सत्तापक्ष नै असन्तुष्ट गण्डकीको बजेट बहुमतले पारित

फाइल तस्वीर ।

A+ A A-

गण्डकी प्रदेश सरकारको आगामी आर्थिक वर्षको बजेट प्रदेशसभाबाट बहुमतले पारित भएको छ ।

आर्थिक मामिलामन्त्री जीतप्रकाश आलेले गत असार १ मा प्रदेशसभामा प्रस्तुत गरेको ३३ अर्ब ४२ करोड ७२ लाख रुपैयाँको बजेट शुक्रबार बहुमतले पारित भएको हो ।

आफ्नो क्षेत्रमा बजेट नपरेको भन्दै सत्तापक्षकै सांसदले रोस्ट्रमबाटै असन्तुष्टि जनाएका थिए । गत असार १२ मा ऊर्जा र पर्यटन मन्त्रालयको बजेटमाथिको छलफलमा भाग लिँदै नेकपा माओवादी केन्द्रका सांसद हरिबहादुर भण्डारीले सम्बन्धित मन्त्रीमाथि कटाक्ष गरेर बजेटमा असन्तुष्टि जनाएका थिए ।

‘पर्यटनको विभिन्न सम्भावना बोकेको जिल्लामा दुईवटा मात्रै योजनामा बजेट विनियोजन गर्दिनुभएकोमा पर्यटनमन्त्रीलाई धेरै-धेरै धन्यवाद दिन चाहन्छु,’ उनले कटाक्ष गर्दै भनेका थिए, ‘मन्त्रीहरू रातभर जनता, प्रदेशका लागि सोच्नुहुन्छ होला भनेको त आफ्नो जिल्लामा, आफ्ना टोलमा, आफ्ना कुन कार्यकर्ता छुट्यो भनेर सोच्नुभएको रहेछ । बजेट पढ्दा मलाई त्यस्तो लाग्यो ।’

माओवादी केन्द्रबाट मन्त्री बनेकी सुशीला सिम्खडाले आफूहरूलाई बेवास्ता गरेको भन्दै कांग्रेस संसदीय दलको बैठकमा विरोध नै भएको थियो । प्रतिपक्षी नेकपा एमाले र राप्रपाले बजेटको वार्षिक विकास कार्यक्रम पुस्तिका आफूहरूले नपाउँदै गठबन्धनका कार्यकर्ताले पाएको भन्दै संसद अवरोध गरेर विरोध जनाएका थिए । अर्थमन्त्रीले त्यस्तो भएको भए छानबिन गर्ने प्रतिबद्धता जनाएपछि छलफल अघि बढेको थियो ।

आगामी आर्थिक वर्षको कुल बजेटमध्ये चालुतर्फ १२ अर्ब १३ करोड ६७ लाख रुपैयाँ (३८.१ प्रतिशत) र पुँजीगततर्फ २० अर्ब १९ करोड ६२ लाख रुपैयाँ (६०.४ प्रतिशत) विनियोजन गरिएको छ । वित्तीय व्यवस्थातर्फ ५० करोड रुपैयाँ (१.५ प्रतिशत) छुट्याइएको छ । प्रदेशको आम्दानीमा संघ सरकारबाट सशर्ततर्फ ४ अर्ब ९४ करोड १५ लाख रुपैयाँ, समानीकरणतर्फ ७ अर्ब ६२ करोड २५ लाख रुपैयाँ, राजस्व बाँडफाँटबाट ९ अर्ब ५ करोड ३२ लाख, समपूरकतर्फ ८४ करोड रुपैयाँ र विशेष अनुदानतर्फ ७० करोड रुपैयाँ प्राप्त हुने अनुमान छ ।

आन्तरिक राजस्व ५ अर्ब १६ करोड ९१ लाख ८४ हजार रुपैयाँ प्राप्त हुने लक्ष्य छ । डायलाइसिसको प्रतीक्षामा रहेकाको संख्या शून्य पुर्‍याउने उद्देश्य प्रदेश सरकारले लिएका छ । सरकारले क्यान्सरपीडितलाई एक लाख रुपैयाँसम्म सहायता दिने घोषणा गरेको छ ।

आगामी आर्थिक वर्षभित्र प्रदेशलाई 'उज्यालो गण्डकी' घोषणा गर्ने प्रदेश सरकारको लक्ष्य छ । चालु आर्थिक वर्ष २०७९/८० का लागि प्रदेश सरकारले ३५ अर्ब ९० करोड ९० लाख रुपैयाँको बजेट ल्याएको थियो ।

प्रकाशित मिति: शुक्रबार, असार २२, २०८० १७:२२