विवादका बीच बहालवाला मन्त्री लिएर किन उड्यो बुद्ध एयर ?

A+ A A-

संस्कृति, पर्यटन तथा नागरिक उड्डयनमन्त्री योगेश भट्टराईलाई जहाजभित्र यात्रुले झपारेको भिडियो अहिले सामाजिक सञ्जालमा भाइरल बनेको छ । मोबाइलबाट भिडियो खिच्दै एक व्यक्तिले मन्त्री भट्टराईलाई सोधेका छन्, ’एक घण्टासम्म प्लेन रोक्ने ? कहाँ हुनुहुन्थ्यो ? मोजमस्तीमा हुनुहुन्थ्यो कि कहाँ हुनुहुन्थ्यो?’

यो घटनामा जोडिएका छन्, आफूलाई सामाजिक अभियान्ता बताउने ज्ञानेन्द्र शाही । उनी पनि सोही फ्लाइटबाट काठमाडौं आउँदै थिए, मन्त्रीको ढिलाइमा उनी पनि परे ।

के थियो घटना ?

मन्त्री भट्टराई डल्फिन महोत्सवमा सहभागी हुन कैलालीको टिकापुर पुगेका थिए । काठमाडौं फर्किने क्रममा बुद्ध एयरको नेपालगञ्जको अन्तिम उडानबाट काठमाडौं फर्कने क्रममा मन्त्रीले आधा घण्टा ढिला गरे । मन्त्रीको ढिलाइले फ्लाइट डिले भएपछि यात्रु आक्रोशित बने । तिनै यात्रुमध्ये एक थिए ज्ञानेन्द्र शाही । उनले मन्त्रीलाई प्रश्न पनि गरे । तर, मन्त्री भट्टराईले जबाफ दिएनन् । सरासरी गएर आफ्नो सिटमा बसे ।

ज्ञानेन्द्र र अर्का व्यक्ति मन्त्री भट्टराई बसेकै ठाउँमा गएर मन्त्रीलाई झपार्न थाले, ‘संस्कृति मन्त्रीसँग संस्कार छैन ।’ भट्टराईका सहयोगीले भिडियो खिच्दै प्रश्न गर्ने ती व्यक्तिलाई हटाउन खोजे । एकैछिनमा प्लेन उड्यो ।

मन्त्रीले ढिला गरेका कारण उनीमाथि प्रश्न उठ्यो वा यात्रुले अलि कडा शब्द प्रयोग गरे । लोकतन्त्रमा यसलाई अस्वाभाविक रुपमा हेर्न हुन्न । मन्त्री स्वयंमले माफी मागिसकेको अवस्था छ ।

त्योभन्दा गम्भीर कुरा यहाँ अर्कै छ, भीआईपी सवार प्लेनभित्र विवाद भइरहेका बेला किन उड्यो विमान ?

धेरै उदाहरण छन्, सर्वसाधरणबीच वा विमानका कर्मचारीसँग विवाद गर्ने यात्रुलाई एयरलाइन्सले उतार्छ । यो संसारकै प्रचलन हो । आकाशमाथि उड्ने यानभित्र फेरि विवाद वा झमेला हुन नदिन यो सतर्कता एयरलाइन्सले अपनाउँछन् ।

यही ७ भदौको कुरा हो, त्रिभुवन विमानस्थलबाट सिङ्गापुर उड्ने तयारीमा रहेको सिल्क एयरलाइन्सको फ्लाइट नम्बर एसएलके ४१३ (कल साइन एमआइ४१३) विमानमा मदिरा सेवन गरेर हो–हल्ला गर्दै विमान दलमा रहेका सदस्यहरूसँग विवाद गरेपछि एयरलाइन्सले गैरआवासीय नेपाली संघका अध्यक्ष भवन भट्ट र सञ्चारकर्मी सनत न्यौपानेलाई विमानबाट निकालेको थियो । विमान चढेर सिटमा बसिसकेका उनीहरूलाई सिल्क एयरका क्याप्टेनले नै साथै उडाउन नसकिने भन्दै विमानबाट ओर्लिन भनेका थिए । त्यसमा विवाद भएपछि सिल्क एयरले प्रहरी बोलाएर उनीहरूलाई विमानबाट बाहिर लगेको थियो ।

यस्ता कैयौं उदाहरण छन्, उड्न लागेको विमानभित्र विवाद उत्पन्न भएपछि कि विवाद समाधान गरेर प्लेन उडाइन्छ कि एक पक्षलाई बाहिर निकालेर । तर, नेपालगञ्जबाट बुद्ध एयरले विवादका बीच प्लेन उडाएको देखिन्छ ।

बुद्ध एयरको पहिलो गल्ती, पूर्व निर्धारित समयभन्दा आधा घण्टा ढिलो गरी उडान भर्नु हो । २ वैशाखमा बुद्ध एयरकै काठमाडौं–भैरहवाको उडान नं. ८५७ ले सञ्चार तथा सूचना प्रविधिमन्त्री गोकुल बाँस्कोटालाई छोडेर उडेकाे थियाे ।

एयरलाइन्सका लागि यात्रुभन्दा ठूलो अरु के हुन्छ ? विभागीय मन्त्री नै भए पनि समयमा नआएपछि छोडेर हिँड्न किन सकेन ?

मन्त्री आए, विवाद भयो । अब फेरि बुद्ध एयरले विवादका बीच प्लेन उडाएको छ । विवाद गर्नेलाई विमानबाट झार्न किन सकेन ?

बहालवाला मन्त्रीमाथि सिटकै छेउमा गएर केही व्यक्तिले हप्कदप्की गरिरहेका भिडियोमा देख्न सकिन्छ । उनीहरुलाई रोक्न सहयोगीले ठेलमठेल गर्नुपरेको दृष्य कोहीबाट लुकेको छैन । तर, पनि प्लेन उडाइएको छ ।

विमानका कर्मचारीले यसलाई सामान्य घटना ठाने होलान् । तर, विवाद चर्किएको हुन्थ्यो र प्लेनभित्र हात हालाहालको स्थिति बनेको हुन्थ्यो भने ? यसको उत्तर छ, एयरलाइन्ससँग ?

प्रकाशित मिति: सोमबार, भदौ ३०, २०७६ ०१:२६