मधेश सरकारले आठ महिनासम्म पनि पाएन पूर्णता, प्रवक्ता भन्छन्– केही दिनमै हुन्छ

मधेश सरकारले आठ महिनासम्म पनि पाएन पूर्णता, प्रवक्ता भन्छन्– केही दिनमै हुन्छ

A+ A A-

मधेश प्रदेश सरकार गठन भएको आठ महिना भइसक्दा पनि सरकारले पूर्णता पाउन सकेको छैन । सत्ता गठबन्धनमा रहेका दलबीच मन्त्रालय बाँडफाँटमा तालमेल नहुँदा मुख्यमन्त्री सरोजकुमार यादव नेतृत्वको सरकारले लामो समयसम्म पनि पूर्णता पाउन नसकेको हाे ।

गत २९ पुसमै प्रदेश प्रमुख हरिशंकर मिश्रले तत्कालीन नेकपा एमाले, माओवादी केन्द्र र जनमत पार्टीको समर्थनमा जसपा संसदीय दलका नेता यादवलाई मुख्यमन्त्रीमा नियुक्त गरेका थिए । यो आठ महिनाको अवधिमा सरकार पाँचपटक विस्तार हुनुको साथै सत्ता समीकरण पनि फेरियो तर पनि मुख्यमन्त्री यादवले सरकारलाई पूर्णता दिन सकेनन् । त्यति मात्र नभई दुई जना मन्त्री र दुई राज्यमन्त्रीलाई लामो समयदेखि बिनाविभागीय बनाइएकाे छ ।

तत्कालीन सामाजिक विकास मन्त्री सुरिता साह र भूमि व्यवस्था कृषि तथा सहकारी मन्त्री बसन्त कुश्वाह तथा तत्कालीन सामाजिक विकास राज्यमन्त्री अबुल कलाम अजाद र तत्कालीन भूमि व्यवस्था कृषि तथा सहकारी राज्यमन्त्री सञ्जय यादव अझै पनि बिनाविभागीय मन्त्रीका रूपमा छन् ।

सरकारलाई पूर्णता नदिँदा सत्ता साझेदार माओवादी केन्द्र र जनमत पार्टीका नेताहरू सार्वजनिक रूपमै असन्तुष्टि व्यक्त गर्दै आएका छन् । गत ९ जेठमा सत्ता गठबन्धनमा छलफल नै नगरी मुख्यमन्त्री यादवले एकलौटी रूपमा कांग्रेस र नेकपा एसलाई सरकारमा सहभागी गराएदेखि माओवादी केन्द्र, जनमत र लोसपा मोर्चा बनाएर सरकारविरुद्ध छन् । मुख्यमन्त्री यादवले ११ जेठमा एक मन्त्रालय दिएर सरकारमा सहभागी गराएपछि लोसपा तत्काल शान्त भएको छ । तर थप एक मन्त्रालय वा एक राज्यमन्त्री दिनुपर्ने अडान उसले त्यागेकाे छैन ।

केन्द्रीय गठबन्धनको सहमति अनुसार आफूहरूसँग कुनै समन्वय नगरी एकलौटी रूपमा सरकार विस्तार गरेकोमा माओवादी केन्द्रकाे संसदीय दलले उद्योग वाणिज्य तथा पर्यटन मन्त्री सुनिता यादव र राज्यमन्त्री रहबर अन्सारीलाई फिर्ता बोलाउने निर्णय गरेकाे भए पनि प्रधानमन्त्री पुष्पकमल दाहालले उनीहरूलाई रोकेका थिए ।

रोजाइको मन्त्रालय नपाउँदा जनमत पनि असन्तुष्ट छ । आफ्ना पार्टीबाट बसन्त कुश्वाहाले जिम्मेवारी पाएको भूमि व्यवस्था कृषि तथा सहकारी मन्त्रालय नेकपा एकीकृत समाजवादीलाई दिएपछि जनमतले सरकार छोड्नेसम्मको चेतावनी दिएकाे थियाे । मन्त्री कुश्वाहा बिनाविभागीय भएदेखि निवास तथा जिल्लामा हुने पार्टीका कार्यक्रममा मात्रै जाने गरेका छन् । त्यसैगरी, स्वतन्त्र निर्वाचित भई मन्त्रीको लागि जसपामा प्रवेश गरेकी सुरिता साह पनि यतिवेला बिनाविभागीय मन्त्री भएर जनकपुरधामस्थित आफ्नाे निजी निवासमै बस्ने गरेकी छन् ।

सुरुमा सामाजिक विकास मन्त्रालयको जिम्मेवारी साहलाई तोकिएको थियो । तर ९ जेठमा सरकार विस्तार भएपछि उनीसँगै सामाजिक विकास राज्यमन्त्री अबुल कलाम अजाद पनि बिनाविभागीय बन्न पुगेका थिए । यसरी, दुई मन्त्री बिनाविभागीय हुँदा मुख्यमन्त्री यादवले भने गृह, सञ्चार तथा कानुन मन्त्रालय र यातायात तथा श्रम मन्त्रालय आफैसँग राखेका छन् ।

छैटाैँपटक सरकार विस्तारकाे तयारी

मुख्यमन्त्री यादवले आउँदो आइतबारसम्म छैटाैँ पटक सरकार विस्तार गर्ने तयारी गरेका छन् । सरकारका प्रवक्ता तथा अर्थमन्त्री सञ्जयकुमार यादवले केही दिनमै सरकार विस्तार हुने बताए । खाली रहेको दुईवटा मन्त्रालय जसपा र कांग्रेसले पाउने गरी सरकार विस्तार हुने उनले बताए । जसपाले श्रम तथा यातायात र कांग्रेसले गृह तथा सञ्चार मन्त्रालय पाउने गरी सहमति भएको उनले बताए ।

प्रकाशित मिति: शुक्रबार, साउन १२, २०८० ०७:३७