कांग्रेसको रुपान्तरण अभियानले के देख्याे समस्या ? भाेलि समीक्षा बैठक हुँदै

कांग्रेसको रुपान्तरण अभियानले के देख्याे समस्या ? भाेलि समीक्षा बैठक हुँदै

A+ A A-

जेठ ११ गते सुरु भएकाे कांग्रेस तेस्रो पुस्ताका नेताहरूकाे 'रुपान्तरण अभियान' महिनाभर चल्यो । अभियानमा आएका सुझावलाई प्रतिवेदनका रूपमा सभापति शेरबहादुर देउवालाई बुझाउने अभियानको तयारी छ । तर, त्यसको तयारी भने गरिएको छैन ।

असार पहिलो हप्ता बितिसक्दा समेत अभियानको समीक्षा पनि हुन सकेको छैन । शनिबार अभियानको समीक्षा गर्न नेताहरू बैठक बस्दैछन् । सातै प्रदेश पुगेर लिइएको सुझावमा के छ ? र, त्यसले कांग्रेसलाई रुपान्तरण गर्छ कि गर्दैन ? जस्ता प्रश्नहरूको उत्तर अभियानले दिन बाँकी छ । अभियानका नेता भुपेन्द्रजंग शाहीका अनुसार भोलि (शनिबार) समीक्षा बैठक राखिएको छ । बैठकले प्रतिवेदन लेखन कार्य अघि बढाउनेछ ।

पार्टीको मौलिक चरित्र स्खलित भएर पहिचान हराउन लागेको, प्रभावकारी कार्यक्रम नभएको, १४औँ महाधिवेशनयता नीतिविहीन भएको, संगठन चुस्त र नेतृत्व गतिशील नभएको, संरचना भद्दा भएको कमजोरी पार्टीमा रहेको अभियानले देखेको छ ।

सदस्यतामा परम्परागत प्रणालीको भएको, संगठनमुखीभन्दा पनि महाधिवेशनमुखी भएको, मूल्याकंन प्रणाली नेतामुखी भएकोलगायतका समस्या अभियानकाे क्रममा देखिएकाे नेताहरूले बताएका छन् । अभियानले देखाएको मुख्य समस्या भनेको पार्टीमा नयाँ पुस्ताको आकर्षण नहुनु र विधान उल्लंघनकै लागि बनाइएको जस्तो भएको भन्ने छ ।

सिद्धान्तको पुनर्व्याख्या आवश्यक भएको नेता गुरु घिमिरे बताउँछन् । ‘बीपीले प्रतिपादन गर्नुभएको विचार र सिद्धान्त कालजयी छ र नाम सर्वप्रिय छँदैछ । यसको पुनर्व्याख्या भने आवश्यक छ । र, समग्र संगठनको पुनर्निर्माण आवश्यक छ,’ उनले भने ।

चरित्र र चेहरा सुधार्न आवश्यक छ भनेर अभियानमा लागेका उनले अर्को चरणमा जिल्लास्तरमा अभियान पुर्‍याइने बताएका छन् । ‘अभियानको प्रथम चरणमा थोरै मात्र भए पनि छाम्ने प्रयत्न गरिएको छ । दोस्रो चरणको जिल्लास्तरीय कार्यक्रममा खोतलखातल पारिनेछ,’ उनले भने ।

कांग्रेसमा वर्तमान नेतृत्वले पार्टी सुधार गर्न नसक्ने भएकाले विशेष महाधिवेशनको माग समेत जेठ २ गते अभियानको घोषणा गर्दा उठेकाे थियो । सुरुमा उग्र देखिएका नेताहरू बीचमा मत्थर भए । विशेष महाधिवेशनको कुरा आम कार्यकर्ताको मागको आधारमा राखिने नेताहरूले बताएका छन् ।

पार्टीले भ्रष्टाचारकाण्डमा छानबिन गर्न अगुवाइ गर्नुपर्ने, पार्टी रुपान्तरण गर्नुपर्ने, विभाजन अन्त्य गर्नुपर्ने सुझाव आएको अभियानका नेता शाहीले बताए । विशेष महाधिवेशनबारे कार्यकर्ताको सुझाव के कस्तो आयाे भन्नेबारे उनले खुलाउन चाहेनन् । ‘पार्टी सुधारको कुरा हो । सुध्रिए विशेष महाधिवेशन आवश्यक पर्दैन । पार्टी सुध्रिएन भने विशेष महाधिवेशन गराउन बाध्यात्मक अवस्था आउने गरी अघि बढ्छौँ,’ उनले भने ।

अभियानमा कांग्रेसलाई अन्य दलले भेट्न नसक्ने शक्तिहरू भेटिएको घिमिरेले बताए । ‘रुपान्तरण अभियानका साथीहरूको सक्रिय सहभागिताले के प्रमाणित गर्‍यो भने कांग्रेसभित्र अझै पनि त्यस्तो जीवनदायिनी शक्ति छ, जसले कांग्रेस पार्टीलाई जुरुक्क उचालेर प्रतिद्वन्द्वीहरूले आँक्न नसक्ने उचाइमा पुर्‍याउन सक्छ,’ उनले भने ।

सात प्रदेश र डायस्पोरामा समेत बहस चलाइएको अभियानमा नेताहरू घिमिरे र शाहीसँगै मधु आचार्य, रञ्जित कर्ण, जगदीश्वरनरसिंह केसी, देवराज चालिसे, भरत खड्का, सुवास पोख्रेल, बिजुला बर्मा, धर्मेन्द्र नेम्वाङ, विष्णुदेवी पाण्डे, गोबिन्द पोख्रेल, विक्रम खनालसहितका नेताहरू सहभागी थिए ।

प्रकाशित मिति: शुक्रबार, असार ८, २०८० १८:१०