महिला संघमा सदस्य नियुक्त गरेका देउवाले नेविसंघ र तरुण दलमा किन गरेनन् ?

A+ A A-

कांग्रेस सभापति शेरबहादुर देउवाले कांग्रेस भ्रातृ संगठन महिला संघको तदर्थ समितिमा जेठ ३० गते ५२ जना सदस्य मनोनित गरे । संघकी अध्यक्ष उषा राउतलाई भने २०७९ साउन २६ गते नै मनोनित गरिएको थियो ।

नियमित स्वास्थ्य उपचारको लागि सिंगापुर जाने दिन महिला संघमा सदस्य मनोनित गरेका देउवाले नेपाल विद्यार्थी संघ र तरुण दललमा भने सदस्य मनोनित गरेनन् । नेविसंघ अध्यक्ष दुजाङ शेर्पा इतर समूहले नेविसंघको तदर्थ समितिमा रहने सदस्यको नाम नदिएपछि नेविसंघले पूर्णता पाउन नसकेको बताउँछन् ।

तर, शेखर कोइराला निकट नेता भने महिला संघमा मात्र सदस्यता थपिएकोमा प्रश्न गर्छन् । ‘यदि शेखर कोइरालका कारण नेविसंघको समिति आएन भने महिला संघको मात्र सदस्यता किन आयो ? तरुण दल, नेविसंघ र महिला संघको सदस्यका सूची दिइसकेका छौँ,’ कोइराला निकट एक नेताले शिलापत्रसँग भने ।

कांग्रेस इतर समूहले महिला संघ, तरुण दल र नेविसंघमा आफ्नो तर्फबाट रहने नेविसंघ सदस्यहरूको सूची पठाएको थियो । तर, सभापति देउवाले महिला संघमा मात्र २६/५२ जना सदस्य मनोनित गरे ।

२५० भन्दा माथिको प्लेन समिति ल्याउने तयारी भैरहेका नेविसंघमा कांग्रेसभित्र देखिएका गुट र उपगुटलाई मिलाउदा समय लागेको छ । ‘सबै समूह समेटेर समावेशी समूह ल्याउँदै छौँ । लामो समय अधिवेशन नहुँदा नेतृत्वका आकांक्षीहरूको पनि उमेर ३२ वर्ष नाघिसक्यो,’ नेविसंघ अध्यक्ष शेर्पाले भने ।

२०७८ चैत ९ गते नेविसंघ र तरुण दलका अध्यक्षले प्रतिनिधिसभा चुनाव सकिएको तीन महिनाभित्र अधिवेशन सकिसक्नुपर्ने गरी नियुक्ति पाएका थिए । अधिवेशन गरेर नेतृत्व छाड्न तयार उनीहरूलाई केन्द्रीय समिति नै नदिएर पार्टीले अड्काएको छ ।

भद्रगोल रूपमा चलिरहेको कांग्रेसमा पार्टीको विभाग र भातृ संगठनको काम सँगसँगै हुने नेताहरू बताउँछन् । ‘पार्टीको विभाग र भ्रातृ संगठनलाई पूर्णता दिने, अधिवेशनको बाटोमा लैजाने कामहरू भैरहेको छ । केही सुस्त गतिमा काम भैरहेको छ । नीति महाधिवेशन गर्नुपर्नेछ । छिट्टै नै रोकिएका कामहरूको नतिजा पाउनुहुनेछ,’ कांग्रेस प्रचार विभाग प्रमुख मीन विश्वकर्माले भने ।

प्रकाशित मिति: मंगलबार, असार १२, २०८० २०:५६