बलात्कार प्रकरण : १५ वर्षीया बालिकाले कसरी पाइन् एलओडी क्लबमा प्रवेश ? सञ्चालकलाई हुन सक्छ कैद

बलात्कार प्रकरण : १५ वर्षीया बालिकाले कसरी पाइन् एलओडी क्लबमा प्रवेश ? सञ्चालकलाई हुन सक्छ कैद

A+ A A-

ठमेलस्थित चर्चित एलओडी क्लब गएकी एक बालिका बलात्कृत भएकाे तीन सातापछि खुलासा भयाे । ३१ जेठमा एलओडी पुगेकी १५ वर्षीया नाबालिकालाई त्यहीबाट ललितपुरको बागडोल लगेर पाेखराका ५० वर्षीय सुदनबहादुर कोइरालाले बलात्कार गरेको खुलेको हो ।

बालबालिकासम्बन्धी ऐन, २०७५ को परिच्छेद-८ को दफा ६६ (ख) ले बालिगका लागि खोलिएका डान्सबार, क्यासिनोजस्ता मनोरञ्जन स्थलमा प्रवेश वा प्रयोग गराउने कार्यलाई बालबालिकाविरुद्ध हिंसा गरेकाे मानेकाे छ । यदि सो कार्य गरेको ठहर भएमा ५० हजार रुपैयाँ जरिवाना र एक वर्ष कैद सजाय हुने व्यवस्था छ । नाबालिका बलात्कार घटनामा समेत सोही कानुन आकर्षित हुने देखिन्छ ।

बालअधिकारकर्मीले बालिका बलात्कारकाे घटनालाई गम्भीर रूपमा लिँदै गहिराे अनुसन्धानकाे माग गरेका छन् । वयस्कका लागि खुलेका डिस्को, क्लबलगायतका मनोरञ्जनस्थलमा १८ वर्षभन्दा मुनिका बालबालिकालाई प्रवेश गराउने वा काममा लगाउने दुवै कार्य दण्डनीय रहेको बालबालिका शान्ति क्षेत्र राष्ट्रिय अभियानका अध्यक्ष राजेश शर्मा बताउँछन् । ‘यस्ता क्लबहरूले बालबालिकाको प्रवेश र प्रयोग निर्वाध रूपमा गरेका छन् । यसको नियमन गर्नुपर्ने निकायले चासो देखाएको छैन । यस्तो कार्य गर्नेमाथि बालबालिका ऐनअनुसार कारबाही हुनुपर्छ,’ शर्माले भने ।

बालिका एलओडी क्लब प्रवेश गरेर घटना भएकाे घटनामा सञ्चालकमाथि समेत अनुसन्धान हुने प्रहरीले बताएको छ । उमेर नै नपुगेकी नाबालिकालाई क्लबभित्र प्रवेश गराएको कसुरमा प्रहरीले सञ्चालकमाथि अनुसन्धान गर्ने ललितपुर प्रहरी प्रमुख एसएसपी सिद्धिविक्रम शाहले बताए । 'कानुन आकर्षित हुने काममा प्रहरीले कुनै कसर बाँकी नराखेर अनुसन्धान गर्छ,' उनले शिलापत्रसँग भने, ‘कानुनले बन्देज गरेका काम कसैबाट भएको देखिए कानुनी दायरामा ल्याउँछौँ ।’

उदयपुर स्थायी घर भई कोटेश्वर बस्दै आएकी १५ वर्षीया बालिकालाई ३१ जेठमा एलओडी क्लबबाट ललितपुरको बागडोल बस्ने पाेखराका कोइरालाले बलात्कार गरेका थिए । सोही अभियोगमा कोइरालालाई ललितपुर प्रहरीले पक्राउ गरिसकेकाे छ ।

एलओडी क्लबका सञ्चालक रविन श्रेष्ठले आफूहरूले क्लबमा युवतीको उमेर चेकजाँच गरेर मात्रै प्रवेश गराउने गरेकाे दाबी गरे । ‘हामीले उमेर जााच गरेरै प्रवेश गराउने हो । १८ वर्षमुनिकालाई प्रवेश गराएका छैनौँ । तर, त्यो घटना कसरी भयो । हामीले पनि आन्तरिक छानबिन गर्दैछौँ,’ श्रेष्ठले भने ।

यो पनि पढ्नुस् :