सेकेन्ड ह्यान्ड स्मोकिङ अझै बढी घातक

A+ A A-

के तपाईंलाई थाहा छ ? धूमपान गर्ने व्यक्तिले हावामा फालेको धुवाँ उसको वरपर रहेका व्यक्तिहरूले सो व्यक्तिभन्दा धेरै लिइरहेका हुन्छन् ।

धूमपान गर्ने व्यक्तिहरूले हावामा फालेको धुवाँ लिने व्यक्तिलाई निष्क्रिय धूमपानकर्ता (सेकेन्ड ह्यान्ड स्मोकर) भन्ने गरिन्छ ।

चुरोटबाट निस्केको धुवाँमध्ये २५ प्रतिशत धूमपान गरिरहेका व्यक्तिले शरीरभित्र तान्छन् । र, बाँकी ७५ प्रतिशत हावामा फाल्ने गर्छन् । विभिन्न अध्ययनहरूले हाल धूमपान गर्ने र धूमपान नगर्ने निष्क्रिय व्यक्तिहरूलाई उत्तिकै समस्या उत्पन्न हुने देखाउँदै आएका छन् ।

हावामा फालिएको धुवाँमा धूमपान गर्ने व्यक्तिभन्दा दुई गुणा निकोटिन, तीन गुणा टार्ट, पाँच गुणाभन्दा बढी कार्बन मोनोअक्साइड र ५० गुणाभन्दा बढी क्यान्सरजन्य रसायनहरू हुने गर्छन् । जसका कारण धूमपान नगर्ने व्यक्तिहरूमा थुप्रै प्राणघातक रोगहरू लाग्ने जोखिम बढी हुन्छ ।

त्यस्तै, गर्भमा रहेको शिशुलाई पनि निष्क्रिय धूमपानले असर पुर्‍याउँछ । कुनै गर्भवती धूमपान गर्ने व्यक्तिको वरपर बस्नुपर्ने अवस्थमा उक्त धुवाँले गर्भमा रहेको भ्रूणलाई घातक असर पुर्‍याउने गर्छ ।

त्यसैगरी, चुरोट सेवन गर्ने गर्भवतीबाट तौल कम भएको बच्चा जन्मने, बच्चा जन्मेको केही दिनमै मृत्यु हुन सक्ने र कसैकसैको मृत बच्चासमेत जन्मने गर्छ ।

विज्ञहरूका अनुसार धूमपान नगर्नेहरूको भन्दा धूमपान गर्ने आमाबुवाबाट जन्मेका केटाकेटीहरूमा घरीघरी रुघाखोकी लाग्ने, ब्रोङ्काइटिस, निमोनियाजस्ता छातीसम्बन्धी रोगहरूको संक्रमण हुने सम्भावना उच्च रहन्छ ।

प्रकाशित मिति: मंगलबार, साउन १६, २०८० १४:१५