लहानको शहीद चोकमा एनसेलको नयाँ सेन्टर, एनसेलका प्रमुख कार्यकारी अधिकृतद्वारा उद्घाटन

लहानको शहीद चोकमा एनसेलको नयाँ सेन्टर, एनसेलका प्रमुख कार्यकारी अधिकृतद्वारा उद्घाटन

A+ A A-

एनसेल आजियाटा लिमिटेडले आफ्ना ग्राहकलाई एकै स्थानबाट विभिन्न सेवा प्रदान गर्दै ग्राहकलाई विश्वस्तरीय सेवा सुविधाको अनुभव प्रदान गर्ने उद्देश्यसहित लहानको शहीद चोकमा आफ्नो नयाँ सेन्टर सञ्चालनमा ल्याएको छ ।

एनसेलका प्रमुख कार्यकारी अधिकृत तथा प्रबन्ध निर्देशक जाब्बोर कायुमोभले एक कार्यक्रममाझ बिहीबार उक्त एनसेल सेन्टरको उद्घाटन गरेका हुन् ।

आफ्नो ब्राण्ड वाचा ‘आज, भोलि, सधैँ सँगै’ अनुरूप स्थापना गरिएको यस नयाँ एनसेल सेन्टरबाट ग्राहकले एनसेलका सेवा तथा सुविधाहरूका बारेमा सोधपुछ गर्न, सिम खरिद गर्न, इन्टरनेट सेटिङको जानकारीलगायत विभिन्न कर्पोरेट सेवाहरूसमेत लिन सक्छन् ।

यसैगरी, ग्राहकहरूले यस सेन्टरबाट आफ्नो सिम फोरजीमा अपग्रेड गर्ने, सिम तथा मोबाइल नम्बर परिवर्तन, सिम ई–सिममा अपग्रेड गर्न, सीयूजी नम्बरहरूको आवश्यक फेरबदल गर्ने, बीजप्लान, अन्तर्राष्ट्रिय रोमिङ सुचारू गर्ने, बिल तिर्ने, ब्यालेन्स रिचार्ज र ट्रान्सफर गर्नेलगायतका अन्य सेवाहरू प्राप्त गर्न सक्छन् ।

'हाम्रो मुख्य उद्देश्य भनेको आफ्ना ग्राहकहरूलाई सेवाहरूमार्फत धेरैभन्दा धेरै लाभ सिर्जना गर्नु हो,' जाब्बोरले भने, 'लहानको यो नयाँ एनसेल सेन्टर ग्राहकलाई स्थानीयस्तरमा विश्वस्तरीय ग्राहक सेवाहरू प्रदान गर्ने हाम्रो प्रतिबद्धता बमोजिम सञ्चालनमा ल्याइएको हो ।'

हप्तामा सातै दिन बिहान ९ देखि साँझ ५ः३० बजेसम्म यस सेन्टरले ग्राहकहरूलाई सेवा प्रदान गर्ने कम्पनीले जनाएको छ । यसअघि एनसेलले विगत १० वर्षदेखि लहानमा आफ्नो पुरानो एनसेल सेन्टरबाट ग्राहक सेवा प्रदान गर्दैै आएको थियो । आफ्नो ग्राहक सेवालाई अझ सहज बनाई उत्कृष्ट ग्राहक अनुभव प्रदान गर्न एनसेलले देशका विभिन्न भागमा ३४ वटा एनसेल सेन्टरहरू सञ्चालन गर्दै आएको छ ।

सन् २००४ मा स्थापित एनसेलले आर्थिक वर्ष २०७८/७९ सम्म कर तथा अन्य शुल्क गरी विभिन्न शीर्षकमा २ खर्ब ८३ अर्ब रुपैयाँभन्दा बढी कर तिरेको छ । त्यसैगरी, यस कम्पनीले आफ्नो व्यावसायिक तथा सामाजिक उत्तरदायित्वअन्तर्गत स्वास्थ्य, शिक्षा, वातावरणलगायतका विभिन्न क्षेत्रमा १ अर्ब ७५ करोड रूपैयाँभन्दा बढी लगानी गरिसकेको छ । एनसेलले १ करोड ६० लाखभन्दा बढी ग्राहकलाई आफ्नो नेटवर्कमार्फत सेवा प्रदान गर्दै आएको छ ।

प्रकाशित मिति: आइतबार, असार १७, २०८० १३:४८