रोनाल्डो भन्छन्– मेस्सी आबद्ध अमेरिकी लिगभन्दा साउदी लिग नै उत्तम (भिडियो)

A+ A A-

फुटबल इतिहासमा विश्वकप विजेता लियोनल मेस्सी र युरोकप विजेता क्रिस्टियानो रोनाल्डोबीचको प्रतिस्पर्धालाई विश्वभर खुबै रुचाइयो । त्यसमाथि जब मेस्सी र रोनाल्डो स्पेनमा थिए, उनीहरूबीच कसले धेरै गोल हान्ने, कसले धेरै बालुन डि’ओर र गोल्डेन बुट साथै विभिन्न लिगहरू जित्ने भन्ने होड नै चल्थ्यो ।

अझै पनि मेस्सी र रोनाल्डो भन्नेबित्तिकै फुटबलपारखीले बार्सिलोना र रियल मड्रिडमा हुँदाको प्रतिस्पर्धालाई सम्झन्छन् । अहिले रोनाल्डो ३८ वर्षका भए, उनी साउदी क्लब अल–नासरबाट खेल्छन् भने ३६ वर्षका मेस्सी अमेरिकी क्लब इन्टर मायामीबाट खेल्छन् ।

अहिले रोनाल्डो र मेस्सी एउटै लिगमा छैनन्, उनीहरू युरोपमै छैनन् । यद्यपि उनीहरू वाकयुद्धमा भने देखिएका छन् । हालै मेस्सीले आफूले पैसा चाहेको भए साउदी क्लब अल–हिलाल अनुबन्ध हुन्थेँ भन्ने प्रतिक्रिया दिएका थिए । पैसा आफ्नो प्राथमिकता नभएका कारण आफूले अमेरिका छनोट गरेको उनको भनाइ थियो । उनलाई अल–हिलाले हरेक वर्ष ५०० मिलियन अमेरिकी डलरको प्रस्ताव गरिएको थियो ।

यतिबेला रोनाल्डोले पनि मेस्सीलाई इंगित गर्दै अमेरिकी मेजर लिग सक्करभन्दा साउदी प्रो लिग धेरै उत्तम र प्रतिस्पर्धात्मक भएको अभिव्यक्ति दिएका छन् । हालै पोर्चुगलमा अल–नासर र स्पेनिस क्लब सेल्टा भिगोबीच प्रतिस्पर्धा भएको थियो । सो खेलमा रोनाल्डोको क्लब ५–० ले पराजित भएको थियो ।

(भिडियो)

उक्त खेल सकिएपछि पत्रकारहरूले रोनाल्डोलाई मेस्सीसँगै अमेरिकी क्लब जाने इच्छा छ कि छैन भनेर सोध्दा उनले जवाफमा भनेका छन्, ‘साउदी प्रो लिग एमएलएसभन्दा उत्कृष्ट छ । अब मेरो अमेरिकामा खेल्ने कुनै योजना छैन र युरोपेली फुटबलमा पनि फर्किंदिनँ ।’

उनका अनुसार युरोपेली लिगहरूले गुणस्तर गुमाइसकेका छन्, जसका कारण उनी युरोपेली लिगमा फर्किने छैनन् । तर, उनले युरोपेली लिगमध्ये प्रिमियर लिग भने निकै गुणस्तरीय रहेको र यो लिग संसारकै उत्कृष्ट भएको बताए ।

रोनाल्डोले आफू साउदी प्रो लिगमा आबद्ध भएपछि विश्वचर्चित अन्य खेलाडीहरू पनि साउदी आउन थालेको बताएका छन् । रोनाल्डो साउदी गएसँगै करिम बेन्जेमा, मार्सेलो ब्रोजोभिक, एन्गोलो कान्टे र रोबर्टो फर्मिनोलगायतका हाई प्रोफाइल खेलाडीहरू साउदी प्रो लिग आबद्ध भएका छन् । ईएसपीएनको सहयोगमा

प्रकाशित मिति: मंगलबार, साउन २, २०८० १९:२८