विचार र व्यवहार नमिल्दा माओवादी ओरालो लाग्यो, फेदीमा नपुगुञ्जेल रोकिँदैनः लेखनाथ न्यौपाने

विचार र व्यवहार नमिल्दा माओवादी ओरालो लाग्यो, फेदीमा नपुगुञ्जेल रोकिँदैनः लेखनाथ न्यौपाने

A+ A A-

माओवादी केन्द्रका केन्द्रीय सदस्य लेखनाथ न्यौपानेले माओवादीमा विचार र व्यवहारबीच तालमेल नमिल्दा पार्टी ओरालो लागेको टिप्पणी गरेका छन् ।

‘कम्युनिष्टहरूको विचार व्यवहारमा अभिव्यक्त हुने र व्यवहार विचारलाई थप विकसित गर्ने साइकल हो । तर माओवादीमा यो साइकल भताभुङ्ग लथालिङ्ग छ । नत हाम्रा व्यवहारले विचार थप विकास हुने ठाउँ देखिन्छ,’ न्योपानेले भने, ‘विचारअनुसारको व्यवहारा नहुँदा धेरै अन्यौलता आएको छ । माओवाद जुन उद्देश्यका निम्ती बनेको सिद्धान्त हो त्यसको प्रयोग हामीले गलत ठाउँमा गरिरहेका छौँ ।'

माओवादलाई संसदीय राजनीतिमा प्रयोग गर्नु नै गलत भएको न्यौपानेको भनाइ छ । 'संसारमा माओवादी सिद्धान्त र संसदीय राजनीतिक प्रणाली एकै ठाउँमा कहीँ पनि छैन । अहिले हामी माओवादलाई संसदीय राजनीतिमा प्रयोग गरिरहेका छौँ,’ न्यौपानेले भने ।

विश्वको कम्युनिष्ट आन्दोलन एउटा उचाइमा पुगेर ओरालो लागेपछि बीचमा रोकिएर पुनः उकालो लागेको र सफलता पाएको एउटा पनि उदाहरण नरहेको न्यौपानेले बताए । माओवादी पनि त्यस्तै ओ‌रालो यात्रामा रहेको न्यौपानेको भनाइ छ ।

‘माओवादीको ओरालो यात्रा फेदीमा नपुगुञ्जेल रोकिँदैन । यसलाई रोक्ने न वैचारिक निकास छ न त व्यावहारिक कोसिस भएको छ,' उनले भने, 'ओरालो यात्रा तीव्र गतिमा जारी छ ।’

न्यौपानेले विश्वमै बदनाम भएको राजनीतिक लाइनमा माओवादी रहेको टिप्पणी पनि गरे । माओवादीको बैठकमा आफ्नो भनाइ राख्ने क्रममा उनले माओवादी पुँजीवादी व्यवस्थाअन्तर्गत चुनाव लडेर सरकारमा रहेको बताए । तर, यो व्यवस्थाले वर्गीय असमानता, विभेदको अन्त्य गर्न नसक्ने उनको भनाइ छ । आफूहरू इमानदार हुँदा पनि सामान्य सुधारबाहेक धेरै काम गर्न सक्ने अवस्था नरहेको उनको भनाइ छ ।

‘शान्तिपूर्ण प्रतिस्पर्धाको माध्यमबाट समाजवाद ल्याउने लाइन बदनाम राजनीतिक लाइन हो । जुन खुश्चोव हुँदै एमालेसम्म आयो र हामी पनि त्यही ठाउँमा आयौँ । जुन उद्देश्यका लागि राजनीतिक लडाइ लडेका थियौँ त्यही लाइनमा आयौँ,’ न्यौपानेले भने, ‘यो लाइनले हामीलाई अगाडि जान त के कुरा यहाँ टिकिरहन पनि संभव छैन ।’

सरकारका कामले जनतामा सामान्य रूपमा भए पनि आशा जगाएको न्यौपानेको भनाइ छ । अहिले राम्रा काम गरेर सरकारले चर्चा कमाए पनि सरकारको त्यो कामलाई सहयोग पुग्ने गरी अनुसन्धान हुनेमा भने उनले शंका व्यक्त गरे । कर्मचारीतन्त्रले आफ्नो वर्गको पक्षमा काम गर्दा आफूहरूले चाहेको सकारात्मक परिणाम आउन सक्नेमा भने न्यौपानेले शंका व्यक्त गरे ।