सत्ता परिवर्तनकाे चर्चाबीच ओली-गगन छलफलकाे तयारी

A+ A A-

जेठ ३१ गते नियमित स्वास्थ्य परीक्षणका लागि नेपाली कांग्रेसका सभापति शेरबहादुर देउवा सिंगापुर प्रस्थान गरे । एक हप्ताका लागि उडेका देउवा स्वदेश फर्किँदा नेपालमा सत्ता परिवर्तनको चर्चाले तीव्रता पाएकाे छ ।

४ असारमा सत्ता गठबन्धनभित्रै उपगठबन्धन भएर समाजवादी मोर्चा गठन भयो । चारदलीय मोर्चामा नेत्रविक्रम चन्द विप्लव नेतृत्वको कम्युनिस्ट पार्टी सत्ताबाहिर छ । मोर्चाको नाममा कम्युनिस्ट पार्टीहरू एक ठाउँमा आउनुले कांग्रेसलाई फरक नपर्ने कांग्रेस नेताहरूले सार्वजनिक रूपमा प्रतिक्रिया दिए पनि आन्तरिक रूपमा भने कांग्रेस सशंकित बनेकाे उसका गतिविधिले देखाउँछ ।

राष्ट्रपतिको चुनावबाट सत्ताबाहिर जाने बाटोमा लागेको प्रतिपक्षी एमाले सत्तामा फर्कने प्रयासमा छ । पुस १० गते तत्कालीन गठबन्धन भत्काउन सफल एमाले फेरि सत्तामा फर्किन अर्को अवसरको खोजीमा छ । त्यसका लागि उसले कांग्रेससँग वार्ताको प्रयास गरिरहेको छ ।

कांग्रेसका इतर समूहका नेताहरू र संस्थापन पक्षका ज्ञानेन्द्र कार्कीसँग एमाले उपाध्यक्ष विष्णु पौडेल, नेता महेश बस्नेतलगायतले छलफल गरिरहेको चर्चा छ । यस विषयमा कुरा गर्न खोज्दा कार्कीसँग सम्पर्क हुन सकेन । कांग्रेस महामन्त्री गगन थापालाई एमाले अध्यक्षन केपी शर्मा ओलीसँग भेट गराउन सन्देश आएको छ । तर, सभापति देशबाहिर रहँदा विपक्षी नेतासँग भेट्दा राम्रो सन्देश नजाने भनेर गगन रोकिएका थिए ।

‘एमालेबाट सन्देश आएको छ । तर, सभापति देशबाहिर रहेको अवस्थामा महामन्त्रीले भेट्दा राम्रो सन्देश जाँदैन भनेर गगन दाइले भेट्नुभएको छैन,’ उनीनिकट एक सांसदले शिलापत्रसँग भने । देउवा स्वदेश फर्किसकेकाले अब याे भेट हुनसक्ने बताइएकाे छ ।

उता एमाले भने सरकार ढाल्न बल गर्नै नपर्ने बताउँछ । एमाले सचेतक महेश बर्तौलाले असार पहिलो सातादेखि एमालेले चाहे सरकार एक हप्ताभित्र ढाल्ने बताउँदै आएका छन् । उनको भनाइले एमाले-कांग्रेससँग संवादमा रहेको देखाउँछ ।

तर, कांग्रेस भने तत्काल सरकार परिवर्तनको पक्षमा छैन । पार्टी प्रचार विभाग प्रमुख मीन विश्वकर्मा सत्ता समीकरण परिवर्तनको हल्ला बजार हल्ला मात्र भएको बताउँछन् ।

‘हामीले एमालेसँगको गठबन्धन तत्काल भत्काएर अर्को गठबन्धन बनाउने पक्षमा कांग्रेस छैन । सरकार परिवर्तन बजार हल्ला मात्र हो,’ उनले भने ।

कांग्रेसका नेताहरू एमालेका नेताहरूसँग छलफलमा रहेको बारे उनले नकार्न सकेनन् । ‘सरकार परिवर्तन गरौँ भन्ने लागेका केही कांग्रेस नेताहरू छलफलमा हुन सक्छन्,’ उनले भने ।

कांग्रेस केन्द्रीय सदस्य तथा सांसद प्रतिमा गौतम तत्काल सरकार परिवर्तनको अवस्था नआइसकेको बताउँछिन् । ‘तत्काल सरकार परिवर्तन सान्दर्भिक हुँदैन । परिवर्तन गर्नुपर्ने अवस्था आइसकेको छैन । यही गठबन्धनले निरन्तरता प्राप्त गर्छ,’ उनले भनिन् ।

प्रकाशित मिति: सोमबार, असार ११, २०८० १६:३०