पशुपति परिसरमा राप्रपा सांसदकाे हिंसा भड्काउने अभिव्यक्ति- सिंहदरबारअगाडि अचानोमा काट्‌नुपर्छ (भिडियाेसहित)

पशुपति परिसरमा राप्रपा सांसदकाे हिंसा भड्काउने अभिव्यक्ति- सिंहदरबारअगाडि अचानोमा काट्‌नुपर्छ (भिडियाेसहित)

A+ A A-

गलामा रुद्राक्षको माला । काँधमा ‘रामराम’ लेखिएको गम्छा । उनी उभिएका छन्, पशुपतिनाथ मन्दिर परिसरभित्र । र, भनिरहेका छन्, 'सिंहदरबारअगाडि अचानोमा राखेर मान्छेलाई काटिदिनुपर्छ ।'

यस्तो भनिरहँदा उनका अगाडि क्यामेराहरू छन् । अर्थात् मिडियासामु उनी मान्छेलाई काट्ने कुरा गर्दैछन् ।

लाग्छ, कुनै ‘फ्रस्ट्रेटेड’ नागरिक गैरजिम्मेवार नेतृत्वप्रतिको आक्रोश चिया पसल वा रक्सी भट्टीमा ओकलिरहेको छ । तर, यति अराजक र अमर्यादित अभिव्यक्ति दिने व्यक्ति कुनै दिक्क भएकाे सर्वसाधारण नभएर राष्ट्रिय प्रजातन्त्र पार्टीका ६५ वर्षे सांसद दीपकबहादुर सिंह हुन् । र, उनी त्यही राप्रपाका सांसद हुन्, जाे धर्मकाे एजेन्डामा राजनीति गरिरहेका छन् ।

त्यही पार्टीका सांसद सिंह पशुपतिनाथ मन्दिर परिसरमा उभिएर भन्दैछन्, ‘माधव र बाबुरामजीलाई त पाता कस्नुपर्छ । खै के नापे यिनीहरूले । नेपालीको निधारमा भुटानी बनाईकन अमेरिका पठाइदिनका लागि । साँच्चै भन्दा जेल हाल्ने होइन, निर्दोष फस्न हुन्न । दोषी जो-जो छन्, तिनीहरूलाई जेलमा थुन्ने होइन, तिनीहरूलाई त सिंहदरबारअगाडि अचानोमा काट्नुपर्छ ।’

पुरानो नेतृत्वको कार्यशैलीप्रति प्रायः जनता निराश र आक्रोशित छन् । त्यसैले उनीहरू नेतृत्वसँग जाेडिएका विषयमा जति उत्तेजक, जति निर्मम अभिव्यक्ति सुन्छन्, आवेग मत्थर भएको ठान्छन् । त्यसैले ‘मान्छे मारौँ’ भन्ने हिंस्रक भनाइको समेत प्रशंसा गर्न थाल्छन् । यही लोभमा घृणा र अतिवादको भर्‍याङ चढेर राजनीतिमा आउने 'अटेन्सन सिकर'हरू मनलाग्दी बोल्दै हिँड्ने गरेका छन् । यस्तो प्रवृत्तिले समाजलाई भँड्खालोतिर तानिरहेको भन्दै समाजशास्त्रीहरूले चिन्ता जनाउँदै आएका छन् ।

सांसद सिंह ऐन, कानुन बनाउने ठाउँमा छन् । उनलाई थाहै हुनुपर्छ, जस्तोसुकै अपराधमा पनि नेपालमा मृत्युदण्ड दिने कानुन छैन । संविधानको भाग ३ को 'मौलिक हक र कर्तव्य' धाराअन्तर्गत ‘सम्मानपूर्वक बाँच्न पाउने हक’ को दोस्रो बुँदामा ‘कसैलाई पनि मृत्युदण्डको सजाय दिनेगरी कानुन बनाइने छैन’ भनेर प्रस्टसँग लेखिएको छ । नेपालले अन्तर्राष्ट्रिय मञ्चमा समेत मान्छेको जीवनलीला नै समाप्त गरिदिने सजायको विपक्षमा प्रतिबद्धता जनाएको छ । तर, लोक रिझ्याइँका लागि सांसद सिंहले वर्तमान नेतृत्वप्रति निराश जमातलाई थप भड्काउने अभिव्यक्ति दिएका छन् ।

यसबारे हामीले सिंहलाई फाेन गरेर सोध्यौँ, ‘सांसदका रूपमा तपाईंले त्यस्ताे भन्न मिल्छ ?’

