यी हुन् एसपीए सुदूरपश्चिम स्पोर्टस अवार्ड जित्ने प्रशिक्षक र खेलाडीहरू

A+ A A-

चौथो संस्करणको ‘एसपीए सुदूरपश्चिम स्पोर्टस अवार्ड २०७९’ को वर्ष खेलाडी क्रिकेटका दीपेन्द्रसिंह ऐरी र फुटबलकी वर्षा ओली घोषित भएका छन् । खेलकुद पत्रकार मञ्च कैलालीको आयोजना शुक्रबार धनगढीमा भएकाे कार्यक्रममा दुवै खेलाडीलाई अवार्ड दिइयाे ।

दीपेन्द्रले एथलेटिक्सका शिवराज पार्की र कबड्डीका प्रकाश गिरीलाई पछि पार्दै उक्त अवार्ड हात पारेका हुन् । गतवर्ष नेपाललाई विश्वकप क्वालिफायरमा पुर्‍याउन उनकाे महत्त्वपूर्ण भूमिका थियाे । उनी गतवर्ष टी-२० अन्तर्राष्ट्रियमा एक हजार रन बनाउने र एक दिवसीयमा करिअरको पहिलो शतक प्रहार गर्ने खेलाडीसमेत बनेका थिए ।

यस्तै महिलातर्फ उत्कृष्ट खेलाडी बनेकी वर्षा गतवर्ष नेपाललाई पहिलोपल्ट यु-१५ साफ च्याम्पियनसिपको उपाधि जिताउँदा उत्कृष्ट प्रदर्शन गर्ने खेलाडी थिइन् । उनी उमेर समूह वा सिनियर साफ च्याम्पियनसिप र दक्षिण एसियाली खेलकुदमा नेपाली टोलीको उपाधि खडेरी तोड्दै ह्याट्रिकसहित ५ गोल गर्ने खेलाडीसमेत हुन् ।

गतवर्ष नेपाली यु-१५ टोलीले साफ च्याम्पियनसिपमा बंगलादेशविरुद्ध जित हात पार्दा उनले निर्णायक गोल गरेकी थिइन् । उनले गतवर्ष यु-१७ साफ च्याम्पियनसिपमा तीन गोलसमेत गरेकी थिइन् । उनी एएफसी छनोटका सबै खेल खेल्दै गोल गर्ने नेपाली खेलाडीसमेत हुन् ।

यस्तै सुदूरपश्चिम वर्षको अवार्ड युवा खेलाडी क्रिकेटका हेमन्त धामीले जिते । धामीले भारोत्तोलनका हेमन्त पाल र क्रिकेटकी अनु कडायतलाई पछि पारे । हेमन्तले गतवर्ष नेपाललाई यु- १९ विश्वकप क्रिकेटमा पुर्‍याउन उत्कृष्ट प्रदर्शन गरेका थिए ।

वर्ष प्रशिक्षकको अवार्ड क्रिकेटका जगत टमटाले हात पारे । टमटाले गतवर्ष नेपाललाई यु-१९ विश्वकप क्रिकेटमा पुर्‍याएका थिए । उनी ८ वर्षपछि नेपाललाई यु-१९ विश्वकपमा कमब्याक गराउने प्रशिक्षक हुन् । उनले नेपाली महिला क्रिकेट टोलीलाई कतारविरुद्ध सिरिज जिताएका थिए । उनले कुस्तीका राजेन्द्र चन्द र भारात्तोलनका जीवन गौतमलाई पछि पारे ।

सुदूरपश्चिम आईकन पुरुषतर्फ फेन्सिङका जलेन्द्र शाही घोषित भए । शाहीले नवाैँ राष्ट्रिय खेलकुदमा सुदूरपश्चिमका लागि स्वर्ण पदक जितेका थिए । उनले फुटबलका जियारत सेख (फुटबल) र आनन्द कामी (कराँते) लाई पछि पारेका हुन् ।

