स्वार्थ बाझिँदा पर्यटनमन्त्री किराँती र पूर्वपर्यटनमन्त्री प्रेम आले आरोपप्रत्यारोपमा

स्वार्थ बाझिँदा पर्यटनमन्त्री किराँती र पूर्वपर्यटनमन्त्री प्रेम आले आरोपप्रत्यारोपमा

A+ A A-

पूर्वसंस्कृति, पर्यटन तथा नागरिक उड्‌डयनमन्त्रीसमेत रहेका नेकपा एकीकृत समाजवादीका सांसद प्रेम आले र संस्कृति, पर्यटन तथा नागरिक उड्‌डयनमन्त्री सुदन किराँतीबीचको द्वन्द्व संसदसम्म पुगेको छ ।

पूर्वमन्त्री आले र मन्त्री किराँतीबीच अनौपचारिक आरोप-प्रत्यारोप केही सातादेखि सुरु भइसकेको थियो । ३२ जेठ २०८० को प्रतिनिधिसभा बैठकमा आलेले पशुपति क्षेत्र विकास कोष र नेपाल वायुसेवा निगमभित्र किराँतीले आर्थिक अपचलन गरेको गम्भीर आरोप लगाएपछि उनीहरूबीचको लफडा सार्वजनिक भएको हो ।

आलेले पर्यटनमन्त्री किराँतीको सार्वजनिक तहमै विरोध गर्ने स्थिति आउनुमा आलेसँग जोडिएका केही निश्चित स्वार्थ रहेको बताइएको छ । पर्यटनमन्त्री किराँतीले आलेनिकट कोषका सञ्चालक समिति सदस्यलाई हटाएपछि विरोध सुरु भएको हो । स्रोतका अनुसार पशुपति क्षेत्र विकास कोषका बोर्ड सदस्य देवी बराललाई आर्थिक अनियमितताको आरोपमा मन्त्री किराँतीले केही साताअघि हटाएका थिए ।

विवादास्पद पृष्ठभूमिका बराललाई स्पष्टीकरण सोधेर मन्त्री किराँतीले हटाएका थिए । त्यसपछि बराल मन्त्री किराँतीदेखि कोषका सदस्य-सचिव, कोषाध्यक्षसहित अन्य पदाधिकारीविरुद्धमा पनि लागेका थिए । उनको नियुक्तिदेखि नै विवाद थियो । पर्यटनमन्त्री हुँदा आलेले तिनै सदस्य बरालमार्फत कोषका काम गर्ने प्रयास गरेका थिए । कोषको गौशाला जग्गामा मारवाडी सेवा समितिले उपभोग गरेको जग्गाको विषयमा कोषले अध्ययन गर्न बरालकै नेतृत्वमा समिति बनाएको थियो ।

तर, सेवा समितिसँग उनै बराल मिलेर मन्त्री आलेसँग पनि सम्बन्ध विस्तार गरी छानबिन समितिले गतिलो काम नगरेको कोषका पदाधिकारीको आरोप थियो । पटक-पटक बरालको भूमिका विवादमा तानिएकै कारण किराँतीले सदस्यबाट हटाएका थिए । त्यति मात्र होइन, मन्त्री किराँतीले आलेनिकट सदस्य विष्णुकरण जैनलाई पनि हटाएका छन् भने अर्का सदस्य पूर्णबहादुर जेठारालाई स्पष्टीकरण सोधेका छन् । पर्यटन मन्त्रालयले उनीहरूको योग्यतामाथि प्रश्न उठाएको छ । कोष स्रोतका अनुसार आले पर्यटनमन्त्री भएका बेलामा किचेन क्याबिनेट सदस्यझैँ भूमिका रहेका जेठारा, बराल र जैनलाई मन्त्री किराँतीले हटाएपछि आले बढ्ता आक्रोशित भएको दाबी छ । त्यसो त, आलेले नियुक्त गरेका कोषाध्यक्ष नारायणप्रसाद सुवेदीको भूमिका पनि निकै विवादास्पद रहेको छ ।

सदस्य-सचिव मिलनकुमार थापासँग बोलचाल नै बन्द गरेका सुवेदीले कोषको चेक नकाट्दा कतिपय भुक्तानीमा पनि समस्या भएको छ । हुन त थापा आफैँ पनि विवादास्पद छन् । पशुपति जलहरी प्रकरणमा मुछिएका थापा कोषाध्यक्ष हुँदा आर्थिक अनियमितताको आरोपमा छन् । आलेको कोषसँगको रुचि भने पशुपति क्षेत्रभित्रको बालुवा बेचबिखनसँग जोडिएको छ । झण्डै ६ अर्बको बालुवा बेच्नुपर्नेछ । कोषको बोर्ड बैठकले पटक-पटक यो विषयमा छलफल भएको छ । तर, निर्णय हुन पनि सकेको छैन । आलेचाहिँ मन्त्री किराँतीलाई दबाबमा पारेर वा उनीपछि आउने पर्यटनमन्त्रीमार्फत उक्त बालुवा बेचबिखनमा आफ्नो मान्छेलाई ठेक्का लगाउने चालबाजीमा छन् ।

