कोल्टी विमानस्थल, जहाँ जहाजभन्दा पहिले काल आउँछ

A+ A A-

मुगुको खत्याड गाउँपालिका– १, रातापानीबाट ज्यान बच्ने आशामा उपचारका लागि सुविधासम्पन्न स्थानमा लैजान बाजुराको कोल्टी विमानस्थल ल्याइएका बिर्खलाल कार्कीको दुई दिनदेखि जहाज कुर्दाकुर्दै बुधबार मृत्यु भयो । जहाज कुर्दाकुर्दै ज्यान गुमाउँने उनी मात्र होइनन् । हरेक महिना मुगु, बाजुरा र हुम्लाको तल्लो क्षेत्रका बिरामी आफन्तलाई बोकेर कोल्टीसम्म ल्याउँछन् तर लामो समयसम्म जहाज नआएपछि फर्किंदा लास लिएर फर्किन्छन् ।

स्थानीय धर्मबहादुर शाहीले भने, ‘उच्च रक्तचापको समस्या जटिल देखिएपछि कार्कीलाई थप उपचारका लागि नेपालगञ्ज वा धनगढीमध्ये कहीँ सिटी स्क्यानसहितको सुविधा भएको अस्पतालमा लैजान रातापानी प्राथमिक स्वास्थ्य केन्द्रले रिफर गरेको थियो । जहाज नआउन्जेलसम्मका लागि कोल्टी प्राथमिक स्वास्थ्य केन्द्रमा राखिएको थियो । पैदल जाऊँ भने सडक छैन, त्यही भएर जहाज कुरेका थियौँ, जहाँजभन्दा काल पहिला आयो ।’

जहाज कुर्दाकुर्दै जेठ पहिलो साता ३ दिनको अवधिमा रिफर गरिएका २ जना बिरामीको ज्यान गएको थियो । बुढीनन्दा नगरपालिका ३ का अग्नि बोहरा र जगन्नाथ गाउँपालिका १ की ऐना गिरीलाई जहाज नआएपछि पैदलमार्गबाट धनगढी लैजाँदै गर्दा बाटोमा मृत्यु भएको हो । जेठ हिमाली गाउँपालिका– ७ का देवीदत्त जोशी र जगन्नाथ गाउँपालिका– १ का लालबहादुर रोकायाको जहाजको पर्खाइ हुँदाहुँदै जेठ ७ गते एकै दिन ज्यान गएको थियो । जेठ ७ गते बुढीनन्दा १० का निवर्तमान वडा अध्यक्ष सतवीर बोहराको पनि जहाज कुर्दाकुर्दै मृत्यु भएको थियो ।

जहाजभन्दा काल पहिला आयो

रिफर गरिएका कार्कीलाई सुविधासम्पन्न अस्पताल लैजान आफन्तले जहाज आउने आकाश हेरिरहेका थिए । वर्षात्‌का कारण मार्तडी–कोल्टी सडक खण्ड र कर्णाली कोरिडोरको सडक अवरुद्ध भएकाले आफन्त जहाज कुरी बसेका थिए । रिफर गरिएको दुई दिनसम्म पनि जहाज नआएपछि आफन्तले हेलिकोप्टरको समेत जोहो गर्ने प्रयास गरेका थिए । सडकबाट सम्भव नभएको, जहाज नआएको र हेलिकोप्टरसमेत मौसमका कारण नआउने अवस्था भएपछि कार्कीले प्राथमिक स्वास्थ्य केन्द्रमै ज्यान गुमाए ।

कोल्टी प्राथमिक स्वास्थ्य केन्द्रका प्रमुख डाक्टर प्रतीक न्यौपानेले भने, ‘उच्च रक्तचापसहितको समस्याले मान्छे चिन्न र बोल्नसमेत नसक्ने अवस्था भएकाले सिटी स्क्यान नगरी उपचार सम्भव थिएन, हामीसँग त्यो सुविधा छैन, हामीले रिफर गर्‍यौँ, जहाज आएन, सडकबाट लिन झन् सम्भव नै थिएन । दुर्भाग्य, बचाउन सकिएन । तीन महिनायता मात्रै चार जनाको जहाज कुर्दै ज्यान गएको छ ।’

यता नागरिक उड्डयन कार्यालय कोल्टीले मौसम खराबीका कारण जहाज नआएको बताएको छ । घाम लागेकै दिन पनि नियमित तालिका मिचेर अर्को ठाउँको उडान भर्ने विमान कम्पनीले यतिबेला मौसमलाई दोष देखाउन झनै सजिलो उपाय बनेको छ ।

लामो समयपछि कोल्टी प्राथमिक स्वास्थ्य केन्द्रले डाक्टर पाएको छ । जिल्ला अस्पतालमा स्थायी दरबन्दी नहुँदा पनि कोल्टीले स्थायी दरबन्दीको डाक्टर पाएको छ ।

तर भवन, उपकरण, सुविधा र आवश्यक संरचना नहुँदा डाक्टरलाई समेत उपचार सेवा दिन वातावरण नै छैन । ‘बिरामी राख्ने बेड नै हुँदैन, भवन नै छैन्, डाक्टर भएर मात्रै कहाँ हुन्छ ?,’ डाक्टर प्रतीकको भनाइ छ ।

बिरामीले जहाज पर्खी बसे पनि उनीहरूका लागि काल पहिला आउने र विमानपछि हुने अवस्था योपटक पनि निरन्तरता पाएको स्थानीयसमेत रहेका नेकपा एमाले नेता जनककुमार विष्टले बताएका छन् । सिजनमा हवाई कम्पनीले बाजुराको कोल्टी उडान प्रभावित गर्ने गरेका छन् । पूर्वमा राम्रो आम्दानी हुने भएपछि यताको उडान तालिका नै रद्द गरेर अन्यन्त्र जाँदा यहाँका बिरामीले अकालमै ज्यान गुमाउनुपरेको अवस्था छ ।

उसो त कोल्टी विमानस्थलमा मौसम खराबीबाहेक सातै दिनको उडान तालिका छ । सीता एयर बिहीबार, तारा सोमबार, नेपाल एयर मंगलबार र बाँकी दिन समिट एयरले उडान भर्ने तालिका छ । बाजुरादेखि नेपालगञ्जसम्मको हवाई उडान समय ३० देखि ३५ मिनेटको हुने गरेको छ ।

बुढीनन्दा नगरपालिकाका नगर प्रमुख जनक कुमार बोहराले भने, ‘एकाध घण्टाभित्रै उपचार सेवा दिनुपर्ने बिरामीलाई दुर्गम क्षेत्रबाट पठाउनै सम्भव नहुने भएकाले अकालमै ज्यान गुमाउनुर्ने बाध्यता यहाँका स्थानीयलाई छ । पालिकाका तर्फबाट सकेको प्रयास गरिएको र लामो समयदेखिको डाक्टरविहीनताको अवस्थाबाट मुक्त गराएर सकेको सेवा प्रवाह भइरहेको हो ।’

प्रकाशित मिति: बुधबार, साउन १०, २०८० १६:५६