सुदूरपश्चिम आईकन महिला फुटबलकी दिपा रोकाया घोषित भइन् । दीपाको कप्तानीमा नेपालले गतवर्ष पहिलोपल्ट यु-१५ साफ च्याम्पियनसिपको उपाधि जितेको थियो । उनले कविता कुँवर (क्रिकेट) र मनिषा सिंह (कुस्ती)लाई पछि पार्दै उक्त अवार्ड जितेकी हुन् ।

लाइफ टाइम एचिभमेन्ट सहदेवलाई

भबिलबलका प्रशिक्षक सहदेव विष्टलाई लाइफ टाइम एचिभमेन्ट प्रदान गरियो । २०२२ सालमा सुदूरपश्चिमको पहाडी जिल्ला बैतडीमा जन्मिएका विष्टले कलिलै उमेरदेखि भलिबल खेल्न थालेका थिए ।

स्कुलमा पढ्दापढ्दै विरेन्द्र सिल्डको पहिलो सहभागीतामै उत्कृष्ट खेलाडी बनेका विष्टले त्यही प्रतियोगिता हुँदै क्षेत्रीय टिममा परेर धनकुटामा राष्ट्रिय प्रतियोगिता खेले । जहाँ साविकको सुदूरपश्चिम विकास क्षेत्र तेस्रो भएको थियो । ०४२ सालमा भएको दोस्रो राष्ट्रिय खेलकुद प्रतियोगितामा सहभागी भएपछि उनको ढोका नेपाली राष्ट्रिय भलिबल टिमका लागि खुल्यो । त्यस क्रममा भएका मैत्रीपूर्ण प्रतियोगितामा २० वर्षे उमेरमै तहल्का मच्चाए उनले । काठमाडौं र उत्तर प्रदेशमा भएका मैत्रीपूर्ण खेलमा उत्कृष्ट प्रदर्शन गरेकै कारण उनी सन् १९८६ मा दक्षिण कोरियाको सोलमा भएकाे एसियाली खेलकुदका लागि छनोट भए । नेपाली भलिबल टिमले त्यसयता एसियन गेमको अनुभव लिन पाएको छैन । एसियाली खेलकुदमा सहभागीता जनाउने उनी सुदूरपश्चिमका एक मात्रै खेलाडी हुन् ।

स्पेसल अवार्डः राजेन्द्र र आनन्दलाई

कुस्तीका राजेन्द्र चन्द, कराँतेका आनन्द कामीलाई स्पेसल अवार्ड प्रदान गरियो । कुस्तीका चन्दको प्रशिक्षणमा सुदूरपश्चिमले नवौँ राष्ट्रिय खेलकुद प्रतियोगितामा पाँच स्वर्ण, एक रजत र तीन कांस्य पदक जितेको थियो ।

कैलालीको गोदावरी नगरपालिका- १२ ओलानीमा कपाल काट्ने सैलुनसमेत गरिरहेका करातेका आनन्द कामीले ०७९ सालमा गण्डकी प्रदेशमा भएको नवौँ राष्ट्रिय खेलकुद अन्तर्गत कराँते प्रतियोगितामा सुदूरपश्चिम प्रदेशलाई स्वर्ण पदक दिलाउन सफल भएका थिए । पर्वतको कुश्मामा भएको राष्ट्रिय कराँते प्रतियोगितामा कामीले ५० किलो ग्राम तौल समूहअन्तर्गत कुमुतेमा स्वर्ण पदक जितेका थिए । उनलाई स्पेसल अवार्ड प्रदान गरिएको खेलकुद पत्रकार मञ्चका अध्यक्ष प्रदीप पाठकले बताए ।

उत्कृष्ट खेलाडी पुरुष र महिला विधाका विजेतालाई ३५/३५ हजार, उत्कृष्ट प्रशिक्षकलाई ३० हजार, वर्ष युवा खेलाडी, स्पेसल अवार्ड र लाइफटाइम एचिभमेन्ट अवार्डका विजेतालाई २५/२५ हजार, सुदूरपश्चिम आइकन महिला र पुरुष विधाका विजेतालाई नगद २० हजारसहित ट्रफी, मेडल र प्रमाणपत्र प्रदान गरिएको थियो ।

प्रकाशित मिति: शनिबार, असार १६, २०८० ०८:१५