जेनेभामा रोबोटको पहिलो पत्रकार सम्मेलन, भन्छ– मान्छेले भन्दा राम्रोसँग संसार चलाउन सक्छौँ (भिडियो)

जेनेभामा रोबोटको पहिलो पत्रकार सम्मेलन, भन्छ– मान्छेले भन्दा राम्रोसँग संसार चलाउन सक्छौँ (भिडियो)

A+ A A-

स्वीट्जरल्यान्डको जेनेभामा पहिलोपटक संसारका सबैभन्दा चलाख रोबोटहरूको पत्रकार सम्मेलन आयोजना भएको छ । सम्मेलनमा आर्टिफिसियल इन्टेलिजेन्स अर्थात् एआईबाट चल्ने रोबोटहरूको उपस्थिति थियो ।

सम्मेलनमा ३ हजार विज्ञहरूका साथमा ५१ रोबोट सहभागी भए भने नौवटा सबैभन्दा चलाख रोबोटले विज्ञहरू र पत्रकारले विभिन्न विषयमा गरेका प्रश्नको जवाफ दिए । अचम्मको कुरा त के छ भने सोफिया नामको रोबोटले मानिसले भन्दा राम्रो तरिकाले विश्व चलाउन सक्ने दाबीसमेत गर्‍यो ।

सोफियाले आफ्नो दाबी पुष्टि गर्न तर्कहरू पनि प्रस्तुत गर्‍यो । रोबोटहरूमा मानवीय भावना नरहने हुनाले रोबोटले सबै फैसलाहरू तथ्यमा आधारित भएर गर्ने बतायो ।

मानिसको स्वास्थ्य र बायो टेक्नोलोजीमा काम गर्नका लागि बनाइएको रोबोट एडाले आफूहरूले मानिसको आयुलाई १५० देखि १८० वर्षसम्म बढाउन सक्छौँ भनेर पनि दाबी गरेको थियो ।

यस्तै, रोबोट ग्रेस जो नर्सको पहिरनमा थियो । उक्त रोबोटले आफूहरूले मानिसविरुद्ध विद्रोह नगर्ने र मानिसको जागिर नखोस्ने, बरु विश्वव्यापी समस्या समाधान गर्न मद्दत गर्ने बतायो ।

जेनेभामा यो सम्मेलनको आयोजना गर्नुको मुख्य उद्देश्य जलवायु परिवर्तन, भोकमरीका साथै विश्वव्यापी समस्यामा रोबोटको भूमिकाका बारेमा विचार गर्ने रहेको थियो ।

(भिडियो)

बिल गेट्स र एलन मस्कदेखि चर्चित वैज्ञानिक स्टिफन हकिङले एआई मानिसका लागि खतरा भएको बताउँदै आएका थिए । तर अर्कातिर गुगल, फेसबकुलगायत विश्वका अधिकांश प्रविधि कम्पनी एआईमा अर्बौं डलर खर्च गर्दै आइरहेका छन् । चीन, रुस र अमेरिकाजस्ता देशका सरकार एआई प्रविधिमा शक्तिशाली बन्ने होडमा जुटेका छन् ।

यस्ता रोबोटको विषयमा वैज्ञानिकहरूको राय पनि भिन्नभिन्न खालका छन् । वैज्ञानिकको एक समूहले यसलाई मानिसको जिन्दगी बदल्ने तरिका भनेका छन् भने अर्को समूहले यो परमाणु बमभन्दा पनि भयानक हतियार भएको मान्छन् ।

सही ढंगबाट एआईमा आधारित रोबोटलाई प्रयोग गर्न सकेमा यस्ता रोबोटले वैज्ञानिक खोज र अनुसन्धानसँगै गाह्रो काममा धेरै मद्दत गर्न सक्ने पनि बताइन्छ ।

रोयटर्स र एजेन्सीको सहयोगमा

प्रकाशित मिति: सोमबार, असार २५, २०८० १७:०१