आइडिया स्टुडियो र लायन्स क्लबबीच उद्यमशीलताको विकासका लागि साझेदारी

A+ A A-

लायन्स क्लब अन्तर्राष्ट्रिय जिल्ला ३२५ जे नेपालले आइडिया स्टुडियो नेपालसँग रणनीतिक साझेदार (स्ट्रयाटेजिक पार्टनरसिप) को रूपमा साझेदारी गरेको छ । दुवै संस्थाले उद्यमशीलताको विकास गर्ने मुख्य लक्ष्य राखेर साझेदारी गरेका हुन् ।

'ब्रेभ इनफ टु स्टार्ट' (साहसिक सुरुवात) को मुख्य नारालाई आत्मसात् गर्दै लायन्स क्लब इन्टरनेसनल ३५२ जे नेपालले अवसरबाट वञ्चित व्यक्तिहरूलाई उद्यमशीलताका लागि सहयोग गर्न 'ब्रेभ इनफ टु स्टार्ट फन्ड'को निर्माण गरेको छ ।

लायन्स क्लब इन्टरनेसनल विश्वको सबैभन्दा ठूलो सेवा क्लब संस्था हो । लायन्स क्लब इन्टरनेसनल फाउन्डेसन (एलसीआईएफ) लायन्स क्लब इन्टरनेसनलको परोपकारी शाखा हो । सन् १९१७ मा स्थापित एलसीआईएफले नागरिक, सांस्कृतिक, सामाजिक र नैतिक कल्याणमा सक्रिय रहेर कार्यहरू गर्दै आएको छ ।

लायन्सका अतिरिक्त कार्यहरूलाई समर्थन गर्न, उनीहरूको सेवालाई सशक्त बनाउन र स्थानीय र विश्वव्यापी रूपमा उनीहरूको समुदायको आवश्यकतालाई सम्बोधन गर्न अनुदान कोष प्रदान गर्दछ । लायन्स क्लब इन्टरनेसनल जिल्ला ३२५ जे नेपाल एक व्यवस्थित, रचनात्मक र नवीन जिल्ला हो, जहाँ १०० भन्दा बढी क्लब र २७०० सदस्यहरू छन् ।

Idea Studio (2)1688478558.jpg आइडिया स्टुडियो नेपाल सामाजिक रुपान्तरण र उद्यमशीलताको क्षेत्रमा आठ वर्षदेखि निरन्तर काम गर्दै आएको संस्था हो । आइडिया स्टुडियो नेपालले नेपालमा उद्यमशीलताको इको सिस्टमलाई बढावा दिन सरकार, शिक्षाविद्, सार्वजनिक र निजीक्षेत्र, वाणिज्य बैंक, मिडिया हाउस, व्यापार र उद्योग संगठनहरू र अन्य धेरै संस्थाहरूसँग साझेदारीमा काम गर्दै आएको छ ।

आइडिया स्टुडियो नेपालले सम्भाव्य व्यावसायिक विचारहरूलाई व्यवसायमा परिवर्तन गर्ने, सामाजिक परिवर्तनलाई प्रज्वलित गर्ने र नवप्रवर्तनको माध्यमबाट उद्यमशीलताको प्रवर्द्धन गर्ने प्लेटफर्मको रूपमा काम गर्दै आएको छ ।

यस सहकार्यको मुख्य उद्देश्य उद्यमशीलतालाई प्रवर्द्धन गर्नु हो | 'ब्रेभ इनफ टु स्टार्ट फन्ड'का लागि आइडिया स्टुडियो नेपालले लायन्स क्लबसँग सहकार्य गरी विभिन्न विषयमा तालिम प्रदान गर्नेछ । छनोट भएका आइडियाहरूलाई लायन्स क्लबले ब्रेभ इनफ टु स्टार्ट फन्डबाट बिउ पुँजी (सिड मनी)समेत उपलब्ध गराउनेछ ।

प्रकाशित मिति: मंगलबार, असार १९, २०८० १९:३५