उनले जवाफ दिए, ‘पदको दुरुपयोग गरेर नेपालीलाई नक्कली भुटानी शरणार्थी बनाउनेहरूलाई ए क्लासको कैदी बनाएर सुविधा दिएर राख्नुको सट्टा नियम संशोधन गरेर फाँसी दिनुपर्छ भन्न खोजेको हुँ ।’

उनले भनेको विषयमा नियम होइन, संविधान नै संशोधन गर्नुपर्छ । यसो गर्न संसदको दुईतिहाइ मत आवश्यक पर्छ । जबकि अहिले राप्रपासँग जम्माजम्मी १४ सिट मात्र छ ।

तैपनि, सार्वजनिक भिडियोमा उनले भनेजस्ताे संविधान संशोधनको कुरा गरेका छैनन् ।

‘तपाईंको मुखबाट मान्छे काट्नुपर्छ भनेको कुरा सुहायो त ?,’ हामीले अर्को प्रश्न गर्‍यौँ ।

उनले भने, ‘अति भइसक्यो नि त । अन्तर्राष्ट्रियस्तरमा देशको बदनाम गरे ।’

‘देशमा मृत्युदण्डकाे कानुन छ र ?,’ उनलाई फेरि हामीले सोध्यौँ ।

सिंहले फेरि उही जवाफ दिए, नियम संशोधन गरेर फाँसीको सजाय ल्याउनुपर्छ भन्ने आशयमा आफूले त्यस्तो बोलेको भनेर । तर, संसदमा बोल्ने क्रममा उनले कहिल्यै मृत्युदण्डका लागि संविधान संशोधनको कुरा उठाएकाे सुनिएको छैन । यसको अर्थ लोक रिझ्याइँका लागि उनले यस्तो अभिव्यक्ति दिएका हुन् ।

एकातिर, राप्रपाकै प्रमुख सचेतक ज्ञानबहादुर शाही कुनै पनि बहानामा हिंसा अस्वीकार्य छ भन्दै हिँडेका छन् । अर्कातिर उनकै पार्टीका सांसद सिंह ‘मान्छेलाई अचानाेमा काट्ने’ भनिरहेका छन् ।

'अमर्यादित अभिव्यक्ति'

राष्ट्रिय मानवअधिकार आयोगका सहप्रवक्ता उपसचिव श्यामबाबु काफ्लेले सांसदबाट आएको उक्त अभिव्यक्ति गैरजिम्मेवार र भड्किलाे रहेको बताए ।

‘संसारमाझ उभिएर नेपालले मृत्युदण्डको विरोध गरेको छ, सम्मेलनहरूमा मृत्युदण्डको विपक्षमा प्रतिबद्धता जनाएको छ । संविधानले पनि यस्ताे दण्ड अस्वीकार गरेको छ । यस्तोमा सांसदले नै हिंसालाई प्रश्रय मिल्ने गरी अभिव्यक्ति दिनु सरासर गलत छ,’ आयोगका सहप्रवक्ता काफ्लेले शिलापत्रसित भने ।

राप्रपा नेता सिंह मकवानपुर निर्वाचन क्षेत्र नम्बर १ बाट निर्वाचित सांसद हुन् । चुनाव जित्दाका बखत मन्त्री नबन्ने दाबी गरेका उनी राप्रपा सरकारमा हुँदा सबैभन्दा अन्तिम वरीयताको राज्यमन्त्री बन्न तयार भएका थिए ।

प्रकाशित मिति: बुधबार, साउन ३, २०८० १२:५८