मधेशको बजेटः कृषि, स्वास्थ्य र भौतिक पूर्वाधारमा जोड

A+ A A-

मधेश प्रदेशका अर्थमन्त्री संजय कुमार यादवले शुक्रबार प्रदेशसभामा आर्थिक वर्ष २०८०/८१ को लागि ४४ अर्ब ११ करोड ४६ लाख ३२ हजारको बजेट प्रस्तुत गरे ।

त्यसमध्ये चालुतर्फ १८ अर्ब २१ करोड ७६ लाख १४ हजार (४१.३० प्रतिशत), पुँजीगततर्फ २५ अर्ब ६९ करोड ७० लाख १८ हजार (५८.२५ प्रतिशत) र वित्तीय व्यवस्थातर्फ २० करोड (०.५४ प्रतिशत) विनियोजन गरिएको यादवले जानकारी दिए ।

प्रदेश सरकारले चालु आर्थिक वर्षभन्दा करिब ४ अर्ब कम अकारको बजेट ल्याएको हो । चालु आर्थिक वर्षमा प्रदेशमा ४६ अर्ब ९१ करोड ४८ लाख ८८ हजारको बजेट ल्याएको थियो । त्यसमध्ये चालु आर्थिक वर्षमा ६५ प्रतिशत बजेट मात्र खर्च हुने प्रदेश सरकारको अनुमान छ ।

बजेटमा कृषि, स्वास्थ्य र भौतिक पूर्वाधारमा जोड दिएको छ । यसअघिको बजेटमा पनि स्वास्थ्य, कृषि र भौतिक पूर्वाधारमा जोड दिएको थियो ।

प्रदेश सरकारले ल्याएको बजेटमा पुरानै कार्यक्रमहरूलाई निरन्ता दिएको छ भने अगामी आर्थिक वर्षमा आफ्नै वित्तीय संस्था स्थापना गर्न १० करोड रकम विनियोजन गरेको छ । दुई वर्षअघिको बजेटमा पनि प्रदेश बैंक स्थापना गर्ने भनिएको थियो । तर, चालु र त्यसअघिको बजेटमा भने प्रदेश बैंक स्थापना गर्न बजेट विनियोजन गरेको थिएन ।

चालु आर्थिक वर्षमा बेटी पढाउ बेटी बचाउ, मुख्यमन्त्री स्वच्छता अभियान, हरित प्रदेश अभियान जस्ता बढी रकमका कार्यक्रमहरूले निरन्तरता पाएका छन् । तर, ती कार्यक्रमहरू चालु आर्थिक वर्षमा अलपत्र छन् ।

विश्व आर्थिक मन्दी, आर्थिक संकटको बेलामा रोजगार सिर्जना गर्ने तथा प्रदेशको आर्थतन्त्र चलायमान बनाउनेतर्फ बजेटमा खासै ध्यान दिएको देखिँदैनन् ।

चालु आर्थिक वर्षमा प्रदेशको आर्थिक वद्धिदर १.९० प्रतिशत रहेकोमा अर्थमन्त्री यादवले प्रस्तुत गरेको अगामी आर्थिक वर्षको बजेटमा आर्थिक वृद्धिदर ५ प्रतिशत हुने अनुमान गरिएको छ ।

प्रकाशित मिति: शुक्रबार, असार १, २०८० २१:०६