कांग्रेसमा वरिष्ठ नेता को ?

फाइल तस्वीर

A+ A A-

नेपाली कांग्रेसकाे विधानले पार्टी वरिष्ठ नेता चिन्दैन । तर पनि नेताको सम्मानमा कांग्रेसमा वरिष्ठ नेताको उपाधि दिइन्छ । सार्वजनिक कार्यक्रममा विशेष महत्त्व दिइन्छ । पार्टीको औपचारिक कार्यक्रममा सभापतिको दायाँतर्फ उपसभापति र बायाँतर्फ वरिष्ठ नेताको आसन ग्रहण गराइन्छ ।

रामचन्द्र पौडेल गतवर्षको चैत २५ गते राष्ट्रपति निर्वाचितअगाडिसम्म पार्टीको वरिष्ठ नेता थिए । उनलाई पार्टी मुख्यालयमा छुट्टै कोठा उपलब्ध थियो । त्यसयता पार्टीमा अहिले वरिष्ठ नेताकाे याे मानार्थ पद रिक्त छ ।

साेही पदमा संस्थापनइतर समूहले नेता डा शेखर कोइरालालाई सार्वजनिक कार्यक्रममा सम्बोधन गर्दै आएकाे छ । १४औँ महाधिवेशनमा सभापतिमा पराजित शेखरलाई निकै ढिला पार्टी मुख्यालयमा कोठा दिइयो । त्यसको उपयोगसमेत शेखरले गर्न आवश्यक ठानेका छैनन् ।

अहिले कांग्रेसमा अनौपचारिक वरिष्ठ नेता बन्ने दौडमा नेता गोपालमान श्रेष्ठ पनि छन् । संस्थापनइतर समूहले शेखरलाई वरिष्ठ नेता माने पनि कोइराला परिवारबाट शेखरलाई वरिष्ठ नेता बन्न नदिन पूर्वमहामन्त्री शशांक कोइराला लागेको स्रोत बताउँछ ।

सोमबारको पदाधिकारी तथा पूर्वपदाधिकारी बैठकमा शशांकले तत्कालै सभापति शेरबहादुर देउवाले वरिष्ठ नेता घोषणा गर्नुपर्ने प्रस्ताव गरेकाे बैठकमा सहभागी एक संस्थापन पक्षका नेताले बताए । ती नेताका अनुसार शशांकको प्रस्तावमा महामन्त्री विश्वप्रकाश शर्मा, सहमहामन्त्री भीष्म आङदम्बे, फर्मुल्लाह मन्सुरलगायतका नेताहरूको समर्थन थियो । तर, सभापति देउवाले यस विषयमा केही भनेन् ।

कांग्रेस विभाजित भएर कांग्रेस प्रजातान्त्रिक गठन हुँदा सभापति देउवालाई कार्यबाहक सभापति रहेर देउवालाई सघाएका थिए श्रेष्ठले । उनी आफैँ वरिष्ठ नेताको आकांक्षी रहेको नेताहरू बताउँछन् ।

361670242_217136917978197_3655469304853802349_n1689659921.jpg

रामचन्द्र पौडेल राष्ट्रपति निर्वाचित हुनु अगाडि कांग्रेस केन्द्रीय समिति बैठकमा पौडेलसँगै गोपालमान श्रेष्ठ ।

केन्द्रीय समिति बैठकमा सभापति देउवाको बायाँपट्टि तत्कालीन वरिष्ठ नेता पौडेल रहन्थे भने त्यसपछि श्रेष्ठको आसन हुन्थ्यो । उनी गत वर्षको मंसिरमा भएको संघीय चुनावमा निर्वाचन परिचालनसमित संयोजकसमेत हुन् ।

‘अहिलेसम्म पार्टीको निर्णय मान्दै आएको छु । मेरो योगदान पार्टीमा के कस्तो छ, सबैलाई थाहा छ । वरिष्ठ नेता पार्टीले बनाउनुपर्छ भन्दा हुन्न भन्दिनँ । नबनाए पनि मेरो भन्नु केही छैन,’ नेता श्रेष्ठले शिलापत्रसँग भने ।

प्रकाशित मिति: मंगलबार, साउन २, २०८० ०८:१५