलेसम्म बोलेको थिइन । मोरङमा एकजना डक्टर साथी हुनुहुन्छ । उहाँको सम्मान गर्नुपर्छ । नोबेल हस्पिटलमा गाइनोकालोजिस्टबाट केन्द्रीय सदस्य बन्नुभयो । साधारण सदस्यसम्म नरहनुभएपछि उहाँका पुत्ला जलाउने तयारी थियो । भोलिपल्ट पुत्ला जल्दैछ भन्ने थाहा पाएपछि बिहानको टिकट लिएर मोरङ गएर साथीहरूलाई भेटेर यो गर्न हुन्न सबै साथी हुन् । तदर्थ समितिमा यस्तो हुनसक्छ भनेर सम्झाएर आएको थिएँ । समितिमा आएका साथीहरूको मनोबल कमजोर पार्न हुन्न उहाँहरूले काम गर्नुपर्छ,’ अध्यक्ष राउतले भनिन् ।

जिल्ला अध्यक्ष तोक्ने अधिकार केन्द्रीय अध्यक्षलाई भएको उनले बताइन् । ‘जिल्ला अध्यक्ष खाली भएको जिल्लामा अध्यक्ष तोक्न केन्द्रीय अध्यक्षलाई पूर्ण अधिकार दिइएको छ । अब म प्रदेश संयोजक भोलि नै तोक्छु । दुईपटक माननीय खाने काठमाडौं बस्ने जिल्लामा एक दिन पनि पाइला नहाल्ने फोटो खिचेर हालेको भरमा नेता हुन पाइन्छ ?,’ उनले भनिन् ।

३६ वटा जिल्लामा महिला संघका अधयक्षले पद छाड्नुपर्ने अवस्था आएको उनले बताइन् । ‘पार्टीको माथिल्लो तहमा गइसकेपछि भगिनी संस्थामा स्वत: हटेका मान्नुपर्छ । त्यस्तो ३६ वटा जिल्ला छ,’ अध्यक्ष राउतले भनिन् ।

राउतलाई कांग्रेसका सभापति शेरबहादुर देउवाले २०७९ साउन २६ मा महिला संघ तदर्थ समिति अध्यक्ष मनोनीत गरेका थिए ।

प्रकाशित मिति: सोमबार, साउन २२, २०८० १८:३८