केशव बुढाथोकीलाई उद्धव थापाको जवाफ– मलाई मुख्यमन्त्री नमाने हुन्छ

A+ A A-

नेपाली कांग्रेस झापाको विवादले केन्द्रीय सदस्यमा प्रवेश पाएको छ । जारी केन्द्रीय समितिमा धारणा राख्दै कोशी प्रदेशका मुख्यमन्त्री एवं प्रदेश सभापति उद्धव थापाले अर्का केन्द्रीय सदस्य केशव बुढाथोकीमाथि कारबाहीको माग गरेका छन् ।

बुधबारको बैठकमा केन्द्रीय सदस्य केशवकुमार बुढाथोकीले कांग्रेस नेतृत्वकै कोशी प्रदेश सरकारको आलोचना गरेका थिए । त्यसपछि बिहीबार मुख्यमन्त्री उद्धव थापा उनीविरुद्ध खनिएका हुन् ।

बुढाथोकीलाई जवाफ दिने क्रममा सर्वोच्च अदालतको अन्तरिम आदेशबाट दीर्घकालीन प्रभाव पार्ने काम गर्न नसक्ने अवस्थामा पुगेको कोशी सरकारका मुख्यमन्त्री थापाले कार्यकर्तामा उत्साह जगाएको अवस्थामा नेताहरूले निराशा पैदा गर्न नहुने बताए ।

‘कोशीमा कांग्रेसको सरकार बन्दा उत्साह आएको छ । गाउँगाउँका कार्यकर्तामा उत्साहको लहर देखिएको छ’, उनले भने, ‘तर हाम्रै नेता केशव बुढाथोकीले हिजो कोशीको सरकारविरुद्ध बोलेको सुनेँ । म अदालतमा जवाफ दिन गएको थिएँ तर यता हाम्रै नेताबाट आलोचना गर्ने काम भएछ ।’

थापाले बुढाथोकीले गत मंसिरको चुनावमा पार्टीलाई नसघाई भागेर अस्ट्रेलिया गएको आरोप पनि लगाएका छन् ।

‘बुढाथोकीजी चुनावको मुखमा भागेर अस्ट्रेलिया गए । झापा २ का हाम्रा उम्मेदवार हराउन लागे,’ उनले भने, ‘गठबन्धनका उम्मेदवारलाई भोट नदेऊ भनेर म्यासेज र फोन गरे । झापा २ का हाम्रा उम्मेदवार देउमान थेबेलाई भोट नदेऊ भनेका छन् । हामीसँग प्रमाण छन् ।’

थापाले कार्यकर्तालाई भोट नहाल्न भनेको प्रमाण रहेको बताए । ‘यस्ता नेता कार्यकर्तालाई कारबाही हुनुपर्छ। उहाँ (बुढाथोकीले) गठबन्धनलाई हराउन फोन गर्नुभएको छ । पार्टीका कार्यकर्तालाई भोट नहाल भन्नुभएको प्रमाण छ ।’

थापाले आफूलाई मुख्यमन्त्री नमान्न पनि बुढाथोकीलाई चुनौती दिए । ‘तपाईंले हिक्मत कार्की (निर्वतमान मुख्यमन्त्री) लाई मुख्यमन्त्री माने हुन्छ’, उनले भने, ‘तर उद्धव थापालाई मुख्यमन्त्री नमाने हुन्छ ।’

प्रकाशित मिति: बिहीबार, साउन ४, २०८० १२:४९