गण्डकीका अधैर्य सांसद : ५९ जनाको हाजिर, बैठक सकिँदासम्म २८ जना टाप

A+ A A-

बैठक चलिरहँदा बिहीबार गण्डकीका कांग्रेस सांसद विन्दुकुमार थापा आफ्नो गाडीमा प्रदेशसभाबाट निस्किए । बैठक सकिनुभन्दा एक घण्टाअघि उनी निस्किँदा संसदभित्र आगामी आर्थिक वर्ष २०८०–०८१ को बजेटमाथि छलफल जारी थियो । थापासहित बैठक सुरु हुँदा सहभागी भएका २८ जना बैठक नसकिँदै निस्किसकेका थिए ।

गण्डकीसहितका प्रदेशमा आगामी आर्थिक वर्ष २०८०–०८१ को बजेटमाथि छलफल जारी छ । तर, बजेटजस्तो महत्वपूर्ण विधेयकलाई पनि सांसद कति हलुका लिन्छन् भन्ने गण्डकीको बिहीबारको बैठकको सुरुदेखि अन्तिमसम्मको दृश्यले देखाउँथ्यो ।

बिहीबार बैठक सुरु हुँदा मुख्यमन्त्री, मन्त्री र सत्तापक्षी सांसद ।

गण्डकी प्रदेशसभाको बिहीबारको बैठक सुरु भएर सकिँदासम्म उपस्थित सभामुखबाहेक ५८ जनामध्ये २८ जना निस्किसकेका थिए । गण्डकी प्रदेशसभाका सभामुखबाहेक ५९ जना सदस्यमध्ये बिहीबारको बैठकमा नेकपा एमालेका एक जनाबाहेक ५८ जना उपस्थित थिए । तर, बैठक नसकिँदै सांसदहरू धमाधम घरतिर लागेपछि प्रदेशसभामा राखिएका कुर्सी बैठक सकिँदासम्म खालीखाली देखिन्थे ।

गण्डकी प्रदेशसभामा बुधबारदेखि आगामी आर्थिक वर्ष २०८०–०८१ को बजेटमाथि छलफल जारी छ । बिहीबारको बैठक ११ बजे सुरु भएर सवा पाँच बजे सकिँदासम्म मुख्यमन्त्रीसहित सत्तापक्षका उपस्थित ३५ जना प्रदेशसभा सदस्यमध्ये १८ जना र प्रतिपक्षका उपस्थित २३ जनामध्ये १० जना सांसद संसदबाट निस्किसकेका थिए ।

बैठक सकिन लाग्दा खाली सत्तापक्षको ‘रो’ । यो दृश्य कैद हुँदा सत्तापक्षीय सांसद कांग्रेसका भेषबहादुर पौडेल रोष्टममा बोल्दै थिए ।

कोही व्यक्तिगत कामले संसद नै छोडेर निस्केका थिए । कोही बिरामी भएकाले संसदको बीचमै घरतिर लागे । ‘हाम्रो दलको कोही माननीय विशेष कारणले जानुपर्‍यो भनेर निस्कनुभयो । दल नेता बेड रेष्टमै भएको र चासो दिएर आउनुभएको हो,’ नेकपा (एमाले)प्रमुख सचेतक गोविन्दबहादुर नेपालीले भने, ‘बिरामी भएको परिस्थितिबाहेक माननीयहरू बस्नुपर्छ ।’

गत हप्ता हर्नियाको अपरेसन गरेकाले एमाले दल नेता खगराज अधिकारी स्वास्थ्य लाभकै अवस्थामा छन् । उनी बजेट प्रस्तुत हुँदा पनि संसदमा सहभागी थिएनन् । बजेटमाथिको छलफलको दोस्रो दिन बिहीबार सहभागी उनी बीचमा निस्किएका हुन् ।

बिहीबार बैठक सुरु हुँदा प्रतिपक्षी सांसद ।

सांसदहरू आफैँमा एकअर्काका प्रतिस्पर्धी हुन् । आफ्नै पार्टीका सांसदले बजेटमाथि के टिप्पणी गरिरहेका छन्, विपक्षी सांसदले के भनेका छन् भन्ने एकअर्काले सुन्नुपर्ने हो । तर, एकपछि अर्को गर्दै संसदका कुर्सी खाली हुनुले सांसद बजेटमाथिको छलफलमा कति चासो दिएर संसद आएका छन् भन्ने प्रष्टै देखाउँथ्यो ।

बिहीबार संसद बैठक ६ घण्टा चल्यो । लामो समय संसद चल्दा शौचालय जानु, पानी पिउन निस्कनु, छोटो समय लिएर क्यान्टिनसम्म पुग्नु सामान्य नै हो । तर, हाजिर गर्ने अनि अत्यावश्यक काम नभई निस्कने, आफू बोल्ने पालो भए बोल्ने र त्यसपछि अरुले उठाएका विषयलाई सामान्य मानेर संसदबाट निस्किएका थिए ।

बैठकको अन्तिमतिर खाली–खाली प्रतिपक्षी ‘रो’

बैठक कति लामो हुन्छ भन्ने जानकारी दल र सांसदलाई पहिल्यै हुन्छ । तर, कति सांसदले त त्यही समयमा अरु कार्यक्रममा आउने आश्वासन पनि दिएका हुन्छन् । संसद यति समय चल्छ भन्ने थाहा हुँदाहुँदै निस्कनुभन्दा अरु कार्यक्रम स्थगित गर्नु उचित हुने माओवादी सांसद फणीन्द्र देवकोटा बताउँछन् । ‘संसद अवधिभर यहीँ रहेर विषयवस्तु बुझ्नुपर्छ । अरु कार्यक्रम भए पनि संसदलाई बढी महत्व दिएर बस्नुपर्छ,’ उनले भने ।

गण्डकी प्रदेशसभामा नेपाली कांग्रेसका २७, एमालेका २२, नेकपा (माओवादी केन्द्र)का सभामुखबाहेक सात, राप्रपाका दुई र एकीकृत समाजवादीका एक जना सांसद छन् । गण्डकीमा एमाले र राप्रपा प्रतिपक्षमा छन् ।

प्रकाशित मिति: शुक्रबार, असार ८, २०८० ०७:०५