बहुप्राविधिक खेती गर्दै आएका कञ्चनपुरका बडायक बने सर्वोत्कृष्ट कृषक

A+ A A-

कञ्चनपुर बेलौरी नगरपालिका वडा नम्बर ६ मा बहुप्राविधिक रुपमा कृषि खेती गर्दै आएका असारे राम बडायक प्रदेशस्तरीय कृषक पुरस्कारमा सर्वोत्कृष्ट बनेका छन् । प्रदेश सरकारको भूमि व्यवस्था, कृषि तथा सहकारी मन्त्रालयले हरेक वर्ष सर्वोत्कृष्ट तथा उत्कृष्ट कृषकलाई वितरण गर्दै आएको पुरस्कारबाट उनी सम्मानित भए ।

बडायकलाई प्रमाणपत्र र रकमसहित सर्वोत्कृष्ट पुरस्कार प्रदेशका मुख्यमन्त्री कमलबहादुर शाहले प्रदान गरे । उनलाई नगद एक लाख ५० हजार पुरस्कार पाएका हुन् । उखु खेती, छरुवा धान खेती, आलुलगायतमा विभिन्न प्रविधि प्रयोग गरेर उनी विगत १२ वर्षभन्दा बढी समयदेखि कृषि खेतीमा लागेका छन् । उनले भने, ‘मन्त्रालयले सर्वोत्कृष्ट कृषकबाट सम्मान गर्दा खुसीसहित कृषि खेतीतर्फ जिम्मेवारी थपिएको महसुुस भएको छ ।’

यस्तै मन्त्रालयले नगद ७५ हजारसहित प्रदेशका चार कृषकलाई उत्कृष्टका रुपमा सम्मान गरेको छ । सम्मानित हुनेमा कैलालीका पहलमान देउवा, डडेल्धुराका प्रिन्सराज अवस्थी, प्रशान्त अवस्थी र जयन्ती भाट रहेका छन् ।

सम्मान ग्रहण गर्दै सम्मानित हुने कृषकहरुले अझै पनि कृषकहरु व्यवसायिक हुन नसकेको गुनासो गरेका थिए । उनीहरुले बैंकले ऋण प्रवाह नगर्ने, समयमा मल खाद नपाइने, सिँचाइ अभाव, उत्पादन भए पनि बजारीकरण नहुने, तरकारी भण्डार केन्द्र अभाव लगायतका समस्या कृषकहरुले भोग्नुपरिरहेको गुनासो गरेका थिए ।

कार्यक्रममा प्रदेशका मुख्यमन्त्री कमलबहादुर शाहले युवालाई कृर्षितर्फ आकर्षण गराए मात्र पहाडका बाँझो खेतमा अन्नबाली उब्जनी सहज हुने बताए । उनले भने, ‘समग्र सुदूरपश्चिम प्रदेश समृद्धिको कुरा गरिरहँदा कृषि क्षेत्रलाई अलग राख्न सकिँदैन । पूर्वाधार, पर्यटन, जलस्रोतसँगै कृषिबाट पनि प्रदेश समृद्धिको सम्भावना बोकेको छ ।’

उनले सरकारले कृषिमा लगानी गरे पनि सोचेअनुसार प्रतिफल आउन नसकेको बताए । उनले भने, ‘विउविजन, मलखाद, अनुदान, सिँचाइ सुविधालगायत कृषिमा थुप्रै लगानी भए पनि सोचेअनुसारको प्रतिफल आउन सकेको छैन । कतै सरकारको व्यवस्थापनमा कमजोरी भएर यो अवस्था आएको हो कि ? यसमा हामीले पनि सोच्न जरुरी छ । सरकारले प्रतिफल आउने गरी कृषकमा लगानी गर्नुपर्छ ।’

अहिलेको प्रदेश सरकारको सोही सोचका आधारमा अघि बढेको उनको भनाइ छ । ‘कसैलाई व्यक्तिगत फाइदा पुग्ने गरी कुनै फर्म वा संस्थामा सरकारको बजेट विनियोजन हुनुहुँदैन । यदि त्यस्तो पाइएको छ भने कार्यान्वयन नगर्नुहोला ।’

गन्यापधुरा गाउँपालिकाका अध्यक्ष इन्द्र कार्कीले कृषितर्फ सबैलाई आकर्षण गराउन अभियानकै रुपमा अघि बढाउनुपर्ने सुझाव दिए ।

प्रकाशित मिति: बुधबार, साउन १०, २०८० १९:४३