नाडा अटो एक्स्पोको स्टल निर्धारणका लागि लटरी ड्र सम्पन्न, ८२ वटा स्टल रहने

A+ A A-

नेपाल अटो मोबाइल्स एसोसिएसन अफ नेपाल (नाडा)ले नाडा अटो एक्स्पो २०२३ को सन्दर्भमा स्टल निर्धारणका लागि काठमाडौंको त्रिपुरेश्वरस्थित वर्ल्ड ट्रेड सेन्टरमा लटरी ड्र सम्पन्न गरेको छ ।

एक्स्पोमा सहभागी हुने सबै फर्म/कम्पनीहरूलाई समान अवसर प्राप्त होस् भन्ने उद्देश्यले लटरी ड्रमार्फत स्टलहरूको वितरण गरिएको नाडाले जनाएको छ ।

स्टल बुकिङका लागि नाडाले यसअघि नै सूचना प्रकाशित गरेको थियो । यसपटकको नाडा अटो एक्स्पोमा विगतमा भन्दा उत्साहजनक रूपमा अटोमोबाइल कम्पनीहरू सहभागी भएको नाडाले जनाएको छ । २०२०, २०२१ र २०२२ मा कोभिड महामारीलगायत अन्य विभिन्न कारणबाट यो एक्स्पो आयोजना हुन सकेको थिएन । तीन वर्षपश्चात् आयोजना हुन लागेको यस एक्स्पोमा अटोमोवाइल कम्पनीहरूको अत्यधिक सहभागिता रहेको नाडाको भनाइ छ ।

आयोजकका अनुसार एक्स्पोमा दर्शकहरूले विद्युतीय सवारीसाधनहरूलगायत हालसम्मका नयाँ मोडलहरूको अवलोकन गर्न पाउनेछन् । खासगरी एक्स्पोमा विभिन्न ब्रान्ड र मोडेलका सवारीसाधनहरू र त्यसमा प्रयोग हुने टायरट्युब, लुब्रिकेन्ट्स, स्पेयर पार्ट्स, एसेसरिज, अटो कम्पोनेन्ट्स एवं ग्यारेज उपकरणहरू र अन्य विभिन्न सामग्रीहरू प्रदर्शनीका लागि राखिने नाडाले जनाएको छ । नाडाका अनुसार यसपटक कुल ८२ वटा स्टलहरू प्रदर्शनीमा रहनेछन् ।

त्यसैगरी सो प्रदर्शनीमा अटोमोबाइल व्यवसायसँग प्रत्यक्ष सरोकार राख्ने बैंक तथा इन्स्योरेन्सजस्ता कम्पनीहरूसमेतको उल्लेख्य रूपमा सहभागिता रहनेछ । विभिन्न अवरोधहरूका बाबजुद पनि नाडाले गत वर्ष भव्यताका साथ नाडा ईभी एक्स्पो २०२२ समेत सम्पन गरेको थियो ।

Nada Auto Show- 21690804156.jpg

नेपालको सबैभन्दा ठूलो र भव्य रूपमा सम्पन्न हुँदै आएको नाडा अटो एक्स्पोको १५औँ संस्करणको 'नाडा अटो एक्सपो २०२३' आगामी भदौ २६ देखि ३१ गतेसम्म काठमाडौंको भृकुटी मण्डप परिसरमा आयोजना हुँदै छ ।

प्रदर्शनीमा १ लाखभन्दा बढी दर्शकले अवलोकन गर्ने र करिब २० अर्बभन्दा बढीको कारोबार हुने अपेक्षा पनि गरिएको छ । यस प्रदर्शनीको सम्पूर्ण व्यवस्थापन ग्लोबल एक्सपोजिसन एन्ड म्यानेजमेन्ट सर्भिसले गर्ने बताइएको छ ।

प्रकाशित मिति: सोमबार, साउन १५, २०८० १७:३५