यस्तो छ सीताबारे ‘आदिपुरुष‘को भ्रमपूर्ण डायलग

A+ A A-

शुक्रबारदेखि हलहरूमा प्रदर्शनको तयारी गरिरहेका बेला दक्षिण भारतीय फिल्म ‘आदिपुरुष’लाई काठमाडौंमा प्रदर्शन गर्न नदिने घोषणा काठमाडौं महानगरपालिकाका मेयर बालेन्द्र शाहले बिहीबार गरे । तर, नेपालमा विवादित संवाद कटाएर फिल्म देखाउन लागिएकाे छ । भारतमा भने फिल्म चलिरहेकाे छ ।

रामायणमा आधारित उक्त फिल्ममा सीतालाई भारतकी छोरी भनिएको प्रति मेयर शाहको आपत्ति थियो । नेपालमा अहिले उक्त फिल्मबाट सीताबारे भ्रमपूर्ण संवाद हटाउनुपर्ने माग उठेकाे छ । खासमा त्यो संवादमा के भनिएको छ त ?

रामायणमा सीता राजा जनककी छोरी भनेर प्रस्ट रूपमा भनिएको छ । नेपालकै थिए राजा जनक । उनकै नामबाट धनुषामा प्रसिद्ध जनकपुरधाम छ । रामको विषयमा पनि एकपल्ट ठूलै बहस छेडिएको थियो । खासमा राम पनि नेपालकै थिए भन्ने तर्कहरू अगाडि ल्याइएका थिए । तर, साउथ इन्डियन फिल्म ‘आदिपुरुष’ले सीतालाई समेत भारतकी छोरी भनेको छ ।

लक्ष्मण रेखा तोडेर भिक्षा दिन निस्केकी सीतालाई लंकेस (रावण)ले हरेर लैजान्छ । यो कुरा राघव (राम) ले थाहा पाएपछि उनले आफ्ना सेनालाई निर्देशन दिँदै भनेका छन्, ‘आज मेरा लागि नलड्नू, त्यो दिनका लागि लड्नू, भारतकी कुनै छोरीमाथि हात हाल्नुअघि दुराचारी तिमेरुको पुरुषत्व सम्झेर थरर हुनेछ ।’

यो दृश्यमा सीतालाई देखाइएको छ । फिल्मले सीता भारतकी छोरी हुन् भनेर पाैराणिक कुरा बंग्याउन खोजेको छ । यस्ता फिल्महरू धेरै समयसम्म हेरिन्छन् । फिल्म नै त हो भनेर छोडियो भने वर्षौंपछि सीता नेपालकी छोरी हुन् भन्ने तथ्यसमेत विवादित बन्न पुग्छ । त्यसैले फिल्ममार्फत फैलाउन खोजिएको भ्रमका विरुद्ध उभिन आवश्यक रहेको जानकारहरू बताउँछन् । नेपालमा मात्र होइन, भारतमै पनि यो संवाद हटाउनुपर्ने उनीहरूको भनाइ छ ।