सुदूरपश्चिमको बजेटको विरोधमा सत्तापक्षकै सांसदहरू, ह्विप नमान्ने चेतावनीले गठबन्धनमा तरंग

सुदूरपश्चिमको बजेटको विरोधमा सत्तापक्षकै सांसदहरू, ह्विप नमान्ने चेतावनीले गठबन्धनमा तरंग

प्रदेशसभामा बजेट प्रस्तुत गर्ने क्रममा सुदूरपश्चिमका आर्थिक मामिलामन्त्री नरेश कुमार शाही ।

A+ A A-

सुदूरपश्चिम प्रदेश सरकारले ल्याएको आर्थिक वर्ष २०८०/८१ को बजेट सन्तुलित नभएको भन्दै सत्ता गठबन्धनकै सांसदहरूले असन्तुष्टि जनाएका छन् । बजेटमा असन्तुष्टि पोख्न उनीहरू केन्द्रीय नेतृत्वसँग छलफलका लागि काठमाडौं आएका छन् । यथास्थितिमा बजेट पास गर्न नसकिने उनीहरूको अडान छ ।

माओवादी केन्द्र संसदीय दलका नेता खगराज भट्टसहित सांसद शिवसिंह वली, एकीकृत समाजवादी संसदीय दलका नेता दीर्घ सोडारीसहित प्रकाश रावल र नागरिक उन्मुक्तिका सांसद लक्षमण किशोर चौधरीले गठबन्धनका शीर्ष नेताहरूलाई भेटेर आफ्नो गुनासो राखेका छन् ।

शुक्रबार उनीहरूले कांग्रेसका सभापति शेरबहादुर देउवालाई भेटेर यथास्थितिमा बजेट पास गर्न नसकिने अडान राखे । देउवाले पुरक बजेट ल्याएर भए पनि समस्या समाधान गर्ने आश्वासन दिएको नेकपा एसका सांसद रावले शिलापत्रलाई जानकारी दिए ।

‘कांग्रेस सभापति देउवाजीले सके यही बजेट मिलाउने नभए पुरक बजेट ल्याएर भए पनि समस्या समाधान गर्ने बचन दिनुभयो,' रावलले भने, 'हाम्रैअगाडि मुख्यमन्त्रीलाई फोन गरेर पुरक बजेट ल्याएर भए पनि समस्या समाधान गर्न भन्नुभयो । कुरा सकारात्मक भएको छ ।’

सत्ता गठबन्धनकै प्रदेश सांसदहरूले तीन नेताहरूको क्षेत्रमा मात्रै बजेट पारिएको भन्दै असन्तुष्टि जनाइरहेका छन् । त्यस्तै संघीयताको मर्मअनुसार बजेट नआएको, नेताहरूको क्षेत्रमा मात्र केन्द्रित भएकाले यथास्थितिमा बजेट पास गर्न नसकिने माओवादी केन्द्रका सांसद ओमविक्रम भाट बताउँछन् ।

‘विकासको मोडेल केन्द्रीकृत भयो भनेर संघीयता आएको हो । यो भूगालेको मात्र होइन समाजिक, आर्थिक र विकासमा पनि संघीयता भनेको हो,' भाटले भने, 'प्रदेशका तीन जना नेताहरूको क्षेत्रमा मात्र विकासको बजेट छुट्याउनु पनि केन्द्रीयता हो । यस्तो बजेट पास गर्न सकिँदैन । यो सच्याउनु पर्छ ।’

सुदूरपश्चिममा कांग्रेसका कमल शाह मुख्यमन्त्री छन् । भौतिक योजनामन्त्री पनि कांग्रेसका प्रकाश देउवा छन् । अर्थमन्त्री नेकपा एसका नरेश शाही छन् । यी तीन जना नेताहरूको क्षेत्रमा मात्र बजेट केन्द्रीकृत भएको सत्ता पक्षका सांसदहरूको आरोप छ ।