एसस्रोतका अनुसार सरकार बनाउने बेलामा माधव नेपालसँग पर्यटन मन्त्रालय आफूहरूले पाउनुपर्ने लबिङमा आले लागेका थिए । र, त्यतिबेला धनबहादुर बुढालाई पर्यटनमन्त्री बनाउनुपर्ने आलेको दाबी थियो । त्यसो त, आलेले आफूले पर्यटन मन्त्रालय छोड्दै गर्दा पनि जीवनराम श्रेष्ठ होइन, धनबहादुर बुढालाई पर्यटनमन्त्री बनाउन चाहेका थिए । त्यतिबेला बुढाले केही ठूलो होटलमा आफूनिकटसँग छलफलसमेत गरेका थिए ।

त्यति मात्र होइन, आलेले मन्त्री सुदन किराँतीलाई नेपाल वायुसेवा निगमको कार्यकारी अध्यक्ष युवराज अधिकारी हटाउन लबिङ गरेका थिए । त्यसमा किराँती सहमत भइसकेका छैनन् । अध्यक्ष अधिकारीलाई हटाएर निगमकै कर्मचारी दीपु ज्वारचनलाई बनाउन आलेले लबिइङ गरेको स्रोतको दाबी छ । तर, मन्त्री किराँतीले तत्काल अधिकारीलाई हटाउने मनस्थिति बनाएका छैनन् । स्रोतको दाबीमा मन्त्री किराँतीले अधिकारीको विकल्पमा नियुक्त गर्ने आफ्नो मान्छे भेट्टाएका पनि छैनन् । आले र किराँतीबीच कुरा नमिल्नुमा यो अर्को कारण मानिन्छ । त्यसबाहेक, पछिल्ला दिनमा आलेले नेपाल नागरिक उड्‌डयन प्राधिकरणको महानिर्देशक बनाएका प्रदीप अधिकारीसँग मन्त्री किराँती असन्तुष्ट छन् ।

गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थल आयोजनाको प्रमुख भएर काम गरेका अधिकारीमाथि आर्थिक अनियमितताको आरोप लागेको छ । महालेखा परीक्षकको कार्यालयका प्रतिवेदन पनि ती विमानस्थल निर्माणमा अनियमितता भएको पुष्टि गरेका छन् । त्यसमा प्रत्यक्ष जोडिने पात्र भनेका प्राधिकरणका महानिर्देशक अधिकारी नै हुन् । जुनियर अधिकारीलाई महानिर्देशक बनाउने निर्णय पर्यटनमन्त्री हुँदा आलेले नै गरेका थिए । आर्थिक लाभका आधारमा आलेले उक्त निर्णय गरेको पनि आरोप छ । त्यसो त, त्यतिबेला अधिकारीले प्रचण्ड र माधव नेपाललाई पनि आर्थिक सहयोग गरेको आरोप थियो । अहिले मन्त्री किराँती तिनै अधिकारीको भूमिकामाथि प्रश्न उठाइरहेका छन् ।

प्राधिकरणको महानिर्देशकको हैसियतले भैरहवा र पोखराको विमानस्थल कसरी चलाउने योजना चाहियो भन्दै मन्त्री किराँतीले अधिकारीमाथि दबाब बढाइरहेका छन् । अनि, निर्माण अवधिमै विमानस्थल सञ्चालनसम्बन्धी किन कार्ययोजना नबनाएको भन्दै मन्त्री किराँतीले अधिकारीमाथि अर्को प्रश्न सोधेका छन् । स्रोतको दाबीमा अहिले किराँती र अधिकारीको सम्बन्ध तिक्ततापूर्ण रहेको छ । त्यसैले अधिकारीको सन्देशमा आलेले आक्रोश पोखेको चर्चा पनि पर्यटन मन्त्रालयमा भइरहेको छ ।

आलेले संसदमा गम्भीर आरोप लगाएपछि दिउँसो मन्त्री किराँतीले जवाफ सामाजिक सञ्जालबाट दिएका छन् । किराँतीले लेखेका छन्, ‘बारुदको पहाडमा उभिएर सलाई नखेलाउँदा राम्रो । म धेरै कुरा जान्दिनँ, देश र जनताका लागि राम्रो काम गर्नुपर्छ भन्ने मात्र जान्दछु । पुर्खाले भन्थे, आफ्नो शरीरमा हात्ती बोकेर अर्काको आङको जुम्रा नटिप्नू ।’

प्रकाशित मिति: बिहीबार, जेठ ३२, २०८० १६:२०