गण्डकीमा राप्रपाका दुई चरित्रः बजेट आउँदा वाहवाही, पैसा नपर्दा बद्ख्वाइँ

A+ A A-

गण्डकी प्रदेश सरकारले आगामी आर्थिक वर्ष २०८०–८१ का लागि ल्याएको बजेटको मन्त्रालयगत छलफल जारी छ ।

गत असार १ गते बजेट प्रस्तुत भएपछि पत्रकारसँग कुराकानी गर्दै राप्रपा दल नेता पञ्चराम गुरुङ र प्रमुख सचेतक विन्दु अधिकारी पहाडीले ‘बजेट राम्रो छ’ भन्दै प्रशंसा गरेका थिए । दुवैको एउटै भनाइ थियो- प्रतिपक्षी भएर विरोधमात्रै गर्नुपर्छ भन्ने छैन ।

राप्रपाको यो बोली बजेट प्रस्तुत भएर वार्षिक विकास कार्यक्रम पुस्तिका आएसँगै फेरिएको छ । राप्रपाका दुवै सांसद आफूले मागेका योजनामा बजेट नपरेपछि सरकारसँग रुष्ट छन् । बुधबार मन्त्रालयगत र प्रतिष्ठानसँग सम्बन्धित विषयको छलफलमा भाग लिन रोष्ट्रम उक्लिएकी प्रतिपक्षी दल राप्रपा प्रमुख सचेतक विन्दु अधिकारी पहाडी मन्त्री र सरकारमाथि खनिइन् ।

आफूले भनेका योजना नपरेको भन्दै उनले संसदमै भावुक भएर प्रदेश सरकार र मन्त्रीसँग दुःख मनाउ गरिन् । उनले आफूले भनेकामध्ये ऊर्जा मन्त्रालयबाट १५ लाख रुपैयाँको मात्र योजना परेको सुनाइन् । आफू मन्त्रीकहाँ नगएकाले भेद्‌भाव गरिएको उनले बताइन् ।

गृहजिल्ला नवलपुरमा सरकारले आफूलाई ‘मुख देखाउन’ लायक पनि सरकारले नछोडेको भन्दै दुःखेसो पोखिन् । ‘मन्त्रालय गइरहन पर्दैन, घेराबन्दी हाल्न पर्दैन भन्ने थियो । न्यायका लागि गोरखा जानपर्छ भन्ने मनमा ताजा थियो,’ उनले थपिन्, ‘मुख्यमन्त्रीज्यू केही गर्नुहुन्छ, गर्न आउनुभएको हो भनेर हिँडेको मान्छे हुँ । आज हेर्नुस्, त्यो जिल्ला (नवलपुर) मा मुख देखाउनेलायक सरकार र सदनबाट हुन पाइनँ ।’

उनले एउटा मन्त्रालयले एउटा योजना दिएको भए चित्त बुझाउने बाटो हुने बताइन् । बजेट नपरेपछि रिसाएकी प्रमुख सचेतक पहाडी मन्त्रालय कसैको पेवा होइन भन्दै कड्किइन् । उनले सरकारमा गएपछि हिजो निकट भएकाहरूले पनि अहिले वास्ता नगर्ने गरेकोसम्म सुनाइन् ।

‘माननीय मन्त्रीज्यू तपाईंहरूले जग्गा बेच्नुभएको हो कि घरबाट ल्याएको सम्पत्ति हो कि कार्यकर्ता पाल्ने थलो हो ? बिडम्बना छ, अरु सरकारले यति तल निकृष्ट काम गर्न सक्दैन,’ उनले रोष पोखिन् । नवलपुरमा एक अर्ब ८६ करोड रुपैयाँ जाँदा देवचुली नगरपालिका-१७ मा मात्रै पाँचवटा योजना परेको पहाडीले सुनाइन् । यो वडा कृषि तथा भूमि व्यवस्थामन्त्री महेन्द्रध्वज जिसीको वडा हो ।

पहाडीले संसदमै भनिन्, ‘मेरो जिल्लाबासी मन्त्री कहाँ जानुभएछ कुन्नी ? हिजो त विन्दु बहिनी के छ भन्नुहुन्थ्यो, आजकल त बोल्दा पनि बोल्नुहुन्न । जिल्लाबासी मन्त्री भइरहँदा त्यो जिल्लाको मान्छेले त भन्छ नि ।’

राप्रपाको यो चरित्रले बजेट आउँदा राप्रपाले दिएको प्रतिक्रिया वार्षिक विकास कार्यक्रममा आफ्ना योजना पार्न लक्षित थियो भन्ने प्रस्ट पार्छ । आफ्ना योजनामा बजेट नपरेपछि १३ दिनअघि ‘राम्रो’ भनेको बजेटलाई समर्थन नगरेर प्रमुख सचेतक पहाडी रोष्ट्रमबाट बिदा भइन् ।

गत असार ७ गते राप्रपा दल नेता पञ्चराम गुरुङ असार १ गते संसदमा प्रस्तुत बजेटमाथि बोलेका थिए । उनले सरकारलाई केही विषयमा सुझाव दिए तर त्यसको विरोध गरेनन् । उनले अन्तिममा भनेका थिए, ‘प्रतिपक्षी र सत्तापक्ष जुनसुकै भए पनि सरसल्लाह र सुझावमा अघि बढौँ ।’ अर्थात् राप्रपाले प्रतिपक्षी भएर पनि बजेटमा विरोध जनाएन ।

दल नेता गुरुङ बोलेको भोलिपल्ट असार ८ गते सांसदलाई कुन जिल्लामा कुन योजना र कति बजेट पर्‍यो भन्ने विषय समेटिएको वार्षिक विकास कार्यक्रम पुस्तिका बाँडिएको थियो । त्यसैमाथिको छलफलमा भाग लिँदै बुधबार राप्रपा प्रमुख सचेतक पहाडीले व्यापक असन्तुष्टि पोखिन् । अर्थात् राप्रपाले १३ दिनमै आफूलाई फेरि ‘विरोध गर्ने प्रतिपक्षी’ कै रूपमा फर्काएको छ ।

गण्डकीमा आगामी आर्थिक वर्ष २०८०-८१ का लागि ३३ अर्ब ४२ करोड ७२ लाख रुपैयाँको बजेट प्रस्ताव गरिएको छ ।

प्रकाशित मिति: बुधबार, असार १३, २०८० १५:२४