नदीजन्य तस्करी बढ्दो, सात ट्रयाक्टरसहित सात जना पक्राउ

A+ A A-

कैलालीका नदीहरूबाट मापदण्ड विपरित नदीजन्य पदार्थको उत्खनन् बढेको छ । नदी तथा स्थानीय खोलामा मापदण्ड र सहमति विपरित गिट्टी, बालुवा र ढुङ्गा उठाउने कार्य भइरहेको छ ।

स्थानीय प्रशासनले नदीजन्य वस्तुको उत्खनन र बिक्री वितरणमा रोक लगाए पनि अनुगमन र निगरानी गर्न नसक्दा नदीजन्य पदार्थ उत्खनन बढेको छ ।

कैलालीको खुटिया नदी, वन क्षेत्र र चुरेबाट समेत ढुङ्गा, बालुवा र गिट्टी निकाल्ने गरेको पाइएको छ । त्यस्तै खुटिया नदीमा नदीजन्य तस्करी बढेको छ । तर सरोकारवाला निकायले यसको नियन्त्रणका लागि कुनै पहल गरेका छैनन् ।

सात जना पक्राउ

खुटिया नदीबाट अवैध रूपमा बालुवा ल्याउँदै गरेको अवस्थामा सशस्त्र प्रहरीले सात जनालाई नियन्त्रणमा लिएको छ ।

सशस्त्र प्रहरी बल ३४ नम्बर गण हेडक्वार्टर कैलालीको टोलीले धनगढी उप–महानगरपालिका–१९ पथरियाबाट सात ट्रयाक्टरसहित सात जना चालकलाई पक्राउ गरेको हो ।

खुटिया नदीबाट अवैध रूपमा बालुवा लोड गरी ल्याउँदै गरेको अवस्थामा उनीहरूलाई पक्राउ गरिएको सशस्त्र प्रहरी बल ३४ नम्बर गण हेडक्वार्टर कैलालीका सशस्त्र प्रहरी नायव उपरीक्षक भीम चन्दले बताए ।

आवश्यक कारबाहीका लागि ट्रयाक्टरसहित ७ जनालाई नै जिल्ला समन्वय समिति कैलाली पठाएको उनले जानकारी दिए ।

उनका अनुसार धनगढी उप–महानगरपालिका १ वसन्त टोलका सञ्जय यादव, सोही ठाउँका सुनिल चौधरी र रामपुकार सहानी, वडा नम्बर ५ जाईका गजेन्द्र चौधरी, वडा नम्बर ८ का करन चौधरी, वडा नम्बर ६ जालीका ईन्द्र चौधरी र वडा नम्बर ७ मनहेराका बर्षातु चौधरी बालुवा सहितको ट्रयाक्टर सहित पक्राउ परेका हुन् ।