संसदको अवरोध हटाउन सत्तापक्ष र प्रतिपक्षी आ-आफ्नै अडानमा, सभामुख र सचेतकबीचको छलफल निष्कर्षविहीन

संसदको अवरोध हटाउन सत्तापक्ष र प्रतिपक्षी आ-आफ्नै अडानमा, सभामुख र सचेतकबीचको छलफल निष्कर्षविहीन

A+ A A-

सदनको अवरोध हटाउन सभामुख देवराज घिमिरेले प्रमुख दलका सचेतकहरूसँग गरेको छलफल निष्कर्षविहीन भएको छ । सत्तापक्ष र प्रतिपक्षी आ–आफ्नो अडानमा रहेपछि सभामुख घिमिरेले सचेतकहरूसँग गरेको छलफल निष्कर्षविहीन भएको हो ।

सुन तस्करीमा उच्चस्तरीय छानबिन समिति बनाउनुपर्ने एमालेको अडान र समिति नबनाउने सत्तारुढ दलको अडान छ । ‘सरकारले उच्चस्तरीय समिति बनाउन मानेको छैन, कुनै हालतमा बनाउँदिनँ भन्छ । सरकारले अनावश्यक अडान राख्यो,’ सभामुखसँगको छलफलपछि एमाले सचेतक महेश बर्तौलाले भने, ‘देशको लज्जाबोध भएको छ । सरकारले सुनको छानबिन प्रभावित पार्न खोज्यो । संसदको अवरोध कायम राख्न खोजेको देखियो ।’

सभामुखलाई समिति बनाउन, रुलिङ गर्न र निर्देशन दिन आग्रह गरिएको उनले बताए । भोलिको संसद बैठक के हुन्छ भन्ने प्रश्नमा उनले भने, ‘सदन चलाउनुपर्छ । इमर्जेन्सीमा सरकारको ध्यानाकर्षण गराउन पाउनुपर्छ । मन्त्रीले जवाफ दिनुपर्छ । तर, उच्चस्तरीय समिति सरकारले नबनाए विरोध हुन्छ । सुन प्रकरणमा सरकारको संलग्नता देखिएको छ । प्रधानमन्त्रीलाई सूचना थाहा हुने । एयरपोर्टबाट बाहिरिएको छ । हलुका ढंगले लिनु हुँदैन । उच्चपदस्थको पनि संलग्नता छ ।’

पूर्वन्यायाधीश, पूर्वआईजीपी वा कसैको नेतृत्वमा उच्चस्तरीय समिति बनाउनुपर्ने सचेतक बर्तौलाले बताए । ‘हामीले संसदीय छानबिन समिति बनाउने भनेको होइन । उच्चस्तरीय समिति बनाउने भनेको हो,’ उनले भने ।

राप्रपाले पनि उच्चस्तरीय समिति बनाउनु पर्ने माग राखेको छ । ‘सुन काण्डको विषयमा उच्चस्तरीय छानबिन समिति बनाएन भने जनतालाई जवाफ के दिने ? हाइ प्रोफाइल पनि जोडिएको छ । सकरारले समिति नबनाएसम्म सदन चल्न सक्दैन,’ राप्रपाका प्रमुख सचेतक ज्ञानबहादुर शाहीले भने ।

बैठकामा कांग्रेसका प्रमुख सचेतक रमेश लेखक, रास्वपाका प्रमुख सचेतक सन्तोष परियार र जसपाका प्रमुख सचेतक प्रदीय यादाव पनि सहभागी थिए । माओवादीको बैठक चलिरहेकाले प्रमुख सचेतक हितराज पाण्डे भने बैठकमा आएका थिएनन् ।

सत्तापक्ष र प्रतिपक्षीको अडानका कारण संसद बैठक १० साउनदेखि स्थगित छ ।

प्रकाशित मिति: आइतबार, साउन २१, २०८० १७:३८