बैंकर्स संघका अध्यक्ष भन्छन्- असामान्य अवस्थामा आएकाले मौद्रिक नीतिलाई सकारात्मक रूपमा हेरेका छौँ

बैंकर्स संघका अध्यक्ष भन्छन्- असामान्य अवस्थामा आएकाले मौद्रिक नीतिलाई सकारात्मक रूपमा हेरेका छौँ

A+ A A-

वाणिज्य बैंकर्सहरूको संगठन नेपाल बैंकर्स संघका अध्यक्ष सुनिल केसीले मौद्रिक नीति सकारात्मक रहेको प्रतिक्रिया दिएका छन् ।

आइतबार नेपाल राष्ट्र बैंकले चालु आर्थिक वर्ष २०८०/८१ को मौद्रिक नीति सार्वजनिक गरेपछि न्युज एजेन्सी नेपालसँग कुरा गर्दै केसीले असामान्य अवस्थामा आएको मौद्रिक नीति सन्तुलन कायम गर्ने गरी आएको बताए । विश्व अर्थतन्त्रमा देखिएका समस्या अझै बाँकी रहेको र नेपाली अर्थतन्त्रमा पनि समस्या चुनौति कायम रहेको उनको भनाइ छ ।

‘विश्व अर्थतन्त्रमा देखिएका समस्याहरू अझै बाँकी छन् । नेपालमा पनि आर्थिक नीतिमा समस्या हुँदा असामान्य अवस्थामा आएको मौद्रिक नीति भएकाले यसलाई सन्तुलन खालको मौद्रिक नीतिका रूपमा हेरका छौँ,' केसीले भने ।

चालु पुँजी कर्जालाई पुनरावलोकन गर्ने, शेयर धितो कर्जा, रियल स्टेट कर्जा तथा हायर पर्चेज कर्जाका विद्यमान जोखिम भारसम्बन्धी व्यवस्था पुनरावलोकन गरिने कुरा सकारात्मक रहेको केसीको भनाइ छ । पछिल्लो समय चालु पुँजी कर्जा मार्गदर्शनको कारणले कर्जा जान समस्या भएको बेलामा परिर्वतन गर्ने कुराले कर्जा प्रवाहमा सकारात्मक प्रभाव पर्ने अपेक्षा लिएको उनको भनाइ छ ।

'चालु पुँजी कर्जालाई पुनरावलोकन गर्ने, शेयर धितो कर्जा, रियल स्टेट कर्जा तथा हायर पर्चेज कर्जाका विद्यमान जोखिम भारसम्बन्धी व्यवस्था पुनरावलोकन गरिने कुरा सकारात्मक छन्,' केसीले भने ।

केवाईसीलाई राष्ट्रिय परिचयपत्रसँग जोड्ने, बैंकिङ कसुरलाई संशक्त बनाएर लैजाने र कर्जा लगानीको फ्रेमवर्क बनाउने कुराले बैंकिङ क्षेत्रलाई सजिलो बनाउँने उनको भनाइ छ ।

'केवाईसीलाई राष्ट्रिय परिचयपत्रसँग जोड्ने, बैंकिङ कसुरलाई संशक्त बनाएर लैजाने र कर्जा लगानीको फ्रेमवर्क बनाउने कुराले बैंकिङ क्षेत्रलाई सजिलो बनाउँछ । निजी क्षेत्रमा कर्जा प्रवाह ११ प्रतिशतले वृद्धि गर्ने लक्ष्य छ । त्यो पनि पूरा हुने अवस्था छ,' केसीले भने, 'बैंकिङ नीतिगत दरलाई ६.५ प्रतिशतमा ल्याउँदा बैंकहरूको स्थायी तरलता सुविधा र नीतिगत दरमा ओभरनाइट तरलता ब्याजदरको कम हुने भएकाले बैंकको लागत कम हुन्छ । आर्थिक क्षेत्रलाई चलायमान बनाउनुपर्ने चुनौति पनि छ । बाँकी कार्यविधिहरू बनाउँदै जाँदा थाहा हुँदै जानेछ ।’

प्रकाशित मिति: आइतबार, साउन ७, २०८० २०:३४