एसईईको धङधङी: बढी जीपीए ल्याउने विद्यार्थी बढे, विज्ञको प्रस्ताव- संविधानविपरीतको एसईई खारेज गरौँ

एसईईको धङधङी: बढी जीपीए ल्याउने विद्यार्थी बढे, विज्ञको प्रस्ताव- संविधानविपरीतको एसईई खारेज गरौँ

A+ A A-

राष्ट्रिय परीक्षा बोर्डले २०७९ सलाको माध्यमिक शिक्षा परीक्षा (एसईई)को नतिजा बिहीबार सार्वजनिक गर्‍यो । नतिजा अनुसार अघिल्लो वर्ष २०७८ को तुलनामा माथिल्लो जीपीए ल्याउनेको संख्या बढेको देखिन्छ । बोर्डका अध्यक्ष महाश्रम शर्मा गत वर्षको भन्दा यो वर्ष नतिजा राम्रो रहेको बताउँछन् ।

‘माथिल्लो जीपीए ल्याउनेको संख्या बढेको छ । तल्लो जीपीए ल्याउनेको संख्या घटेको छ । यो वर्ष नतिजामा सुधार आएको छ,’ उनले भने । गत वर्षको तुलनामा ३.६० देखि ४.०० जीपीएसम्म ल्याउनेको संख्या २.६९ प्रतिशतले बढेको छ । यो वर्ष २२ हजार ४ सय ७४ ले ३.६० देखि ४.०० जीपीए ल्याउँदा गत वर्ष ९ हजार ६ सय ३३ जनाले ल्याएका थिए । ३.२० देखि ३.६० जीपीए ल्याउनेको संख्या यो वर्ष ५५ हजार ६९ जना छन् । गत वर्ष ४१ हजार ६ सय २७ जनाले ल्याएका थिए । यो २.९६ प्रतिशतले बढेको छ ।

२.८ देखि ३.२ जीपीए ल्याउनेको संख्या यो वर्ष ७२ हजार ३ सय ६२ जना छन् । अघिल्लो वर्ष ६९ हजार ९ सय जना थिए । यसमा ०.८२ प्रतिशतले बढेको छ । यो वर्ष २.४ देखि २.८ जीपीए ल्याउनेको संख्या ८९ हजार ३ सय ३१ जना छन् । गत वर्ष ९० हजार ७ सय ५८ जना थिए । यसमा पनि सुधार आएको छ । गत वर्षको तुलानामा ०.११ प्रतिशतले सुधार आएको नतिजाले देखाउँछ ।

तल्लो जीपीए ल्याउनेको संख्या पनि क्रमशः घटेको नतिजाले देखाएको छ । ०.८ देखि १.२ जीपीए ल्याउनेको संख्या यो वर्ष २ हजार २ सय छ । गत वर्ष ३ हजार २ सय ८० ले ल्याएका थिए । यो गत वर्षको तुलनामा ०.२१ प्रतिशतले कम हो ।१.२ देखि १.६ जीपीए ल्याउनेको संख्या यो वर्ष ३८ हजार ७ सय ७० जना छन् । गत वर्ष ४४ हजार ५ सय ८६ जना थिए । गत वर्षको तुलनामा १ प्रतिशत कम हो । सबैभन्दा १.६ देखि २ जीपीए ल्याउनेको संख्या यो वर्ष ८८ हजार ४ सय ४७ जना छन् । गत वर्ष १ लाख ५ सय ९४ जना थिए ।

गत वर्षको भन्दा यो २.०६ प्रतिशतले कम हो । २ देखि २.८ सम्म जीपीए ल्याउनेको संख्या यो वर्ष १ लाख २ हजार २ सय ९३ जना छन् । गत वर्ष १ लाख १२ हजार ७ सय ३३ जना थिए । गत वर्षभन्दा यो वर्ष १.६५ प्रतिशतले कमी आएको छ । यसरी तल्लो जीपीएमा कम र माथिल्लो जीपीएमा बढी ल्याउनेको संख्या बढेको छ ।

