किन आकासियो गोलभेडाको मूल्य ? (भिडियो)

A+ A A-

उत्पादनको कमी र भारत निर्यात भएका कारण गोलभेडाको मूल्य वृद्धि भएको व्यवसायीहरूले बताएका छन् । एक महिनाअगाडि मात्रै नेपाली किसानहरूले उत्पादन गरेको गोलभेडाले बजार मूल्य नपाउँदा सडकमा फाल्नु परेको थियो ।

तर, ठीक एक महिनापछि गोलभेडाको मूल्य एक्कासी आकासिएको व्यवसायीहरूले बताए । उनीहरूले पछिल्लो समय किसानले उत्पादन गरेको गोलभेडा भारतमा समेत जान लागेकाले बजार मूल्य बढेको बताए । व्यवसायीहरूले केही समय पहिला नेपाल उत्पादन उच्च रहेको भारतमा पनि नगएको र नेपाली बजारमा १० रुपैयाँमा पनि नबिकेको भन्दै सडकमा गोलभेडा फालिएको बताए ।

कालीमाटी फलफूल तथा तरकारी बजारकी गोलभेडा व्यापारी तारादेवी मगरले तरकारीको मूल्यमा उतारचढाव आउनुको कारण उत्पादन भएको बताइन् । उनले अघिल्लो वर्ष एउटा तरकारी धेरै खपत भयो भने अर्को वर्ष सबै किसानले एउटै तरकारी उत्पादन गर्नुको कारण पनि यस्तो भएको बताइन् । उनले पछिल्लो समय भारतमा बढी पानी परेर डुबान भएका कारण गोलभेडाको मूल्य उच्च भएको बताइन् ।

उनले एक महिनाअघि नेपाली उत्पादन गोलभेडा फालाफाल हुँदा भारतमा समेत गएन । तर, अहिले नेपाली उत्पादन गोलभेडा करिब ७० प्रतिशत भारतमा गइरहेको बताइन् । उनले नेपाली बजारमा गोलभेडाको कमी भएको अवस्थामा भारतमा गोलभेडा निर्यात गर्दा मूल्य वृद्धि भएको बताइन् । उनले भारत नभएको भए ५० रुपैयाँ किलोभन्दा माथि जाने अवस्था नभएको बताइन् ।

उनले अघिल्लो वर्ष यही समयमा प्रतिक्रेट २ हजार रुपैयाँसम्म रहेकोमा अहिले टनेलभन्दा बाहिरको गोलभेडा २ हजार ५०० र टनेलभित्रको २ हजार ८०० प्रतिक्रेट मूल्यमा बिक्री भइरहेको बताइन् । उनले भारतमा समेत २ हजार ८०० प्रतिक्रेट गोलभेडा गइरहेको बताइन् । अहिले नेपाली बजारमा गोलभेडा किलो १४० रुपैयाँ रहेको बताइन् । उनले गोलभेडाको मूल्य एक महिनामा किलामा १० रुपैयाँ बढेको छ ।

गोलभेडा व्यवसायी द्वारिका अधिकारीले विगतको तुलनामा यो वर्ष तरकारी सस्तो रहे पनि गोलभेडा अत्यधिक महँगो भएको बताए। उनले अहिले तरकारी बजारमा महँगो भनेको गोलभेडा मात्रै रहेको बताए । उनले १० रुपैयाँ केजीसम्म झरेको गोलभेडाको मूल्य किसानहरूले सडकमा फालेको बताए । उनले गोलभेडाले बजार मूल्य नपाउँदा सडकमा फाल्नु पर्ने भएकाले किसानले औषधि उपचार नगर्दा उत्पादन कम भएकाले बजारमा कमी भएको बताए ।

तरकारी व्यवसायी बद्रीलाल श्रेष्ठले गोलभेडाको मूल्य पछिल्लो ३० वर्षको अवधिमा यो वर्षको जस्तो उतारचढाव नभएको बताए । उनले नेपाली उत्पादन गोलभेडा यो वर्ष नै सडकमा फाल्ने देखि १४० रुपैयाँसम्म मूल्य पुगेको बताए । उनले कालीमाटी तरकारी बजारमा होलसेलमा नै १२० रुपैयाँसम्म पुगेको बताए ।

श्रेष्ठले किसानले घर धितो राखेर कृषि गरे पनि कतिबेला के उत्पादन गर्ने भनेर ज्ञान नहुँदा उत्पादन गरेको वस्तुले मूल्य नपाउँदा निरास बन्नुपर्ने अवस्था रहेको बताए । कालीमाटी बजार विकास समितिले आइतबारका लागि नेपाली गोलभेडाको मूल्य प्रतिकिलो १६८.३३ रुपैयाँ कायम गरेको छ ।

प्रकाशित मिति: आइतबार, साउन २१, २०८० १७:३९