गाउँ गाउँमा पहिरो, बाजुरा सडक सम्बन्धबाट बिच्छेद

A+ A A-

सदरमुकाम जोड्ने साँफे–मार्तडी सडक खण्डको बुढीगंगा नगरपरालिका–१ मा रहेको अम्कोटमा शुक्रवार रातीबाट नियमित पहिरो खस्न थालेपछि प्रदेश र केन्द्रसँगको सडक सम्बन्ध बिच्छेद भएको हो ।

शुक्रबार रातीको अविरल वर्षाका कारण आएको पहिरो शनिबार विहान जेसीवी प्रयोग गरी सडक सुचारु भएपनि दिउसो साढे १२ बजे पुनः २० मिटर लामो पहिरो आएपछि सडक अवरुद्ध बनेको जिल्ला प्रहरी कार्यालय बाजुराका प्रहरी उपरिक्षक जनकराज ढुङ्गानाले जानकारी दिएका छन् ।

‘अम्कोटमा विहान आएको पहिरो पन्छाएका थियौं ठुलो पहिरो आएका कारण जेसीवीले नसक्ने भए पछि स्काभेटरको प्रतिक्षामा छौं स्काभेटर आयो भने पहिरो पन्छाउछ र केही दिनमा बाटो खुल्छ,’ उनले भने ।

‘सडकको माथिबाट पहिरो खस्न नरोकिएकाले आजै सडक मर्मत गर्न सम्भव नभएको प्रमुख जिल्ला अधिकारी गंगाप्रसाद न्यौपानेले बताए ।

सडकमा पटक पटक पहिरो जान थालेपछि यहाँका स्थानीयहरुले सास्ती भोग्दै आएका छन् । उक्त सडकमा संचालन हुने लामो तथा छोटो दुरीका यातायातका साधन समेत संचालनमा अवरोध पुगेको यातायात व्यवसायी पृथ्वी रावलले बताए ।

उक्त सडकमा संचालन हुँदै आएका जीप तथा गाडीमा यात्रा गर्ने यात्रुहरुले चर्काे भाडा तिर्न बाध्य छन् । सडक अवरुद्ध भएको बाहना देखाउदै ब्यापारीहरुले सामानको रेट बढाउने गरेका छन् ।

साँफे–मार्तडी सडक खण्ड अबरुद्ध भएको यो चौथो पटक हो । यो बाटो भएर हुम्ला मुगु र बाजुराको सदरमुकाम मार्तडीसम्म पुग्ने यात्रुले बर्षेनी सास्ती झेल्दै आएका छन् ।

ग्रामीण सडक सवै बन्द

जिल्लाको पुर्वी उत्तरी क्षेत्र जोड्ने मार्तडी, कोल्टी सडक र अन्य ग्रामीण सडकहरु अबरुद्ध भएका छन् । ग्रामीण सडक अवरुद्ध भएको दुई महिना भइसकेको खप्तड छेडेदह गाउपालिका–२ का स्थानीय सुन्त लुहारले बताएका छन् ।

पानी आएपछि माथिबाट पहिरो खस्ने भएकाले मार्तडी, घटमुना, बल्दे, आटिचौर हुदै बझाङ जोड्ने सडक, डाब बजार खप्तड पर्यटन सडक, बाम्का त्रिबेणी सडक समेत अवरुद्ध बनेका छन् ।

सडक समयमै निर्माण नहुँदा यहाँका स्थानीयले बर्षा याममा पैदल यात्रा गर्न बाध्य हुने गरेका छन् । जथाभावी रुपमा खनिएका सडकले जिल्ला पहिरोको उच्च जोखिममा रहेको जिल्ला दैवी प्रकोप उद्धार समिति बाजुराको तथ्यांकमा उल्लेख छ ।

प्राविधिक रुपमा चेकजाँच नै नगरी काटिएका सडकहरुले पहिरो निम्त्याउने भएपछि जिल्लाबासी त्रसित बन्दै गएका छन् ।

प्रकाशित मिति: आइतबार, भदौ २९, २०७६ ०२:३१