इटहरी उपमहानगरले ल्यायो दुई अर्ब ३५ करोड ३१ लाखको बजेट

A+ A A-

इटहरी उपमहानगरपालिकाले आउँदो आर्थिक वर्ष २०८०–८१ का लागि दुई अर्ब ३५ करोड ३१ लाख रुपैयाँको बजेट ल्याएको छ । आइतबार १३ औं नगरसभामा उपप्रमुख सङ्गीताकुमारी चौधरीले कुल बजेटमध्ये चालु खर्चतर्फ १ अर्ब १५ करोड ७८ लाख २५ हजार र पुँजीगत तर्फ १ अर्ब १८ करोड ७२ लाख ६ हजार बजेट प्रस्तुत गरेकी हुन्।

उपमहानगरले दशवटा वडाका लागी एक करोड ५५ लाख रुपैयाँ तोकेको छ । जसमा वडा नं १, ३, ७, १०, ११, १३, १४, १५, १८ र १९ मा पर्दछ । बाँकी दशवटा वडालाई एक करोड ७५ लाखका दरले बजेट सीमा तोकिएको छ । इटहरी उपमहानगरपालिकाले चालु आर्थिक वर्षका लागि २ अर्ब १८ करोड ६ लाख १० अनुमानित बजेट पेस गरेको थियो ।

उपमहानगरले आगामी आर्थिक वर्षका लागि इटहरीको चौबाटोमा दुईवटा आकाशे पुल निर्माण गर्न बजेट छुट्याएको छ । इटहरी वडा नं ६ हुँदै मुख्य बजार क्षेत्र भएर बग्ने खेतीखोला र टेङ्ग्रा खोलाको अवरोध हटाई रिभर करिडोर र ग्रीन बेल्ट (हरित पार्क) निर्माण गर्न पनि बजेट छुट्याएको छ ।

शिक्षाको भौतिक पूर्वाधार विकास साथै गुणस्तर अभिवृद्धिलाई ध्यानमा राखी इटहरी क्षेत्रका केही सामुदायिक विद्यालयहरूलाई नमूना विद्यालयका रुपमा रुपान्तरण गर्न बजेट बिनियोजन गरिएको उल्लेख छ ।

प्रत्येक वडामा वडास्तरीय खेल मैदान निमार्ण गर्ने र प्रत्येक वडामा खुल्ला व्यामशाला निर्माण गर्न बजेट बिनियोजन गरिएको छ ।
उपमहानगरपालिकाभित्रका सार्वजनिक तथा ऐलानी जमिन संरक्षण गरी ज्येष्ठ नागरिक तथा बालबालिकाका निम्ति हरित पार्क निर्माण गर्न बजेट छुट्याएको छ ।

उपमहानगरले सार्वजनिक क्षेत्रहरुमा फ्री वाईफाई जडान गरी सञ्चालन गर्न बजेट छुट्याएको छ । नवप्रवर्तन, अनुसन्धान तथा आइडिया इभेन्ट कार्यक्रम गर्न बजेट विनियोजन गरिएको छ । यस्तै, ६ वटा नगर विद्युतीय बस सञ्चालन गर्न पनि बजेट छुट्याइएको छ । यसका लागि ६ वटा उपयुक्त स्थानमा चार्जिङ स्टेसन निर्माण गरी सञ्चालन गरिने उल्लेख छ ।

इटहरीका मुख्य चोक तथा बजार क्षेत्रमा फ्री वाईफाई जडान गरी सञ्चालान गरिनेछ । गरिब, विपन्न, ज्येष्ठ नागरिकहरूको इटहरी अस्पतालमा गरिने उपचारमा ५० प्रतिशत छुट दिने बजेटमा समेटिएको छ ।

प्रकाशित मिति: आइतबार, असार १०, २०८० १८:१६