उपभोक्ताबाट धेरै नाफा लिएर आयल निगमले नौ महिनामै तिर्‍यो २३ अर्ब बक्यौता, मूल्य घटाउन दबाब

उपभोक्ताबाट धेरै नाफा लिएर आयल निगमले नौ महिनामै तिर्‍यो २३ अर्ब बक्यौता, मूल्य घटाउन दबाब

A+ A A-

सरकारसँग ऋण लिँदै पेट्रोलियम पदार्थमा अनुदान दिइरहेको नेपाल आयल निगमबारे दुई दशकअघि तत्कालीन उद्योग, वाणिज्य तथा आपूर्तिमन्त्री ईश्वर पोखरेलले भनेका थिए, ‘खरिदमूल्यभन्दा कममा विक्री गर्नु भनेको आयल निगमले आत्महत्या गर्नु हो ।’ अब निगमले आत्महत्या गर्नुनपर्ने भएकाे छ ।

सरकारसँग लिएकाे ऋण र भारतीय आयल कर्पोरेसन (आईओसी)लाई तिर्नुपर्ने बक्याैताले थलिएकाे निगम उपभाेक्ताकाे ढाड सेकेरै भए पनि उकासिएकाे छ । पेट्रोलियम पदार्थ विक्रीमा उल्लेख्य नाफा लिएर निगमले बाँकी रहेका सबै बक्यौता तिरेकाे छ । बक्यौता चुक्ता गर्नकै लागि निगमले अन्तर्राष्ट्रिय बजारमा कच्चा तेलको मूल्य घट्दासमेत सो अनुसार समायोजन नगरेरै अतिरिक्त नाफा कमायो । फलस्वरुपः भारतीय आयल कर्पोरेसन (आईओसी)लाई तिर्नुपर्ने २३ अर्ब ६० करोड बक्यौंता नौ महिनामा चुक्ता गरेको छ ।

आईओसीको ऋण चुक्ता गरेपछि निगम नाफामा गएको छ । सबै इन्धनबाट गरी चालु आर्थिक वर्षकाे अन्त्यमा १ अर्ब ६० करोड नाफामा जाने निगमका प्रवक्ता मनोज ठाकुर बताउँछन् । उनका अनुसार, आईओसीको बक्यौता तिरिसकेको छ । खाना पकाउने ग्याँसमा लामो समयदेखि घाटामा व्यापार गर्दै आएको अहिले त्यो स्थिति छैन । अहिलेकै दरमा पेट्रोलियम पदार्थमा नाफा कमाउने हो भने निगमले अब मासिक ३ अर्बभन्दा बढी नाफा कमाउने स्थिति देखिएको छ । आईओसीको बक्यौंता चुक्ता गरे पनि सरकारसँग लिएको ६ अर्ब ३० करोड ऋण भने तिर्न बाँकी नै रहेको ठाकुरले बताए ।

आम उपभोक्ताले अहिले खरिद गरिरहेकाे पेट्रोलियम पदार्थमा निगमले उल्लेख्य नाफा लिँदैआएको छ । कुनै बेला सहुलियत दरमा घाटामा समेत इन्धन विक्री गर्दैआएको निगमले पेट्रोलमा लिटरमै १२ रुपैयाँ नाफा कमाउने गरेको छ । त्यस्तै, डिजेलमा १३ रुपैयाँ र मट्टितेलमा २७ रुपैयाँ नाफा लिन्छ भने आन्तरिक हवाई इन्धनमा ३७ र बाह्यमा प्रतिलिटर ५७ रुपैयाँ नाफा कमाइरहेको छ । यसअघि सबैभन्दा धेरै घाटामा रहेको खाना पकाउने ग्यासमा समेत अहिले निगम नाफामा छ । ग्यासमा प्रतिसिलिण्डर ७ रुपैयाँ नाफा लिइरहेको निगमले जनाएको छ ।

मूल्य घटाउन दबाब

आईओसीको बक्यौता तिर्ने निहुँमा अन्तर्राष्ट्रिय बजारमा भाउ घट्दासमेत समायोजन नगरेको निगमलाई अब भने मूल्य घटाउन दबाब परेको छ । स्थिति अनुकूल हुँदै आएकाले इन्धनको मूल्य घटाउन गृहकार्य भइरहेको प्रवक्ता ठाकुर बताउँछन् । प्रतिलिटर ३ रुपैंयासम्म मूल्य घटाउने वा बढाउने अधिकार निगम व्यवस्थापनलाई नै छ । त्योभन्दा धेरै घटबढ गर्नुपरे निगम सञ्चालक समितिले निर्णय गनुपर्ने व्यवस्था छ । त्यसैले उल्लेख्य घटबढका लागि समितिको बैठक बस्नुपर्छ । अहिले नै त्यसको टुंगो नलागे पनि गृहकार्य भइरहेको ठाकुरको भनाइ छ ।

प्रकाशित मिति: सोमबार, असार १८, २०८० १९:२०