प्रहरी इन्काउन्टरमा मारिएका घैँटेकाे समूह फेरि सक्रिय, ठमेलका क्लब सञ्चालकमाथि आक्रमण (भिडियाे)

प्रहरी इन्काउन्टरमा मारिएका घैँटेकाे समूह फेरि सक्रिय, ठमेलका क्लब सञ्चालकमाथि आक्रमण (भिडियाे)

सानुभाइ भनिने युवराज गुरुङ ।

A+ A A-

पर्यटकीय क्षेत्र ठमेलमा पुनः गुण्डाराज सुरु भएको झल्को दिने घटना भएको छ । आपराधिक पृष्ठभूमि भएकाे एक समूहले क्लब ओम्नियाका सञ्चालकमाथि क्लबमै कुटपिट गरेको घटना सार्वजनिक भएको हो ।

नुवाकोट सूर्यगढी गाउँपालिका– १ का राजेन्द्र गुरुङलाई नुवाकोट ककनी– ५ का सानुभाइ भनिने युवराज गुरुङसहितको समूहले शुक्रबार राति २ बजे क्लबमै पुगेर कुटपिट गरेकाे हाे ।

युवराज गुरुङले कुटपिट गर्दै गरेको भिडियोसमेत सार्वजनिक भएको छ । युवराजले क्लबमा खाएकाे बिलसमेत नतिरेरै हिँड्ने गरेका थिए । लामो समय वैदेशिक रोजगारीपछि नेपाल फर्किएका राजेन्द्रले चार महिनाअघि मात्रै क्बल सञ्चालनमा ल्याएका थिए ।

सानुभाइकाे समूहले क्लबको भौतिक संरचनासमेत तोडफोड गरेका छन् ।

को हुन् युवराज गुरुङ ?

राजेन्द्र गुरुङलाई कुटपिट गर्ने युवराज गुरुङ विभिन्न आपराधिक घटनामा संलग्न हुँदै आएका आरोपी हुन् । उनी प्रहरीको इन्काउन्टरमा मारिएका नुवाकोटकै गुण्डा नाइके कुमार घैँटेका प्रमुख सहयोगी थिए ।

युवराजले यसअघि २०६७ सालमा नुवाकोटका निर्माण व्यवसायी अनिल श्रेष्ठलाई गोली प्रहार गरेका थिए । सो अभियोगपछि फरार रहँदै हिँडेका सानुभाइलाई २०७२ मा प्रहरीले बुलेटप्रुफ ज्याकेट लगाएर हिँडिरहेको अवस्थामै पक्राउ गरेको थियो ।

उनको साथबाट प्रहरीले लोड गरिएको पेस्तोलसमेत बरामद गरेको थियो । सानुभाइकै समूहले २०७८ सालमा नुवाकोट निवासी निर्माण व्यवसायी जितबहादुर कार्कीमाथिसमेत आक्रमण गरेको थियो ।

पछिल्लो समय अधिकांश गुण्डा नाइकेहरू आपराधिक गतिविधि छोडेर राजनीतिमा लागेका छन् । तर, सानुभाइले भने आपराधिक गतिविधि विस्तार गर्दै आएको खुलेको छ । उनी प्रहरी वृत्त सोह्रखुट्टेका प्रहरी अधिकारीसँगसमेत हिमचिम गर्दै आएका थिए । घटनापछि व्यवसायी राजेन्द्रले उनीविरुद्ध प्रहरीमा उजुरी दिएका छन् । हाल उनी फरार छन् ।

काठमाडाैंका एसपी सीताराम रिजालले साे घटनामा संलग्न रघु तामाङ र विनाेद तामाङलाई पक्राउ गरेर अनुसन्धान भइरहेकाे बताए । उनले युवराजसहित फरार रहेकाहरूकाे खाेजी भइरहेकाे बताए ।

भिडियाे हेर्नुहाेस् :

प्रकाशित मिति: आइतबार, असार २४, २०८० १२:२४