लोकल भैँसीको दूधलाई ब्राण्डिङ गरी महँगोमा बेच्ने याेजना, रिस्मी गाउँका किसानले यसाे गर्न थाले

लोकल भैँसीको दूधलाई ब्राण्डिङ गरी महँगोमा बेच्ने याेजना, रिस्मी गाउँका किसानले यसाे गर्न थाले

A+ A A-

बागलुङको गलकोट नगरपालिका–९ रिस्मी गाउँमा स्थानीय जातका भैँसीलाई संरक्षण गर्ने उद्देश्यले जिल्लास्थित भेटेरेनरी अस्पताल तथा पशु विज्ञ केन्द्रले ‘गोठ सुधार कार्यक्रम’ सम्पन्न गरेको छ ।

स्थानीय जातको भैँसी संरक्षणसँगै उत्पादित दूधको बजारीकरण गर्ने लक्ष्य अनुसार यसै वर्ष चिस्यान केन्द्र निर्माण गरिनुका साथै ‘गोठ सुधार कार्यक्रम’ सम्पन्न गरिएको केन्द्रले जनाएको छ । पछिल्लो समय आयातित भैँसीका जात भित्रिदा स्थानीय लिमि र पाराकोटे जातका भैँसी लोप हुने खतरा बढेको भन्दै रिस्मी गाउँमा स्थानीय जातका भैँसी संरक्षण अभियान थालिएको केन्द्रका प्रमुख डा. ऋषिराम सापकोटाले बताए ।

केन्द्रले स्थानीय जातका भैँसी संरक्षणका लागि किसानका लागि बर्सेनि प्रोत्साहनका कार्यक्रम ल्याउने तयारी गरिरहेको जनाएको छ । स्थानीय थोमलाल सापकोटाको घरमा स्थानीय जातको दुई वटा भैँसी छन् । उनले एउटा भैँसीको दूध घरमै खपत गरेपनि अर्को भैँसीको दूध सहकारीमा बिक्री गर्छन् ।

उनीजस्ता ३७ किसानको दूध सहकारीले सङ्कलन गरेर बजारीकरण गर्दै आएको छ । २०७४ सालमा थापना भएको गलकोट कृषि सहकारी संस्थाले स्थानीय जातका भैँसीबाट उत्पादित दूध दैनिक सङ्कलन गरेर बजारीकरण गर्दै आएको हो । सहकारीले दूधको बजारीकरण गर्दा सहज भएको सापकोटाले बताए ।

गाउँमा आयातित जातका भैँसीको सङ्ख्या कम रहेकाले स्थानीय जातका भैँसी पालनमा किसानको जोड छ । दूधको बजारीकरण गर्नुका साथै स्थानीय जातको भैँसी संरक्षण अभियानमा भेटेरेनरी अस्पताल तथा पशु विज्ञ केन्द्रसँग समन्वय गरी किसानलाई प्रोत्साहन गरिरहेको सहकारीका अध्यक्ष पुरुषोत्तम सापकोटाले जानकारी दिए ।

'दैनिक ४७ शेयर सदस्य किसानको दूध बजारमा पठाउँदै आएका छौँ । दैनिक एक सय ५० लिटरदेखि तीन सय लिटरसम्म दूध बजारीकरण सहकारीमार्फत खपत हुन्छ,' उनले भने ।

रिस्मी गाउँमा स्थानीय जातका भैँसीलाई प्रोत्साहन गरिएको भन्दै सापकोटाले यहाँ स्थानीय जातका लिमी र पाराकोटे भैँसी पालन भइरहेको जानकारी दिए । उनका अनुसार, स्थानीय जातको भैँसीबाट कम दूध उत्पादन भए पनि ‘ब्राण्ड’ बनाएर महङ्गोमा बिक्री गर्ने सहकारीको लक्ष्य छ ।

गलकोट नगरपालिकाको ९ लाख रुपैयाँ र गलकोट कृषि सहकारीको ३ लाख ८६ हजार गरी कूल १२ लाख ८६ हजार रुपैयाँमा दूध सङ्कलन केन्द्र तथा चिस्यान घर निर्माण गरिएको नगरपालिकाका कृषि शाखा प्रमुख हरिदत्त सुवेदीले जानकारी दिए । यहाँ स्थानीय जातका भैँसीबाट उत्पादित दूधको ब्राण्ड बनाउन सके महङ्गोमा बिक्री गर्न सकिने उनकाे भनाइ छ ।

उनले दूध महङ्गोमा बिक्री गर्नाका लागि किसानलाई स्थानीय जातका भैँसी पाल्न प्रोत्साहनस्वरुप चिस्यान केन्द्र निर्माण गरिएको बताए । आयातित भैँसीका जात भित्रिदा स्थानीय जातका भैँसी लोप हुने खतरा बढेको भन्दै गाउँमा स्थानीय जातका भैँसीबाट उत्पादित दूध बजारीकरण गर्दै किसानलाई आत्मनिर्भर बनाउने लक्ष्य लिइएको केन्द्रका प्रमुख डा सापकोटाले बताए ।

उनले आयातित जातका भैँसी भन्दा स्थानीय जातका भैँसीमा रोगको सङ्क्रमणसमेत कम हुने बताउँदै स्थानीय जातका भैँसीलाई समेत संरक्षण गर्न आवश्यक रहेको भनाइ राखे । 'स्थानीय जातबाट उत्पादित दूधको गुणस्तर बढी हुन्छ, दूधलाई व्यावसायिक रूपमा बजारीकरण गर्न सके किसानलाई राहत हुन्छ' सापकोटाले भने ।

स्थानीय जातको भैँसी संरक्षणका लागि केन्द्रले ३० किसानको गोठ सुधारका लागि आर्थिक वर्ष २०७९/८० मा आठ लाख रुपैयाँ अनुदान प्रदान गरेको उनले जानकारी दिए । 'स्थानीय जातको भैँसीको विषयमा अध्ययन तथा अनुसन्धान गर्न समेत रिस्मी गाउँलाई उदारणका लागि लिनसक्ने बनाउने हाम्रो लक्ष्य हो', उनले भने ।

गत वर्षको रिस्मी गाउँका ४७ किसानको दूध सङ्कलन र बजारीकरणबाट सहकारीमार्फत ३७ लाख रुपैयाँको दूध बिक्री भएको गलकोटस्थित कृषि सहकारीले जनाएको छ । यहाँका २५ किसानले दुई वटा भैँसी पाल्दै आएका छन् भने अन्यले एउटाका दरले भैँसी पाल्दै आएका छन् । गण्डकी प्रदेशमा लिमी र पाराकोटे जातका भैँसी पाइने भए पनि आयातित जातका भैँसी भित्रिदा स्थानीय जातका भैँसी लोप हुने अवस्था आएको किसान बताउँछन् ।

प्रकाशित मिति: शनिबार, असार ३०, २०८० ०४:००