काठमाडौंमा तार भूमिगत गर्ने काम भइरहेको छ, नागरिकले केही समय अफ्ठेरो व्यहोर्नुपर्छः कुलमान घिसिङ

काठमाडौंमा तार भूमिगत गर्ने काम भइरहेको छ, नागरिकले केही समय अफ्ठेरो व्यहोर्नुपर्छः कुलमान घिसिङ

A+ A A-

नेपाल विद्युत् प्राधिकरणका प्रवन्ध निर्देशक कुलमान घिसिङले काठमाडौंमा विद्युत्‌को तार भूमिगत गर्ने काम भइरहेको भन्दै केही महिना नागरिकले अफ्ठ्यारो व्यहोर्नुपर्ने बताएका छन् ।

बिहीबार प्रतिनिधिसभाअन्तर्गतको पूर्वाधार विकास समितिको बैठकमा घिसिङले काठमाडौंमा विद्युत्‌को तार भूमिगत गर्ने काम भइरहेको बताए । खानेपानीको पनि भूमिगत गर्ने काम भइरहेको भन्दै उनले प्राधिकरणले तार भूमिगत गरिसकेपछि खानेपानीको काम नसकिएसम्म सडक पिच गर्न नसकिने बताए ।

‘काठमाडौंमा तारमा मात्रै होइन खानेपानीको पनि धेरै भूमिगत कामहरू भइरहेको छ । हामीले गरिसकेपछि खानेपानीको नसकिएसम्म त्यसलाई पिच गर्नसक्ने स्थिति छैन,' घिसिङले भने, 'भूमिगत गर्नलाई धेरै नै अफ्ठ्यारो स्थिति छ । सडकको, सबैको समन्वय भएन भने यो प्रोजेक्ट सम्पन्न गर्न गाह्रो छ । अलिकति राम्रो देख्नका लागि दुई/चार महिना अफ्ठ्यारो पनि व्यहोर्नुपर्ने स्थिति म देख्छु ।'

भूमिगत गर्ने काम निकै अफ्ठ्यारो रहेको भन्दै सबै निकायको समन्वय आवश्यक पर्ने घिसिङको भनाइ छ । उनले तार भूमिगत गर्ने काम गरुन्जेल दुई/चार महिना अफ्ठेरो व्यहोर्नुपर्ने बताए ।

एउटा प्रशारण लाइनको क्याबिनेटबाट स्वीकृत भएपछि कटान आदेश आउन पाँच वर्ष समय लाग्ने भन्दै ढिलो नहुने कानुनी व्यवस्था गर्न उनले सांसदहरूलाई ध्यानाकर्षण गराए ।

'एनजीओ/आईएनजीओहरूको कारणले नेपालमा प्रशारणलाइन बनाउनु हुँदैन । एउटा प्रशारण लाइनको क्याबिनेटबाट स्वीकृत भएपछि कटान आदेश आउन पाँच वर्ष लाग्छ,' घिसिङले भने, 'यि विषयहरूलाई माननीयज्यूहरूले सम्बोधन गर्नुपर्‍यो । यो सम्बोधन नभइकन यो काम भएन, ऊ काम भएन । गर्नसक्ने स्थिति छैन ।’

उनले देशभरिको विद्युत्‌का पोल सार्नुपर्ने अवस्था रहेको उल्लेख गर्दै पोल सार्न मात्रै प्राधिकरणलाई ५० अर्ब रुपैयाँ चाहिने बताए ।

प्रकाशित मिति: बिहीबार, असार ७, २०८० १७:१०