प्राधिकरणले नक्सा पास नगरी महानगरसँग लियो टक्कर, बालेन ‘एक्सन'मा आउँदा स्पष्टीकरण

प्राधिकरणले नक्सा पास नगरी महानगरसँग लियो टक्कर, बालेन ‘एक्सन'मा आउँदा स्पष्टीकरण

A+ A A-

त्रिभुवन अन्तर्राष्ट्रिय विमानस्थल नजिकै नेपाल नागरिक उडड्यन प्राधिकरणले आफ्ना लागि भवन बनाइरहेको छ । केही वर्षअघिदेखि बनाइरहेको उक्त भवन निर्माणको अन्तिम चरणमा पुगेको छ । प्राधिकरणको उक्त भवनको नक्सा पास भने अहिलेसम्म भएको छैन । भवन निर्माण गर्नुभन्दाअघि नै नक्सा पास हुनुपर्ने थियो । कतिसम्म भने भवन निर्माण अन्तिम चरणमा पुग्दासमेत काठमाडौं महानगरपालिकाबाट नक्सा पास गराएको छैन । नक्सा पासका लागि महानगरपालिकामा गत ९ माघ निवेदन दिएको थियाे ।

प्राधिकरणले भवन निर्माणमा नक्सा पासका लागि महानगरपालिकालाई अटेर गरेपछि काठमाडौं महानरपालिकाले २४ जेठ २०८० मा प्राधिकरणलाई पत्र लेखेको थियो । निर्माणाधीन भवनको नक्सा पास भए /नभएको वा नभएको भए किन नभएको ? भनेर महानगरको शहरी व्यवस्थापन विभागले पत्र पठाएको थियो ।

महानगरले प्राधिकरणलाई पठाएको पत्रमा भनिएको छ, 'कामनपा ९ सिनामंगलस्थित तहाँ प्राधिकरणको नाममा दर्ता कायम रहेको जग्गामा नयाँ भवन निर्माण भएको देखिएकोले उक्त भवन प्रचलित नियम/कानुनबमोजिम निर्माण भएको छ/छैन ? भएको भए सो को प्रमाण र पास नभएको भए काठमाडौं महानगरपालिका कार्यालयको मिति २०८०/०२/०३ को राष्ट्रिय दैनिक पत्रिकामा प्रकाशित ३५ दिने सूचना बमोजिम नक्सा पास गर्नु हुन निर्देशानाुसार अनुरोध छ ।’

उक्त सूचनाअनुसार प्राधिकरण निर्माणाधीन भवनको नक्सापासका लागि महानगरमा नगएपछि २४ जेठमा शहरी व्यवस्था विभागका प्रमुख सुरज शाक्यले पत्र लखेका हुन् । महानगरको उक्त पत्रलाई पनि प्राधिकरणले वास्ता गरेको थिएन । त्यसरी दुईपटक नक्सा पासका लागि आग्रह गर्दा पनि अटेर गरेर प्राधिकरणले महानगरसँग पौँठेजोरी खेलेपछि महानगरको नगर प्रहरीको टोली ३२ जेठ २०८० मा निर्माणस्थलमा पुगेर तारजाली भत्काइदिएको थियो ।

नक्सा पासका लागि निवेदन दिए पनि त्यसका लागि महानगरले प्रचलित कानुनअनुसार दस्तुर मागेपछि प्राधिकरणले भने त्यस्ताे दस्तुर तिर्न अस्वीकार गर्‍याे । प्राधिकरणका प्रवक्ता जगन्नाथ निराैलाले शिलापत्रसँग भने, 'सरकारी कार्यालयले भवन बनाउँदा अर्काे सरकारी कार्यालयलाई दस्तुर दिन मिल्दैन ।'

महानगरले उक्त तारजाली काटिदिएपछि प्राधिकरणले मेयर बालेन शाहसहित ३ जनालाई स्पष्टीकरण सोधेको छ । प्राधिकरणले नागरिक उड्डयन प्राधिकरण ऐन २०५३ अनुसार किन कारबाही नगर्ने भन्दै स्पष्टीकरण सोधेको हो । सो ऐनअनुसार ५० हजार रुपैयाँ जरिवाना हुनसक्छ । र, जरिवाना नतिरे उडानमा रोक लगाउन सकिनेसमेत व्यवस्था छ ।

प्राधिकरणका प्रवक्ता जगन्नाथ निरौलाका महानगरले अनुसार सिनामंगलस्थित त्रिभुवन अन्तर्राष्ट्रिय विमानस्थल क्षेत्रमा पूर्वजानकारी नदिई फेन्सिङ तार काटेको हो । निरौलाले उक्त दाबी गरे पनि महानगरले भने ३ जेठकाे राष्ट्रिय पत्रिकामा सूचना प्रकाशन र २४ जेठमा पत्राचार गरेर नक्सा पासका लागि ताकेता गरेको देखिन्छ ।

यद्यपि, प्राधिकरणले ९ माघ २०७९ मा नक्सा पासका लागि निवेदन दिएको तर अहिलेसम्म महानगरपालिकाले निर्णय नगरेको दाबी गरेको छ ।

त्यसो त, प्राधिकरणले महानगरका मेयरलाई स्पष्टीकरण सोध्ने कि अदालतमा जाने भन्ने विषयमा पनि प्रश्न रहेको छ । प्राधिकरण संस्कृति, पर्यटन तथा नागरिक उडड्यन मन्त्रालयको एउटा विभाग मात्रै हो । त्यस्तो निकायले स्थानीय सरकारलाई स्पष्टीकरण सोध्न नमिल्ने तर्क पनि उठेको थियो । तर, प्राधिकरणका प्रवक्ता निरौलाले शिलापत्रसँगको कुराकानीमा मेयरलाई स्पष्टीकरण सोध्न मिल्ने भएकाले पत्र काटेको बताए । यता, मेयर बालेन शाहका कानुनी सल्लाहकार ओमप्रकाश अर्यालले भने यो विषयमा थप बुझी नसकेको बताए ।

पछिल्ला दिनमा प्राधिकरणका महानिर्देशक प्रदीप अधिकारीको संस्कृति, पर्यटन तथा नागरिक उड्डयनमन्त्री सुदन किराँतीसँग कुरा मिलिरहेको छैन । अधिकारीमाथि मन्त्री किराँतीले परिणाम निकाल्न दबाब दिइरहेका छन् । उक्त दबाबपछि अधिकारी मन्त्री र सचिवमध्ये एकलाई फाल्छु भन्दै हिँडिरहेका छन् । अधिकारीकै उक्साहटमा सांसद प्रेम आलेले संसदमा ३२ जेठमा संसदमा मन्त्री किराँतीविरुद्ध आक्रमक रूपमा प्रस्तुत भएका थिए । अहिले बालेनसँगको पौँठेजोरी पनि अधिकारीको त्यही आक्रोश भनेर पनि प्राधिकरणमा टिप्पणी भइरहेको छ ।

प्रकाशित मिति: शुक्रबार, असार १, २०८० १९:५६