भरत प्रसाद साहकाे मन्त्री बन्ने लाेभले मधेशमा माओवादी केन्द्रभित्र कलह

A+ A A-

मधेश प्रदेश सरकारबाट आफ्ना मन्त्रीलाई फिर्ता बोलाउने निर्णय गरेको माओवादी केन्द्रले मंगलबार मुख्यमन्त्री सराेजकुमार यादवलाई विश्वासको मत दियो ।

सहमतिअनुसार दुईवटा मन्त्रालय नदिएको भन्दै सरकार छोड्ने निर्णय गरेकाे माओवादी केन्द्रले मंगलबार केन्द्रकाे निर्देशपछि मुख्यमन्त्री यादवलाई विश्वासको मत दिएकाे हाे । ९ जेठमा मुख्यमन्त्री यादवले सत्ता गठबन्धनका अन्य दललाई जानकारी नगराई नेपाली कांग्रेस र नेकपा एकीकृत समाजवादीलाई सरकारमा भित्र्याएपछि आक्रोसित बनेकाे माओवादी केन्द्र मधेश प्रदेश संसदीय दलको सोही दिनको बैठकले सरकारमा रहेका आफ्ना उद्योग वाणिज्य तथा पर्यटन मन्त्री सुनिता यादव र राज्यमन्त्री रहबर अन्सारीलाई फिर्ता बोलाउने निर्णय गरेकाे थियाे ।

माओवादी संसदीय दलका नेता भरतप्रसाद साहले मुख्यमन्त्री यादवलाई दवाव दिने उद्देश्यले उक्त निर्णय गरे । तर पनि मुख्यमन्त्री यादवले माओवादीको प्रस्तावलाई कुनै वास्ता नै गरेनन् । नेता साहले प्रधानमन्त्री तथा पार्टी अध्यक्ष पुष्पकमल दाहाल प्रचण्डलाई प्रयोग गरे पनि मुख्यमन्त्री यादवलाई गलाउन सकेनन् ।

मुख्यमन्त्री यादवले माओवादीलाई टेरपुच्छर नलगाउनुको कारण हो माओवादीको आन्तरिक समस्या । माओवादी केन्द्रबाट मन्त्री बनेकी सुनिता यादव तत्काल राजीनामा दिने मुडमा छैनन् । दलका नेताले पटक पटक दवाव दिए पनि उनले राजीनामा दिन इच्छा देखाएकी छैनन् । मन्त्री यादवले आफ्नाे मन्त्री पद जोगाउन काठमाडाैं गएर प्रधानमन्त्री प्रचण्डसँग भेट्ने गरेकी छिन् । मन्त्री भएको तीन महिना पनि नभएको र विकास निर्माणको एउटा पनि काम गराउन नसकेको भन्दै मन्त्री यादवले तत्काल आफूले राजीनामा नदिने अडान लिँदै आएकी छन् ।

यता, मुख्यमन्त्री यादव भने ९ सिट रहेको माओवादी केन्द्रलाई २ वटा मन्त्रालय दिएको खण्डमा सत्ता गठबन्धनबीच झन असन्तुष्टि बढ्ने भनेर माओवादीको प्रस्ताव इन्कार गर्दै आएका छन् । लोकतान्त्रिक समाजवादी पार्टीले पनि दुई मन्त्रालय माग्दै आएको छ । यस्तोमा माओवादीलाई दुई मन्त्रालय दिएको खण्डमा सत्ता गठबन्धन दलबीच विवाद हुने मुख्यमन्त्री निकट जासपाका एक सांसदले बताए ।

मुख्यमन्त्री यादवले दुई मन्त्रालय नदिएको खण्डमा आफ्ना मन्त्रीलाई फिर्ता बोलाएर दलबाट आफ्नो नेतृत्वमा सरकारमा जाने नेता साहको मनसाय रहेको माओवादी केन्द्रका एक सांसदले बताए । माओवादीका एक नेताले भने, ‘मुख्यमन्त्रीले हाम्रो पार्टीलाई दुईवटा मन्त्रालय दिन सक्दैनन् यो कुरा नेता साहले पनि राम्री बुझेका छन् । तर पनि दलका नेताको अधिकारलाई दुरुपयोग गरेर नेता साहले मन्त्रीलाई फिर्ता बोलाउन दवाव दिइरहेका छन् ।’

प्रदेश सरकारमा अहिले दुईवटा मन्त्रालय गृह सञ्चार तथा कानुन र श्रम तथा यातायात मन्त्रालय मात्रै अहिले खाली छ । दुई जना मन्त्री जसपाकी सुरिता साह र जनमतका बसन्त कुश्वाहा अझै बिनाविभागीय मन्त्रीका रूपमा रहेका छन् ।

त्यसमाथि कांग्रेसले थप एक मन्त्रालय माग्दै आएको छ । 'यस्तोमा माओवादीले थप एक मन्त्रालय माग्दै आएको छ', मुख्यमन्त्रीका प्रेस सल्लाकार सीताराम अग्रहरीले भने, ‘यो सरकार कुनै एउटै पार्टीकाे होइन । गठबन्धनको सरकार भएकोले सबै सत्ता घटक दलहरूले मन्त्रालयको दावी गरिरहेका छन् । तर कुन पार्टीलाई कति मन्त्रालय दिने विषय सत्ता गठबन्धन दलहरूबीच सम्वादले टुंगो लगाउने विषय हो ।’

प्रकाशित मिति: बुधबार, जेठ ३१, २०८० २१:०५