स्क्रव टाइफसको संक्रमणबाट कैलालीमा एक जनाको मृत्यु

A+ A A-

स्क्रव टाइफसको संक्रमणवाट कैलालीमा बिहीबार एक जनाको मृत्यु भएको छ । बिरामी भएपछि उपचारका लागि मायामेट्रो अस्पतालमा भर्ना भएका २० वर्षीय भरत खातीको आज अपरान्ह करिब ४ बजे मृत्यु भएको अस्पतालका डा. मोहन भट्टराईले जानकारी दिए । यही भदौ २१ गते अस्पताल भर्ना भएका उनको हाल आईसीयूमा उपचार भइरहेको र आज बिहीबार मृत्यु भएको अस्पतालले जनाएको छ ।

मुसा जातीमा पाइने एक प्रकारको परजीवी सुल्सुले किर्नामा यो रोगको किटाणु हुने र उक्त किर्नाले मानिसलाई टोकेमा स्क्रव टाइफसको संक्रमण हुने चिकित्सकले बताएका छन् ।

किर्नाले टोकेको ठाउँमा घाउ हुनु, शरीरमा बिमिरा देखिनु, अत्यधिक ज्वरो आउनु, शरीरका विभिन्न भाग दुख्नु यस रोगका लक्षण हुन् । समयमै रोग परीक्षण गरी उपचार गरेमा यो रोग निको हुने र शंका लाग्नेबित्तिकै अस्पताल जान स्वास्थ्यकर्मीले सुझाव दिएका छन् ।

स्क्रब टाइफस एक प्रकारको जीवाणु ‘रिकेटसया सुसुगामुसी’ ले संक्रमित सूक्ष्म कीरा (माइट) को टोकाइबाट फैलिन्छ । समयमै उपचार नगरे यसले मस्तिष्क, कलेजो, फोक्सो थुप्रै प्रकारको संक्रमण हुन्छ । यो कीरा मुख्यतया खेत, झाडी, घाँस आदि ठाउँमा रहने मुसा प्रजातिको जनावरमा पाइन्छ । यो रोग उत्पन्न गर्ने ब्याक्टेरिया संक्रमित मुसाको पेटभित्रका खाल्डाहरूमा बस्छ । माइट प्रायःजसो झाडी, खेतबारी, वनजगंल, घर वरपरको झाडी तथा घुरान हुने ठाँउमा देखिने गर्दछ ।

बच्ने उपाय

खेतबारीमा काम गर्दा, वनजगंल झाडीमा जाँदा तथा घाँस काट्न जाँदा पूरा शरीर ढाकिने कपडा लगाउने, सम्भव भए बुट लगाउने, घाँसबारी वा चौरमा बस्दा गुन्द्री वा दरी ओछ्याएर बस्ने, सम्भव भएसम्म भुइँमा नबस्ने, खाटमा वा अग्लो स्थानमा सुत्ने बस्ने, सकेसम्म घाँसबारी र चौरमा नबस्ने, चौर, बारी, घाँस तथा घुरान बढ्न नदिने, मुसा नियन्त्रणका लागि उपयुक्त किसिमले अन्न भण्डारण गर्ने तथा मुसाको वृद्धि विकास नहुने वातावरण सृजना गर्ने ।

प्रकाशित मिति: शुक्रबार, भदौ २७, २०७६ ०४:४०