२० असारमा सुदूरपश्चिमका सभामुखसहितले प्रधानमन्त्री पुष्पकमल दाहाल 'प्रचण्ड'लाई भेटेर यथास्थितिमा बजेट पास गर्न नसकिने अडान राखेको नागरिक उन्मुक्तिका प्रदेश सांसद लक्ष्मण चौधरीले जानकारी दिए ।

‘हामीले प्रधानमन्त्रीज्यूसँग यथास्थितिमा बजेट पास गर्न सकिँदैन भन्यौँ । यो बजेट संघीयताविरोधी छ, समावेसी छैन । ३२ वटा प्रदेश निर्वाचन क्षेत्रमध्य दुई/तीन निर्वाचन क्षेत्रलाई प्राथमिकतामा राखेको छ । अन्य क्षेत्रमा बजेट धेरै कम विनियोजन भएको छ भनेका छौँ,' चौधरीले भने, 'उहाँले त्यसो हो भने यो विषयमा सोच्नुपर्छ । मिलाएर जानुपर्छ भन्नुभएको छ ।’

प्रधानमन्त्रीसँगको भेटमा सभामुख भीम भण्डारी, खगराज भट्ट, सांसद शिव वली, नागरिक उन्मुक्तिका संसदीय दलका नेता घनश्याम चौधरी, एकीकृत समाजवादी संसदीय दलका नेता दीर्घ सोडारी, कांग्रेसका मेघराज खड्का, शिवराज भट्ट, ललिता सुनार सहभागी थिए ।

उनीहरूले एकीकृत समाजवादीका अध्यक्ष माधवकुमार नेपाललाई पनि भेटेका छन् । उनीबाट बजेटका विषयमा छलफल गर्ने आश्वासन पाएको रावलले जानकारी दिए । ‘अध्यक्ष कमरेड (माधव नेपाल) ले पनि बजेटमाथिको असन्तुष्टिका बारेमा छलफल गर्छु, मिलाएर जाने कुरामा पहल गर्छु, सबैसँग छलफल गरेर जानुपर्छ भन्नुभएको छ,’ रावलले भने ।

यसअघि १२ असारमै कांग्रेसका ६ जना प्रदेश सांसदहरूले सभापति देउवालाई भेटेर यथास्थितिमा बजेट पास गर्न नसकिने बताएका थिए । बजेट संशोधन गर्नुपर्ने उनीहरूको भनाइ थियो । कांग्रेसका मेघराज खड्का, प्रकाश बम, बहादुर सिंह थापा, मानबहादुर रावल, दिवानसिंह विष्ट र शिवराज भट्टले देउवालाई भेटेर बजेटबारे असन्तुष्टि पोखेका थिए ।

उनीहरूले नेकपा एसका झलनाथ खनालदेखि उपप्रधानमन्त्री तथा गृहमन्त्री नारायणकाजीसम्मलाई भेटेर गुनासो पोखिसकेका छन् । गठबन्धनकै सांसदहरूले बजेटप्रति तीव्र असन्तुष्टि पोखेपछि सुदूरपश्चिमका मुख्यमन्त्री अफ्ठेरोमा परेका छन् ।

सत्ता पक्षकै सांसदहरू बजेटको विरोधमा रहेकाले अहिलेसम्म बजेटमाथि छलफल हुन सकेको छैन । शीर्ष नेताहरूसँगको भेटमा सांसदहरूले संशोधन नभएसम्म बजेट पास गर्न नसकिने जनाएका छन् । पार्टीको ह्विप नमान्नेसम्मको चेतावनी आफूहरूले दिएको चौधरी बताउँछन् । ‘शीर्ष नेताहरूसँग सांसदहरूले यथास्थितिमा बजेट पास गर्नु परेमा आफूहरू ह्विप नमान्ने जानकारी पनि गराएका छौँ,’ चौधरीले भने ।

प्रकाशित मिति: शुक्रबार, असार २२, २०८० १८:०३