ललितानिवास प्रकरण: ठूला आरोपी पक्राउ नगरी अनुसन्धान प्रतिवेदन बुझाउने सीआईबीको तयारी

ललितानिवास प्रकरण: ठूला आरोपी पक्राउ नगरी अनुसन्धान प्रतिवेदन बुझाउने सीआईबीको तयारी

A+ A A-

बालुवाटारस्थित ललितानिवासको सरकारी जग्गा हिनामिना प्रकरणको अनुसन्धान अन्तिमतिर पुगेको छ । प्रहरीको केन्द्रीय अनुसन्धान ब्युरो (सीआईबी) ले ललितानिवासको जग्गा हिनामिना प्रकरणको अनुसन्धान १२ असारदेखि आरोपीलाई पक्राउ गरेर सुरु गरेको थियो ।

सो अनुसन्धान सकेर सीआईबीले अनुसन्धान प्रतिवेदन सरकारी वकिलको कार्यालयलाई बुझाउने तयारी गरेको हो । पक्राउ परेकामाथि किर्ते तथा संगठित अपराध मुद्दामा अनुसन्धान थालेको सीआईबीले पक्राउ परेकामाथि बयान लिने काम तीव्र पारेको छ ।

अब थप आरोपीलाई पक्राउ गर्नुभन्दा पनि अनुसन्धान प्रतिवेदनमै फरार प्रतिवादी खुलाएर अनुसन्धान टुंग्याउने अवस्थामा सीआईबी पुगेको हो । सीआईबी स्रोतका अनुसार सकभर यही साता नभए अर्को साताभित्र अनुसन्धान सक्ने तयारी छ ।

यो पनि : कीर्ते अभियोगमा पनि जोडिए तीन पूर्वसचिव, हदम्यादबारे के हाे विवाद ?

सीआईबीले संगठित अपराध मुद्दामा ६० दिन थुनामा राखेर अनुसन्धान गर्न पाउने कानुनी प्रावधान छ । सो प्रावधान अनुसार हाल पक्राउ परेकाहरू ४३ दिनदेखि थुनामा छन् । सीआईबीको थुनामा हाल २० जना आरोपी छन् । जग्गा हिनामिनामा भने ४०५ जनाविरुद्ध पक्राउ पुर्जी जारी भएको थियो ।

तर, अधिकांश भागेर भारत पुगेको प्रहरीको आशंका छ । ललितानिवासको जग्गा चार चरणमा गरेर १४४ रोपनी जग्गा हिनामिना भएको खुलेको थियो । सीआईबी प्रमुख एआईजी किरण बज्राचार्यले पनि अनुसन्धान करिब अन्तिम चरणमा पुगेको बताए ।

यी हुन् सीआईबीको थुनामा रहेका आरोपी:

१) मीनबहादुर गुरुङ

२) धर्मप्रसाद गौतम

३) सुधीर कुमार शाह

४) गोपाल कार्की

५) शिवजी भट्टराई

६) घमनकुमार कार्की

७) बाबुराजा महर्जन

८) देव नारायण महर्जन

९) लोकहरि घिमिरे

१०) धुर्वप्रसाद अर्याल

११) नारायणराज मिश्र

१२) योगराज पौडेल

१३) रुद्रकुमार श्रेष्ठ

१४) बालकृष्ण श्रेष्ठ

१५) विनोदप्रसाद पौडेल

१६) केशव तुलाधर

१७) कलाधर देउजा

१८) अरुण कुमार श्रेष्ठ

१९) सन्जय कुमार महर्जन

२०) सकलनन्द महर्जन

व्यवसायीदेखि पूर्वसचिवसम्म भारत पुगेको आशंका

हाल सीआईबीको थुनामा रहेकामध्ये सबैभन्दा ठूला व्यवसायी भाटभटेनी सुपरमार्केटका सञ्चालक मीनबहादुर गुरुङ हुन् । त्यस्तै, उच्च सरकारी कर्मचारीमा निर्वाचन आयोगका पूर्वआयुक्त सुधीर शाह थुनामा छन् ।

यसअघि बहालवाला सचिव कृष्ण राउत पक्राउ परे पनि सर्वोच्च अदालतले थुनामा नराखी अनुसन्धान गर्न आदेश दिएको थियो । सोही आदेशपछि उनी रिहा भएका थिए । सीआईबीले दर्जन व्यवसायी र मालपोतका कर्मचारीबाहेक ललितानिवासको सरकारी जग्गा व्यक्तिको नाममा किर्ते गरेर नामसारी गर्ने काममा अख्तियारका पूर्वप्रमुख आयुक्त दीप बस्न्यात, भूमि सुधार मन्त्रालयका पूर्वसचिवद्वय छविराज पन्त र दिनेशहरि अधिकारीसहित १७ जना पूर्वसचिवविरुद्ध पक्राउ पुर्जी जारी गरेको थियो । तर, उनीहरू कसैलाई सीआईबीले पक्राउ गर्न सकेको छैन ।

त्यस्तै, व्यवसायीहरू सिद्धार्थ बैंकका अध्यक्ष मनोज केडिया, नेपाल लाइफ इन्स्योरेन्सका अध्यक्ष गोविन्दलाल संघाई, किया मोटर्सका विक्रेताद्वय सुहृद घिमिरे र पुरुषोत्तम पौडेल, शारडा ग्रुपका अध्यक्ष शिवरतन शारडा र सनराइज बैंक तथा गोयल समूहका अध्यक्ष कैलाशचन्द्र गोयलमाथि पनि सीआईबीले अनुसन्धान गर्न सकेन ।

यो पनि :

ललितानिवास प्रकरण: सीआईबीलाई १८ दिनभित्रै अनुसन्धान सक्नुपर्ने चुनौती, किन पक्राउ परेनन् अन्य आरोपी ?

प्रकाशित मिति: आइतबार, साउन २१, २०८० १२:४९