स्थानीय तहका जनप्रतिनिधिसँग बजेटबारे गगन-विश्व र विश्वकर्माले के भने ?

A+ A A-

नेपाली कांग्रेसले सातै प्रदेशका स्थानीय तहका जनप्रतिनिधिहरूसँग बजेटकेन्द्रित मार्गनिर्देशनात्मक कार्यक्रम गरेको छ । बजेट निर्माण तथा नेपाली कांग्रेसको घोषणापत्र कार्यान्वयन सम्बन्धमा जनप्रतिनिधिहरूको भूमिका विषयक कार्यक्रममा कांग्रसका महामन्त्रीद्वय गगन थापा र विश्वप्रकाश शर्मा तथा प्रचार विभाग प्रमुख मीन विश्वकर्माले भर्चुअल कार्यक्रम गरेका हुन् ।

प्रचार विभाग प्रमुख विश्वकर्माका अनुसार अहिले लुम्बिनी प्रदेश बाहेक ६ वटा प्रदेशको कार्यक्रम सकिएको छ । ३२९ पालिकाका जनप्रतिनिधिहरूलाई जनमुखी बजेट कसरी बनाउने, त्यसमा पार्टीको घोषणापत्रका कुरा कसरी समेट्ने र जनतासँगको सम्बन्ध कसरी सुमधुर राख्नेबारे मार्गनिर्देशन गरिएको विश्वकर्माले जानकारी दिए ।

विश्वकर्माले समृद्धि र सुशासनको विषयमा धारणा रोखेका थिए । उनले समृद्धिले जनतालाई छुने भए पनि यो स्वभाविक प्रक्रिया रहेकाले सुशासनमा जोड दिनुपर्ने बताए । सुशासन व्यवहारमा देखिने भएकाले जनप्रतिनिधिले व्यवहारमा ध्यान दिनुपर्नेमा उनको जोड थियो ।

महामन्त्री थापाले स्थानीय तहमा कार्यविधि बनाएर काम हुने गरेकोमा सो अभ्यास वित्तीय अनुशासनभित्र नहरन सक्ने बताए । उनले पाँच वर्षपछि जनप्रतिनिधिको रूपमा बाहिरिँदै गर्दा के के गरे भन्ने हिसाब रहने भएकाले परिणाममुखी काम गर्नुपर्नेमा जोड दिए ।

उनले जनप्रतिनिधिबाट बाहिरिँदै गर्दा बालश्रम, सामाजिक विभेद, लैंगिक हिंसा, बाटोघाटो कस्तो अवस्थाबाट कस्तोमा पुगेको छ हेर्नुपर्ने बताए । महामन्त्री थापाले बजेट निर्माण गर्दा थेरै ठाउँमा छरेर खुसी पार्न नभै परिणमुखी हुनुपर्ने बताए ।

अर्का महामन्त्री विश्वप्रकाश शर्माले जनतासँग संवाद गरेर काम गर्दा सहज हुने बताए । जनप्रतिनिधिले गरेका काम परीक्षण आफैँले गर्न सजिलो हुने बताए । स्थानीय सरकारले असार मसान्तभित्र बजेट ल्याइसक्नुपर्छ । अन्तर सरकारी वित्त व्यवस्थापन ऐन, २०७४ मा स्थानीय तहको बजेट सम्बन्धित नगर तथा गाउँसभामा १० असारभित्र पेस गर्नुपर्ने व्यवस्था छ ।

प्रकाशित मिति: सोमबार, असार ४, २०८० १३:१६