यो वर्ष केही विषयको मात्र परीक्षा दिएका र परीक्षाको फारम भरेर सहभागी नभएका विद्यार्थीको संख्या १३ हजार ९ सय ९२ छ । गत वर्ष २२ हजार ५ सय ३७ जना थिए । यसमा पनि गत वर्षको तुलनामा १.६६ प्रतिशतले कमी आएको छ । बोर्डले ४ जीपीए ल्याउनेको संख्या भने सार्वजनिक गरेको छैन । परीक्षा १७ देखि ३० चैत २०७९ सम्म चलेको थियो । जसमा ४ लाख ८४ हजार ९ सय ३९ जनाले परीक्षाका लागि फारम भरेका थिए ।

नतिजामा सुधार आउनुका तीन कारण

बोर्डले यो वर्ष नतिजा राम्रो आउनुमा तीन कारण औँल्याएको छ । यद्यपि, अनुसन्धान भने हुन बाँकी छ । पहिलो कारण हो- स्तरीकृत प्रश्नपत्र । अंग्रेजी, गणित र विज्ञान विषयमा विद्यार्थीले नसिकेको, नजानेको, कहिल्यै नसुनेको प्रश्न यो वर्ष समावेश गरिएको थिएन । देशभका शिक्षकहरूबाट प्रश्नपत्र सुरुमा बोर्डले तयार पारेको थियो । सो प्रश्नपत्रबाट विद्यार्थीहरूको मूल्यांकन गरिएको थियो ।

विद्यार्थीले दिएको उत्तरको आधारमा पुनः एसईईका लागि देशभरका शिक्षकबाट आएको प्रश्नपत्रको अध्ययन गरेर तयार गरिएको थियो । यसरी स्तरीकृत प्रश्नपत्रका कारण नतिजा राम्रो आएको हुन सक्ने बताउँछन्, बोर्डका अध्यक्ष शर्मा । ‘परीक्षा प्रणालीमा सुधार आएका कारण नतिजा राम्रो आएको हुनसक्छ । तीनवटा विषयमा स्तरीकृत प्रश्न सोधेका थियौँ,’ उनले भने ।

दोस्रो कारण हो- कोभिडपछिको नियमित पढाइ । अघिल्लो वर्ष कोभिडले नियमित कक्षा नभएको र अनलाइन पढाइ प्रभावकारी नभएको बोर्डको निष्कर्ष छ । ‘नतिजा राम्रो हुनुमा नियमित पढाइ हो । कोभिडपछि कक्षा राम्रोसँग सञ्चालन हुनु पनि हो,’ अध्यक्ष शर्माले भने ।

तेस्रो कारण, विद्यार्थी आफैँले मिहिनेत गरेको हुन सक्ने बोर्डको तर्क छ । ‘विद्यार्थी आफैँले मिहिनेत गरेको र प्रश्नपत्र सजिलो भएको अनुमान छ,’ शर्माले भने ।

नितजा सार्वजनिक गर्दै बोर्डका पदाधिकारी ।

मौका परीक्षा साउन अन्तिममा

कम जीपीए ल्याउनेले मौका परीक्षा दिन पाउँछन् । बोर्डका अनुसार मौका परीक्षा साउन अन्तिममा हुनेछ । ‘मौका परीक्षा साउन अन्तिममा गर्ने योजना छ,’ राष्ट्रिय परीक्षा बोर्डका सदस्य सचिव दुर्गाप्रसाद अर्यालले भने ।

विज्ञको सुझाव- एसईई खारेज गरौँ

शिक्षाविद्हरू एसईईलाई खारेज गर्नुपर्ने तर्क गर्छन् । माध्यमिक शिक्षाको अन्तिम परीक्षा १२ कक्षा भएकाले १० को परीक्षा विद्यालय वा प्रदेशलाई नै गर्न दिनुपर्नेमा विज्ञहरूको जोड छ । ‘पाठ्यक्रममा आधारित नभएर क्षमतामा आधारित परीक्षा हुनुपर्छ । १० को परीक्षा संविधानलाई नाघेर गरिएको छ । यो प्रदेशले लिनु पर्ने परीक्षा हो,’ शिक्षाविद् डा. विद्यानाथ कोइराला भन्छन्, ‘अन्य कक्षाजस्तै १० को परीक्षा हुनुपर्छ । यसलाई खारेज गर्नुपर्छ ।’

सम्बन्धित समाचार

प्रकाशित मिति: बिहीबार, असार २१, २०८० १८:४५