स्थानीय सरोकारवाला भन्छन्– बूढीगण्डकीको शिलान्यास होइन, साइनबोर्ड मात्र फेर्न लागिएको हो

स्थानीय सरोकारवाला भन्छन्– बूढीगण्डकीको शिलान्यास होइन, साइनबोर्ड मात्र फेर्न लागिएको हो

A+ A A-

सरकारले छिट्टै बुढीगण्डकी जलविद्युत् आयोजनाको शिलान्यास गर्ने बताइरहेका बेला स्थानीयले भने आशंका व्यक्त गरेका छन् । उनीहरूले यो आयोजनाको शिलान्यास नभई साइन बोर्ड मात्र फेरिन लागेको बताएका छन् ।

बुढीगण्डकी जलविद्युत् आयोजना राष्ट्रिय सरोकार समितिका हरेराम ढकाल र बुढीगण्डकी जलाशययुक्त आयोजना सरोकार समितिका अध्यक्ष दिनेशकुमार ढकालले संयुक्त विज्ञप्ति जारी गर्दै अहिलेकै अवस्थामा यो आयोजना बन्नेमा आशंका व्यक्त गरेका छन् ।

उनीहरूले भनेका छन्, ‘बुढीगण्डकी जलविद्युत् कम्पनीको कार्यालय स्थापना गरिनु आयोजना निर्माण सुरु भएको अर्थमा प्रचार गर्न खोजिएको छ, तर हामीले यस घटनालाई राजनीतिक नेतृत्वले सर्वसाधारणमाथि छरेको भ्रमको रूपमा मात्र बुझेका छौँ । हाम्रो नजरमा सरकारले बेनिघाटस्थित बुढीगण्डकी वातावरण, मुआब्जा, पुनर्बास तथा पुनर्स्थापना इकाइ नामक कार्यालयको नाम परिवर्तन मात्र गर्न लागेको हो, साइनबोर्ड परिवर्तनले मात्र आयोजना निर्माण सुनिश्चित हुन सक्दैन ।’

उनीहरूका अनुसार बुढीगण्डकी आयोजनाको नाममा हुन लागेको यो तेस्रो साइनबोर्ड परिवर्तन हो । २०६९ मंसिरमा बुढीगण्डकी जलविद्युत् आयोजना विकास समिति स्थापना गरिएको थियो । २०७३ सालमा त्यस कार्यालय खारेज गरी त्यही ठाउँमा बुढीगण्डकी वातावरण, मुआब्जा, पुनर्बास तथा पुनार्स्थापना इकाइ स्थापना गरियो । अहिले फेरि इकाइ कार्यालयको साइन बोर्ड परिवर्तन गरेर बुढीगण्डकी जलविद्युत् कम्पनी बनाउन खोजिएको छ ।

विज्ञप्तिमा भनिएको छ, ‘बुढीगण्डकी आयोजनाको विस्तृत परियोजना प्रतिवेदन (डीपीआर) तयार भएको पनि ७ वर्ष भइसक्यो । त्यसलगत्तै सुरु गरेको भए आयोजना निर्माणको काम अन्तिम चरणमा पुगिसक्थ्यो । तर, राजनीतिक अभीष्ट पूरा गर्न कहिले आयोजना निर्माणको जिम्मा चिनियाँ कम्पनीलाई दिने, फेरि फिर्ता लिने, फेरि दिने र फेरि फिर्ता लिने शृङ्खला चलाइयो । आयोजनाबाट राजनीतिक लाभ लिइरहने तर निर्माण अघि नबढाउने प्रवृत्ति हामीलाई स्वीकार्य छैन ।’

कम्पनी कार्यालय स्थापना मात्र आयोजना निर्माण सुरु गर्न पर्याप्त नभएको उनीहरूले बताएका छन् । बुढीगण्डकी जलविद्युत् कम्पनी स्थापना गर्दा कबोल गरिएको पुँजीसमेत सरकारी निकायले पूरा गर्न नसकेको उनीहरूको भनाइ छ । उनीहरूले भनेका छन्, ‘आयोजना बनाउन लगानीको स्रोत कसरी जुटाउने र लगानीको प्रतिफल के कति हुने, स्थानीयको स्वामित्व कसरी रहनेजस्ता विषय प्रस्ट छैनन् । बुढीगण्डकी निर्माण यही कम्पनीले नै गर्नेमा पनि हामीलाई आशंका छ ।’

आयोजनको मोडालिटी र मुआब्जाबारे निर्णय नभई यो आयोजना निर्माण हुन नसक्ने सरोकारवालाको भनाइ छ ।

प्रकाशित मिति: सोमबार, साउन १, २०८० १६:२६