मिति घोषणा नहुँदै भारतमा आमचुनावको तयारीमा जुटे दलहरू, एनडीए भर्सेस इन्डिया मैदानमा

मिति घोषणा नहुँदै भारतमा आमचुनावको तयारीमा जुटे दलहरू, एनडीए भर्सेस इन्डिया मैदानमा

A+ A A-

दक्षिणी छिमेकी मुलुक भारतमा आमचुनावको मिति घोषणा भइसकेको छैन, तर दलहरूले चुनावी तयारी भने सुरु गरिसेका छन् । २०२४ मा भारतमा आमचुनाव हुनेछ । भारतीय लोकसभामा ५४५ सिटका लागि हुने चुनावको तयारीमा दलहरू जुटिसकेका छन् ।

गठबन्धन चुनाव लड्ने प्रचलन रहेको भारतमा आगामी चुनाव पनि गठबन्धनबीचमै प्रतिस्पर्धा हुने स्पष्ट देखिएको छ । अहिलेको सत्तारुढ गठबन्धन नेसनल डेमोक्र्याटिक अलायन्स (एनडीए) र विपक्षी दलहरूको गठबन्धन इन्डियन नेसनल डेभलप्मेन्ट इन्क्लुसिभ अलाइन्स (आईएनडीआईए) बीच चुनावी प्रतिस्पर्धा हुने भएको हो ।

यसै साता दक्षिण भारतको बेंगलरुमा २६ वटा विपक्षी दलहरूको बैठक बसेर गठबन्धनको नामसमेत तय गरेका छन् । उनीहरूले गठबन्धनको नाम इन्डिया राखे । यो गठबन्धनको अगुवाई कांग्रेस आईले गरे पनि यसको प्रेरक भने बिहारका मुख्यमन्त्री जनता दल यूनाइटेडका मुखिया नितिश कुमारले गरेका हुन् । विपक्षी दलहरूलाई एक मञ्चमा ल्याउनुअघि उनले देशका विभिन्न राज्यमा पुगेर विपक्षी दलका नेताहरूसँग छलफल गरेका थिए ।

२०१४ देखि भारतमा भाजपा नेतृत्वको सरकार छ । नरेन्द्र मोदी नेतृत्वको यो सरकारले भारतमा लोकतन्त्र समाप्त पारेको आरोपसहित विपक्षीहरू एकजुट भएका छन् । विपक्षीहरूको गठबन्धनमा चारवटा राज्यमा मुख्यमन्त्री रहेको कांग्रेस आई, दुई राज्यमा मुख्यमन्त्री रहेको अरविन्द केजरिवालको आम आद्मी पार्टी, बिहारको सत्तारुढ पार्टी जनता दल यूनाइटेड र आरजेडी, पश्चिम बंगाललको सत्तारुढ ममता बेनर्जीको टीएमसी, झारखण्डको सत्तारुढ दल, केरलको सत्तारुढ दल, उत्तरप्रदेशको प्रभावशाली दल समाजवादी दल, तामिलनाडुको सत्तारुढ दल डीएमके, शरद पवारको राष्ट्रवादी कांग्रेस, उद्धव ठाकरेको शिवसेना, अन्य क्षेत्रीय दलहरू र कम्युनिस्ट दलहरू छन् ।

यी दलहरूको मुख्य आधार क्षेत्र हेर्दा दिल्ली, पञ्जाव, पश्चिम बंगाल, बिहार, हिमाचल प्रदेश, झारखण्ड, मध्यप्रदेश, छत्तिसगढ, राजस्थान, कर्नाटक, तामिलनाडु, केरल, महाराष्ट्र र उत्तरप्रदेशमा देखिन्छ ।

बेंगलरुमा भएको विपक्षी गठबन्धनको बैठकले गठबन्धनको नाम मात्र तय गरेको छैन, सिट बाँडफाँटबारे पनि मापदण्ड बनाएको छ । गठबन्धन सञ्चालनका लागि सचिवालय बनाएको छ । र यो गठबन्धनले आक्रामक प्रचार अभियान पनि सुरु गरिसकेको छ । भलै यो गठबन्धनबाट प्रधानमन्त्रीको उम्मेदवार भने तय गरिएको छैन ।

बेंगलरुमा विपक्षी दलहरूको जमघट चलिरहेका बेला दिल्लीमा सत्ता गठबन्धनको पनि बैठक भयो । यो गठबन्धनमा ३८ दल रहेको बताइन्छ । यो गठबन्धनको अगुवाई भारतीय जनता पार्टीले गरेको छ । र मोदी नै आगामी प्रधानमन्त्रीका उम्मेदवार पनि हुन् । यो गठबन्धनमा भाजपा ठूलो दल हो भने अन्य साना साना क्षेत्रीय दलहरू छन् । भाजपा नै दक्षिण भारतबाहेकका राज्यहरूमा प्रभावशाली पार्टी हो । यो गठबन्धन विपक्षीहरूको जस्तो सबैको समान सहभागिता रहेको गठबन्धन होइन । यो भाजपा हावी रहेको गठबन्धन हो ।

दुई ठूला गठबन्धनबीच प्रतिस्पर्धा हुने देखिए पनि केही यस्ता क्षेत्रीय दलहरू छन् जो कुनै पनि गठबन्धनमा छैनन् । र यी दलहरूको ती राज्यहरूमा राम्रो प्रभाव पनि रहेको छ । आन्द्रप्रदेशको वाईएसआर कांग्रेस, तेलंगाका केसीआर, मिजरोमका नविन पटनायक, पञ्जावको शिरोमणी अकाली दल र उत्तर प्रदेशकी मायवती कुनै गठबन्धनमा छैनन् । यी दलहरूको आ आफ्नो प्रदेशमा चुनावी नतिजा फरक पार्न सक्ने क्षमता छ । विभिन्न एजेन्सीकाे सहयाेमा

प्रकाशित मिति: शुक्रबार, साउन ५, २०८० १३:०१